அரசு பள்ளி கட்டுவதற்கு ரூ.4 கோடி மதிப்புள்ள நிலத்தை தானமாக அளித்த ஓய்வுபெற்ற தலைமையாசிரியை

ஓய்வுபெற்ற ஆசிரியை பொன்மணி தேவி என்பவர், 4 கோடி ரூபாய் மதிப்பிலான தனது நிலத்தை அரசு பள்ளிக்கூடம் கட்டுவதற்கு தானமாக அளித்தார்.

ஈரோடு மாவட்டத்தில் 32 ஆண்டுகள் ஆசிரியராக பணியாற்றி ஓய்வுபெற்ற ஆசிரியை பொன்மணி தேவி என்பவர், 4 கோடி ரூபாய் மதிப்பிலான தனது நிலத்தை அரசு பள்ளிக்கூடம் கட்டுவதற்கு தானமாக அளித்த சம்பவம் நெகிழ்ச்சியை ஏற்படுத்தியுள்ளது.

ஈரோடு மாவட்டம் நல்லகவுண்டம்பாளையத்தை சேர்ந்தவர் பொன்மணி தேவி (வயது 85). இவர் ஈரோடு மாவட்டத்தில், கடந்த 1964-ஆம் ஆண்டு அரசு பள்ளியில் ஆசிரியராக பணியை துவங்கினார். 32 ஆண்டுகளாக ஆசிரியர் பணியிலிருந்த அவர், 1996-ஆம் ஆண்டு கோபிசெட்டிப்பாளையத்தில் உள்ள மொடச்சூர் அரசு பள்ளியின் தலைமை ஆசிரியராக பணியாற்றி ஓய்வு பெற்றார்.

பணியிலிருந்து ஓய்வுபெற்ற பின்னர் பின்தங்கிய குழந்தைகளின் நலனுக்காகவும், படிப்புக்காகவும் பல்வேறு உதவிகளை செய்துவந்தார் பொன்மணி தேவி. கடந்த 2006-ஆம் ஆண்டு, பிற்படுத்தப்பட்ட மாணவ, மாணவியருக்காக விடுதி கட்டுவதற்கு, தன்னுடைய 25 சென்ட் நிலத்தை பிற்படுத்தப்பட்டோர் நலத்துறைக்கு தானமாக வழங்கினார்.

அதேபோல், 2015-ஆம் ஆண்டு சித்தோடு பெண்கள் உயர்நிலைப் பள்ளியை, மேல்நிலை பள்ளியாக தரம் உயர்த்த ரூபாய் 2 லட்சத்தை நிதியாக வழங்கினார் பொன்மணி தேவி.

“நான் உயிருடன் இருக்கும் வரை இம்மாதிரியான நல்ல காரியங்களையே செய்ய வேண்டும்”, என கூறுகிறார் பொன்மணி தேவி.

Get Tamil News and latest news update from India and around the world. Stay updated with today's latest Tamilnadu news in Tamil.

×Close
×Close