ஊழியர் மரணம்: ஓலா தலைமை நிர்வாக அதிகாரி பவிஷ் அகர்வால் மீது வழக்கு: நிர்வாகத் தொந்தரவு காரணம் - சகோதரர் புகார்

ஓலா நிறுவனத்தின் தலைமை நிர்வாக அதிகாரி (சி.இ.ஓ) பவிஷ் அகர்வால் மற்றும் பிற நிர்வாக ஊழியர்கள் மீது பெங்களூரு நகர காவல்துறை சமீபத்தில் வழக்கு பதிவு செய்துள்ளது. 38 வயதான ஊழியர் ஒருவர், நிர்வாகத்தின் தொந்தரவு மற்றும் நிலுவையில் உள்ள பணம் கொடுக்கப்படாததால் தற்கொலை செய்துகொண்டதாக ஒரு மரணக் குறிப்பை எழுதி வைத்திருந்ததுதான் இதற்குக் காரணம் என்று கூறப்படுகிறது.

ஆங்கிலத்தில் படிக்க:

தற்கொலை செய்து கொண்டவர் பெங்களூரு சிக்கலசந்திராவைச் சேர்ந்த கே. அரவிந்த் என அடையாளம் காணப்பட்டுள்ளார். அரவிந்த் செப்டம்பர் 28-ம் தேதி தற்கொலை செய்துகொண்டதாகக் கூறப்படுகிறது. ஆனால், இந்த வழக்கு அக்டோபர் 6-ம் தேதி பதிவு செய்யப்பட்டது. 

இருப்பினும், இந்தச் சம்பவம் திங்கட்கிழமைதான் வெளிச்சத்திற்கு வந்தது. அரவிந்த் 2022-ம் ஆண்டு முதல் ஓலா எலெக்ட்ரிக் நிறுவனத்தில் 'ஹோமோலோகேஷன் இன்ஜினியராக' பணிபுரிந்து வந்தார்.

பாரதிய நியாய சன்ஹிதாவின் (BNS) பிரிவு 108 (தற்கொலைக்குத் தூண்டுதல்) இன் கீழ் பதிவு செய்யப்பட்ட முதல் தகவல் அறிக்கையில் (FIR), ஓலா எலெக்ட்ரிக் நிறுவனத்தின் வாகன ஹோமோலோகேஷன்ஸ் மற்றும் ஒழுங்குமுறைகள் பிரிவின் தலைவர் சுப்ரத் குமார் தாஷ், பவிஷ் அகர்வால் மற்றும் வேறு சிலரின் பெயர்களை காவல்துறை சேர்த்துள்ளது.

அரவிந்த்தின் அண்ணனான அஸ்வின் கண்ணன், தன் சகோதரன் 28 பக்கங்கள் கொண்ட மரணக் குறிப்பை விட்டுச் சென்றதாகக் கூறி காவல்துறையில் புகார் அளித்தார். செப்டம்பர் 30-ம் தேதி தாக்கல் செய்யப்பட்ட முதல் தகவல் அறிக்கையின்படி, அரவிந்த் இறந்த இரண்டு நாட்களுக்குப் பிறகு, ரூ. 17,46,313 என்ற பெரிய தொகை நெஃப்ட் மூலம் அவரது வங்கிக் கணக்கிற்கு வரவு வைக்கப்பட்டுள்ளது.

“இவ்வளவு பெரிய தொகை அவரது கணக்கில் வரவு வைக்கப்பட்டது எனக்குச் சந்தேகத்தை ஏற்படுத்தியது. சுப்ரத் குமார் தாஷிடம் விசாரித்தபோது, மனிதவளப் பிரிவைத் (எச்.ஆர்) தொடர்புகொள்ளுமாறு அவர் கூறினார். அவர்களை விசாரித்தபோது, ஓலா எலெக்ட்ரிக் நிறுவனத்தின் பிரதிநிதிகளான கிரித்தேஷ் தேசாய், பரமேஷ் மற்றும் ரோஷன் ஆகியோர் வீட்டிற்கு வந்து பணப் பரிவர்த்தனைகள் குறித்து விளக்கினர். அது திடீரென நிகழ்ந்தது மற்றும் எந்தவித தர்க்கமும் இல்லாமல் இருந்தது. நிறுவனம் சில தகவல்களை மறைக்க முயல்வது போல் இருந்தது” என்று அஸ்வின் முதல் தகவல் அறிக்கையில் தெரிவித்துள்ளார்.

அரவிந்த் எழுதி வைத்த மரணக் குறிப்பில், சுப்ரத் குமார் தாஷ் மற்றும் பவிஷ் அகர்வால் ஆகியோர் வேலையில் தன்னைத் தொந்தரவு செய்ததாகவும், சம்பளம் மற்றும் பிற சலுகைகளை வழங்காமல் தனக்கு மன அழுத்தத்தை ஏற்படுத்தியதாகவும், இதுவே இறுதியில் தற்கொலைக்கு வழிவகுத்ததாகவும் குற்றம் சாட்டியுள்ளார். “காவல்துறை அவர்கள் மீது நடவடிக்கை எடுத்து எனக்கு நீதி வழங்க வேண்டும்” என்றும் அந்த முதல் தகவல் அறிக்கை கூறுகிறது.

இந்த விவகாரம் குறித்து தாஷ் அல்லது அகர்வால் இதுவரை எந்த அறிக்கையும் வெளியிடவில்லை. இது குறித்து பேசிய துணை ஆணையர் (தென்மேற்கு) அனிதா பி ஹடன்னாவர், இந்த வழக்கு முதலில் "இயற்கைக்கு மாறான மரணம்" என்று பதிவு செய்யப்பட்டது என்றும், மரணக் குறிப்பில் காரணங்கள் பட்டியலிடப்பட்ட பின்னர் அரவிந்தின் சகோதரர் புகார் அளித்தார் என்றும் தெரிவித்தார். “நாங்கள் இந்த விவகாரத்தைக் கவனித்து வருகிறோம், விசாரணை நடந்து கொண்டிருக்கிறது”என்றும் அவர் மேலும் கூறினார்.