கொரோனா இரண்டாவது அலை; ஆக்ஸிஜன் பற்றாகுறையால் மரணங்கள் நிகழவில்லை – மத்திய அரசு

ஆக்ஸிஜன் பற்றாக்குறையால் மரணங்கள் நிகழ்ந்ததாக மாநிலங்கள் மற்றும் யூனியன் பிரதேசங்களால் அறிவிக்கப்படவில்லை என்று மத்திய சுகாதார மற்றும் குடும்ப நலத்துறை இணை அமைச்சர் பாரதி பிரவீன் பவார் செவ்வாயன்று மாநிலங்களவைக்கு தெரிவித்தார்.

எழுத்துப்பூர்வ பதிலில், பிரவீன் பவார், “இறப்புகளைப் பதிவு செய்வதற்கான விரிவான வழிகாட்டுதல்கள் மத்திய சுகாதார அமைச்சகத்தால் அனைத்து மாநிலங்கள் மற்றும் யூனியன் பிரதேசங்களுக்கு வழங்கப்பட்டுள்ளன. அதன்படி, அனைத்து மாநிலங்கள் மற்றும் யூனியன் பிரதேசங்கள் கொரோனா பாதிப்புகள் மற்றும் இறப்புகளை மத்திய சுகாதார அமைச்சகத்திற்கு தவறாமல் தெரிவிக்கின்றன. இருப்பினும், ஆக்ஸிஜன் பற்றாக்குறையால் எந்த இறப்பும் குறிப்பாக மாநிலங்கள் மற்றும் யூனியன் பிரதேசங்களால் தெரிவிக்கப்படவில்லை. ”என்று கூறியுள்ளார்.

எவ்வாறாயினும், கொரோனாவின் இரண்டாவது அலையின் போது மருத்துவ ஆக்ஸிஜனின் தேவை "முன்னோடியில்லாத வகையில் அதிகம்" இருந்ததாக அரசாங்கம் கூறியது.

“…2021 ஏப்ரல்-மே மாதங்களில் நாட்டில் கொரோனா பாதிப்பு செங்குத்தாக உயர்ந்து வருவதைக் கருத்தில் கொண்டு கொரோனா நோயாளிகளின் மருத்துவ கவனிப்பை உறுதி செய்வதற்காக மருத்துவ ஆக்ஸிஜன் மற்றும் பிற நுகர்பொருட்களை மாநிலங்களுக்கு வழங்குவது உள்ளிட்ட தொடர்ச்சியான நடவடிக்கைகளை இந்திய அரசு எடுத்தது, ”என்று அமைச்சர் கூறினார்.

இருப்பினும், இரண்டாவது அலையின் போது முன்னோடியில்லாத வகையில் மருத்துவ ஆக்ஸிஜனின் தேவை அதிகரித்ததன் காரணமாக, மத்திய அரசு மாநிலங்களுக்கு சமமான வகையில் ஆக்ஸிஜன் விநியோகம் கிடைக்க தேவையான நடவடிக்கை எடுத்தது என்றும் அமைச்சர் பவார் கூறினார். முதல் அலை காலத்தில் 3,095 மெட்ரிக் டன் உடன் ஒப்பிடும்போது இரண்டாவது அலையில் நாட்டின் தேவை கிட்டத்தட்ட 9,000 மெட்ரிக் டன்னாக உயர்ந்தது.

"மாநிலங்கள் மற்றும் யூனியன் பிரதேசங்கள் மற்றும் தொடர்புடைய அமைச்சகங்கள், உற்பத்தியாளர்கள் மற்றும் திரவ ஆக்ஸிஜன் சப்ளையர்கள் போன்ற அனைத்து பங்குதாரர்களுடனும் கலந்தாலோசித்து மருத்துவ ஆக்ஸிஜனை ஒதுக்க ஒரு மாறக்கூடிய மற்றும் வெளிப்படையான கட்டமைப்பு தயாரிக்கப்பட்டது."

இந்த ஆண்டு ஏப்ரல்-ஜூன் மாதங்களில் கொரோனா காரணமாக 2,35,986 இறப்புகள் பதிவாகியுள்ளதாகவும், கடந்த ஆண்டு இதே கால கட்டத்தில் 16,738 ஆக இருந்தது எனவும் ஒரு தனி கேள்விக்கு அமைச்சர் பதிலளித்தார்.

எவ்வாறாயினும், காங்கிரஸ், அரசாங்கத்தை கடுமையாக விமர்சித்ததோடு, அமைச்சருக்கு எதிராக உரிமை மீறல் நோட்டீஸ் கொடுக்கும் என்றும் கூறியது.

"பதிலில் நான் முற்றிலும் ஆச்சரியப்படுகிறேன் ... டெல்லி உட்பட ஒவ்வொரு மாநிலத்திலும், ஆக்ஸிஜன் பற்றாக்குறையால் நோயாளிகள் இறப்பதை நாங்கள் கண்டிருக்கிறோம். அதையெல்லாம் நாங்கள் அறிவோம். உண்மையில், அமைச்சர் சபையை தவறாக வழிநடத்தியுள்ளார். நான் அமைச்சருக்கு எதிராக உரிமை மீறல் நடவடிக்கை கோருவேன். அவர் சபைக்கு தவறான தகவல்களைத் தருகிறார், ”என்று காங்கிரஸ் மாநிலங்களவை உறுப்பினர் கே.சி.வேணுகோபால், அவருடைய கேள்விக்கு அளிக்கப்பட்ட பதில் குறித்து பின்னர் செய்தியாளர்களிடம் கூறினார். " இப்படித்தான் இந்திய அரசு கொரோனா நிலைமையை சமாளிக்கிறது. இது கண்டிக்கத்தக்கது, ”என்றும் வேணுகோபால் கூறினார்.

காங்கிரஸ் மூத்த தலைவர்களான ராகுல் காந்தி, ப.சிதம்பரம் ஆகியோரும் அரசாங்கத்தை விமர்சித்தனர்.

"ஆக்ஸிஜனின் பற்றாக்குறை எதுவும் இல்லை ... உணர்திறன் மற்றும் உண்மையின் கடுமையான பற்றாக்குறை இருந்தது. அது அப்போது இருந்தது, இப்போதும் இருக்கிறது ”என்று ராகுல் இந்தியில் ஒரு ட்வீட்டில் கூறினார்.

சிதம்பரம் ட்வீட் செய்ததாவது: “எதிர்கொள்ளும் ஒவ்வொரு சோகத்தையும் மறைக்கவும் மழுங்கடிக்கவும் செய்யும் கலையை அரசாங்கம் கற்றுள்ளது. முதலில், தடுப்பூசிகளுக்கு பஞ்சமில்லை என்றது. நேற்று முன்தினம், மத்திய பிரதேசத்தின் தார் மாவட்டம் தடுப்பூசிகள் முடிந்துவிட்டதாக தெரிவித்துள்ளது. பல தடுப்பூசி மையங்களிலும் இதே கதைதான். இப்போது, ​​இது ‘ஆக்ஸிஜன் பற்றாக்குறையால் இறந்ததாக எந்த அறிக்கையும் இல்லை’… ஒரு குருட்டு மற்றும் காது கேளாத அரசாங்கத்தால் உண்மையை ‘பார்க்க’ அல்லது ‘கேட்க’ முடியாது. ”

டெல்லி துணை முதல்வரும், ஆம் ஆத்மி கட்சியின் தலைவருமான மணீஷ் சிசோடியாவும் ஆக்ஸிஜன் பற்றாக்குறை பிரச்சினையில் மத்திய அரசை விமர்சித்தார்.

"இரண்டாவது அலையின் உச்ச காலத்தில் உண்மையான ஆக்ஸிஜன் பற்றாக்குறை இருந்தது. தொற்றுநோய் தொடங்கியதிலிருந்து மத்திய அரசு ஒரு மூடிமறைப்பை நடத்தி வருகிறது. அதன் குறைபாடுள்ள கொள்கை மற்றும் செயல்பாட்டின் காரணமாகவே, தொற்றுநோயின் மிகக் கடினமான கட்டத்தில் நாடு ஆக்ஸிஜன் நெருக்கடியைத் தாங்க வேண்டியிருந்தது, ”என்று மணீஷ் சிசோடியா கூறினார்.

உண்மையில், தேசிய தலைநகர் ஆக்ஸிஜன் நெருக்கடியின் மையமாக உருவெடுத்தது, ஏனெனில் மருத்துவ ஆக்ஸிஜன் தீர்ந்து போவது குறித்த, ஆக்ஸிஜன் பற்றாக்குறை அறிக்கைகள் இங்குள்ள மருத்துவமனைகளில் இருந்து பல நாட்கள் வெளிவந்தன.

குறைந்தது இரண்டு மருத்துவமனைகளில், நோயாளிகளின் இறப்புகளை ஆக்ஸிஜன் பற்றாக்குறையுடன் அதிகாரிகள் இணைத்திருந்தனர்.

ஏப்ரல் 23 இரவு, 21 பேர் இறந்த டெல்லியின் ஜெய்ப்பூர் கோல்டன் மருத்துவமனையில், மருத்துவமனையின் மருத்துவ கண்காணிப்பாளர் டாக்டர் டி.கே.பலூஜா கூறியதாவது: “டெல்லி அரசு 3.6 மெட்ரிக் டன் ஆக்ஸிஜனை வழங்குவதாக எங்களுக்கு கடிதம் எழுதியிருந்தது. எங்களுக்கு இன்னும் அதிகமாக தேவைப்பட்டாலும், நாங்கள் இதைச் செய்ய ஒப்புக்கொண்டோம். நேற்று இரவு, டேங்கர் வரவில்லை. அதிகாரிகள் மற்றும் சப்ளையர்களுக்கு நாங்கள் பல அழைப்புகளை செய்தோம். எங்கள் பங்குகள் குறைந்துவிட்டன. ஏழு மணி நேரம் தாமதத்திற்குப் பிறகு, எங்களுக்கு 1,000 லிட்டர் ஆக்ஸிஜன் கிடைத்தது. ஆனால் அதற்குள், சிக்கலான கவனிப்பில் உள்ள நோயாளிகள் இறந்தவிட்டனர். இது நள்ளிரவுக்குப் பிறகு நடந்தது. சில இறப்புகள் ஆக்ஸிஜன் பற்றாக்குறையால் ஏற்படவில்லை, ஆனால் அவர்களுக்கு வேறு சில சிக்கல்கள் இருந்தன. ”

ஆக்ஸிஜன் அழுத்தம் "நிச்சயமாக குறைவாக" இருப்பதாக பலூஜா கூறியிருந்தார். "ஒரு சாதாரண நோயாளி சமாளித்திருப்பார், ஆனால் அதிக தேவைகள் உள்ளவர்கள் அல்ல," என்று அவர் கூறினார்.

பத்ரா மருத்துவமனையில், மே 1 அன்று ஐ.சி.யுவில் 12 பேர் இறந்தனர். ஐ.சி.யுவில் ஆக்ஸிஜன் சப்ளை குறைந்துவிட்டபோது இறப்புகள் நடந்ததா என்று கேட்டதற்கு, மருத்துவமனையின் மருத்துவ இயக்குனர் டாக்டர் எஸ்.சி.எல் குப்தா தி இந்தியன் எக்ஸ்பிரஸிடம் கூறினார்: “நிச்சயமாக… அரை மணி நேரம் ஆக்ஸிஜன் இல்லாமல் மருத்துவமனை இயங்கியது… ”

கிரியா பல்கலைக்கழகத்தில் LEAD இல் ஆராய்ச்சி கூட்டாளியான அதிதி பிரியா; பொது சுகாதாரம் மற்றும் பொதுநல உரிமைகளில் ஆர்வமுள்ள ஆராய்ச்சியாளர் ஸ்வேதா டாஷ்; மற்றும் சிராகஸ் பல்கலைக்கழகத்தின் பட்டதாரி மாணவரான கிருஷ்ணா ரானாவேரும் ஆக்ஸிஜன் பற்றாக்குறையால் மருத்துவமனைகளில் நோயாளிகள் இறந்ததை ஆவணப்படுத்தினர்.

ஜூலை 7, 2021 அன்று தி இந்தியன் எக்ஸ்பிரஸில் வெளியிடப்பட்ட “கொரோனா இரண்டாவது அலையின் போது ஆக்ஸிஜன் இறப்பு பற்றிய உண்மை” என்ற கட்டுரையில், ஏப்ரல் 6 மற்றும் மே 19 க்கு இடையில் நாடு முழுவதும் 110 மருத்துவமனைகளில் ஆக்சிஜன் பற்றாக்குறையால் குறைந்தது 629 நோயாளிகள் இறந்ததாக அவர்கள் ஆவணப்படுத்தியுள்ளதாக கூறினர்.

"தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil