Tamil Nadu news updates : அமித் ஷாவை கண்டு திமுக பயப்படுகிறது - அமைச்சர் பாண்டியராஜன்

இன்று (28ம் தேதி)  இரவு 10.45 மணிக்கு புறப்படும் சென்னை எழும்பூர் - சேலம் விரைவு ரயில் ரத்து.

நாளை (29ம் தேதி) இரவு 9.20 மணிக்கு புறப்படும் சேலம் - சென்னை எழும்பூர் விரைவு ரயில் ரத்து செய்யப்பட்டுள்ளதாக தெற்கு ரயில்வே சார்பில் தெரிவிக்கப்பட்டுள்ளது.

பதவி மற்றும் அதிகாரம் என்பது என்றும் நிலையானது கிடையாது. சபாநாயகரின் இன்றைய தீர்ப்பு சந்தர்ப்ப அரசியல்வாதிகளுக்கு ஒரு சம்மட்டி அடி, சபாநாயகரின் முடிவை நான் வரவேற்கிறேன் என்று கர்நாடக முன்னாள் முதல்வர் சித்தராமைய்யா, டுவிட்டர் பதிவில் தெரிவித்துள்ளார்.

காஞ்சிபுரத்தில் மதியம் 1 மணி வரை அத்திவரதரை 1.30 லட்சம் பக்தர்கள் தரிசனம் செய்துள்ளனர் . இன்று (ஜூலை 28ம் தேதி)  அத்திவரதரை தரிசிக்க வந்தபோது கூட்ட நெரிசலில் சிக்கி 33 பக்தர்கள் மயக்கமடைந்தனர் ஆகஸ்ட் 1 முதல் 20,000 பக்தர்களை நிறுத்தி வைத்து அத்திவரதரை தரிசிக்க அனுமதிக்க முடிவு செய்யப்பட்டுள்ளதாக காஞ்சிபுரம் கலெக்டர் பொன்னையா தெரிவித்துள்ளார்.

சென்னை வடபழனி போக்குவரத்து பணிமனையில் பேருந்து மோதியதில் சுவர் இடிந்து விழுந்து, பணிமனை ஊழியர்கள் 2 பேர் உயிரிழந்தனர். இந்த சம்பவம் தொடர்பாக, ஓட்டுனர் பாலமுருகன் கைது செய்யப்பட்டுள்ளார். பணியின்போது அஜாக்கிரதையாக பேருந்தை இயக்கி விபத்தை ஏற்படுத்தியதாக அவர் மீது வழக்கு பதிவு செய்யப்பட்டுள்ளது..

காஞ்சிபுரம் அத்திவரதரை தரிசிக்க சென்று கூட்ட நெரிசலில் சிக்கி 15 பக்தர்கள் மயக்கம் அடைந்ததால் அங்கு பரபரப்பு நிலவிவருகிறது. . அவர்கள்  சிகிச்சைக்காக மருத்துவமனையில் அனுமதிக்கப்பட்டுள்ளனர்.

கர்நாடகாவில், எம்எல்ஏக்கள் தகுதி நீக்க நிகழ்வு அடுத்தடுத்து அரங்கேறி வருவதால், அங்கு அர்சியல் பரபரப்பு நிலவி வருகிறது.  காங்கிரஸ் எம்எல்ஏ-க்கள் 11 பேர் மதசார்பற்ற ஜனதா தளம் கட்சியின் எம்எல்ஏக்கள் 3 பேர் என  14 எம்எல்ஏக்களை தகுதி நீக்கம் செய்து கர்நாடக சபாநாயகர் ரமேஷ்குமார் அதிரடி உத்தரவு பிறப்பித்துள்ளார்.

ஏற்கனவே, 3 பேர் தகுதி நீக்கம் செய்யப்பட்டுள்ள நிலையில் இன்று  தகுதி நீக்கம் செய்யப்பட்ட 17 பேரும் 2023 மே 15 வரை தேர்தலில் போட்டியிட முடியாது . நாளை பாஜக அரசு மீது நம்பிக்கை வாக்கெடுப்பு நடைபெற உள்ள நிலையில், சபாநாயகர் இந்த அதிரடி நடவடிக்கை எடுத்திருப்பது அரசியல் முக்கியத்துவம் பெறுகிறது.

புதிய கல்வி கொள்கையால் மாணவர்கள் மற்றும் ஆசிரியர்களும் தான் பாதிக்கப்படுவர். புதிய தேசிய கல்வி கொள்கை நடைமுறைக்கு வராமல் இருக்க எல்லா முயற்சியையும் மேற்கொள்வோம் என்று திமுக முன்னாள் மாநிலங்களவை உறுப்பினர் திருச்சி சிவா தெரிவித்துள்ளார்.

இந்தியாவின் வெள்ள பாதிப்பு ஏற்பட்டுள்ள வடகிழக்கு மாநிலங்கள் உள்ளிட்ட பகுதிகளுக்கு மத்திய அரசு போதுமான உதவிகளை வழங்க தயாராக இருப்பதாக, பிரதமர் மோடி, மான் கி பாத் நிகழ்ச்சியில் தெரிவித்துள்ளார்.

சந்திராயன் 2, ஒட்டுமொத்த இந்தியர்களின் வெற்றி. இதன் மூலம், அனுப்பப்பட்ட ரோவர் மற்றும் லேண்டர், நிலவின் மேற்பகுதியில் தரையிறங்கும் நாளுக்காக, ஆவலுடன் காத்திருப்பதாக பிரதமர் மோடி , மான் கி பாத் நிகழ்ச்சியில் தெரிவித்துள்ளார்.

புதிதாக நீர்க்கொள்கை வகுத்த மேகாலயா அரசுக்கும், குறைந்த தண்ணீரில் விவசாயம் செய்து சாதித்த ஹரியானா விவசாயிகளுக்கும் இந்த தருணத்தில் வாழ்த்து தெரிவித்துக்கொள்வதாக பிரதமர் மோடி மான் கி பாத் நிகழ்ச்சியில் தெரிவித்துள்ளார்.

இந்தியாவில் பல்வேறு திருவிழாக்கள் கொண்டாடப்பட்டு வருகின்றன. இந்த திருவிழாக்களில், நீர் பாதுகாப்பு குறித்த விசயத்தை நாம் ஏன் பேசுபொருளாக வைப்பதில்லை. நீர் பாதுகாப்பை, மக்களாகிய நாம் மக்களுக்கு வலியுறுத்துவதோடு மட்டுமல்லாது, அதை பின்பற்றவும் செய்யவேண்டும் என்று மான் கி பாத் நிகழ்ச்சியில், பிரதமர் மோடி தெரிவித்துள்ளார்.

சென்னை வடபழனி போக்குவரத்து பணிமனையில் பேருந்து மோதியதில் சுவர் இடிந்து விழுந்து, பணிமனை ஊழியர்கள் 2 பேர் உயிரிழந்துள்ளனர். 5 பேர் படுகாயம் அடைந்துள்ளனர். இவர்கள் சிகிச்சைக்காக மருத்துவமனைகளில் அனுமதிக்கப்பட்டுள்ளனர். 

வேலைநிறுத்தம் : வடபழனி பேருந்து நிலையத்தில் ஏற்பட்ட விபத்தில் 2 ஊழியர்கள் உயிரிழந்ததை தொடர்ந்து, பேருந்துகள் தரமாக இல்லை என எதிர்ப்பு தெரிவித்து, பணிமனை ஓட்டுனர்கள் வேலைநிறுத்தத்தில் ஈடுபட்டுள்ளனர்.

பிரதமர் நரேந்திர மோடி, மனதின் குரல் ( மான் கி பாத்) என்ற நிகழ்ச்சியின் மூலம், மாதந்தோறும் கடைசி ஞாயிற்றுக்கிழமை, ரேடியோவின் மூலம் மக்களுடன் பேசிவருகிறார். அந்த வகையில், இன்று அந்த நிகழ்ச்சி ஒலிபரப்பப்படுகிறது. 

காஞ்சிபுரத்தில் அத்திவரதர் இன்று( ஜூலை 28) இளம் நீல நிற பட்டாடையில் காட்சியளிக்கிறார். 27 ஆம் நாளான நேற்று அத்திவரதரை சுமார் 2.30 லட்சம் பக்தர்கள் தரிசனம் செய்தனர். விடுமுறை நாளான இன்று சுவாமியை தரிசனம் செய்ய அதிகாலை முதலே பக்தர்கள் கூட்டம் அலைமோதுகிறது. 

சென்னையில் பெட்ரோல், நேற்றைய விலையில் இருந்து 10 காசுகள் குறைந்து ஒரு லிட்டர் ரூ.75.96 ஆகவும், டீசல், நேற்றைய விலையில் மாற்றமின்றி ஒரு லிட்டர் ரூ.69.90 காசுகளாகவும் உள்ளது.