News Highlights: தூத்துக்குடி, நெல்லையில் இன்று ராகுல்காந்தி சுற்றுப்பயணம்

அதிமுக கூட்டணியில் இருந்து விலகி விட்டதாக சமத்துவ மக்கள் கட்சி தலைவர் சரத்குமார் அறிவித்துள்ளார்.

10.5% உள்ஒதுக்கீடு ராமதாஸுக்கு கிடைத்த இடைக்கால வெற்றி முதலமைச்சர் பழனிசாமிக்கு மனமார்ந்த நன்றி என தெரிவித்துள்ள பாமக தலைவர் ஜி.கே.மணி கூட்டணி குறித்து நாளை ராமதாஸ் அறிவிப்பார் என்றும் தெரிவித்துள்ளார்.

இந்திய கிரிக்கெட் வீரர் யூசப் பதான் சர்வதேச கிரிக்கெட் போட்டிகளில் இருந்து ஓய்வு பெறுவதாக அறிவித்துள்ளார். இந்திய அணிக்காக 57 ஒருநாள் போட்டிகளிலும், 22 டி20 போட்டிகளிலும், 174 ஐபிஎல் போட்டிகளிலும் விளையாடியுள்ளார்.

சினிமாவில் 11 ஆண்டுகள் நிறைவு செய்த சமந்தா இயக்குநர் கெளதம் மேனனுக்கு நெகிழ்ச்சியுடன் நன்றி தெரிவித்துள்ளார். கவுதம் மேனன் இயக்கத்தில் வெளியான விண்னைத்தாண்டி வருவாயா தமிழ் படத்தில் 2-வது நாயகியாக நடித்த சமந்தா, தெலுங்கில் நாயகியாக நடித்தது குறிப்பிடத்தக்கது.

கா.பெ ரணசிங்கம் படத்திற்காக விருது பெற்ற நடிகை ஐஸ்வர்யா ராஜேஷ், இந்த படம் குறித்து கூறுகையில், இந்த "பாதிக்கப்பட்டவர்களின் உணர்ச்சிகளை உள்வாங்கி நடித்தேன் என தெரிவித்துள்ளார். 

தமிழகம், கேரளா, புதுவைக்கு ஏப்ரல் 6-ம் தேதி தேர்தல்

கல்வி மற்றும் வேலைவாய்ப்பில் 10.5% உள் ஒதுக்கீடு 6 மாதங்களில் ஜாதி வாரி கணக்கெடுப்பு நடத்தி முடிக்கப்படும் என்றும் அப்போது இட ஒதுக்கீடு மாற்றி அமைக்கப்படும் என்று முதல்வர் தெரிவித்துள்ளார்.

மிகவும் பிற்படுத்தப்பட்டோருக்கான 20% இடஒதுக்கீடு 3 ஆக பிரித்து உள் இடஒதுக்கீடு வழங்கப்படுகிறது. 

மிகவும் பிற்படுத்தப்பட்ட தொகுப்பில் உள்ள வன்னியர்களுக்கு 10.5 சதவீதம் உள் இடஒதுக்கீடு வழங்க இந்த சட்டம் மூலம் வழிவகை செய்யப்பட்டுள்ளது. சீர்மரபினருக்கு 7 சதவீதம் உள் ஒதுக்கீடு செய்யப்பட்டுள்ளது. எஞ்சிய பிரிவினருக்கு 2.5% ஒதுக்கீடு செய்யப்பட்டுள்ளது.

வன்னியர்களுக்கு உள் இடஒதுக்கீடு மசோதா இன்று சட்டப்பேரவையில் நிறைவேற்றப்பட்டது. கல்வி வேலை வாய்ப்பில் வன்னியர்களுக்கு 10.5 சதவீதம் உள் இடஒதுக்கீடு வழங்க இந்த சட்டம் மூலம் வழிவகை செய்யப்பட்டுள்ளது. 

மிகவும் பிற்படுத்தப்பட்டோர் தொகுப்பில் உள்ள வன்னியர்களூக்கு உள் இடஒதுக்கீடு தொடர்பான மசோதா சட்டப்பேரவையில் தாக்கல் செய்யப்படுகிறது.

தலைமைச் செயலகத்தில் செய்தியாளர்களைச் சந்தித்த முதல்வர் பழனிசாமி, “உலக வங்கியின் விதிகளுக்கு உட்பட்டே இ-டெண்டர் முறாஇ அமல்படுத்தப்படுகிறது. இ-டெண்டர் முறையில் ஊழல் என்ற பேச்சுக்கே இடமில்லை” என்று கூறினார். 

தலைமைச் செயலகத்தில் செய்தியாளர்களைச் சந்தித்த முதல்வர் பழனிசாமி, “ஆட்சியைக் கவிழ்க்க எதிர்க்கட்சிகள் சதி செய்தனர். இடைத்தேர்தலில் கணிசமான தொகுதிகளில் வெற்றிபெற்று ஆட்சியை தக்கவைத்தோம். கொரோனா தடுப்பு நடவடிக்கைகளில் சிறப்பாக செயல்பட்டோம்.” என்று கூறினார்.

புயல், மழை, வறட்சியால் பாதிக்கப்பட்ட விவசாயிகள் கோரிக்கையை ஏற்று பயிர்க்கடனும் தள்ளுபடி செய்யப்பட்டுள்ள நிலையில், மக்களின் கோரிக்கைகள் ஒவ்வொன்றாக நிறைவேற்றப்பட்டு வருகிறது என்று முதல்வர் பழனிசாமி தெரிவித்துள்ளார்.

தலைமைச் செயலகத்தில் செய்தியாளர்களைச் சந்தித்த முதல்வர் பழனிசாமி, “அனைத்து மாநிலங்களும் கடன் வாங்கிதான் நிர்வாகத்தை நடத்துகின்றன. எந்த மாநிலமும் கையில் பணத்தை வைத்துக்கொண்டு திட்டங்களை அறிவிப்பதில்லை. வளர்ச்சித் திட்டங்களுக்கு கடன் வாங்க வேண்டிய அவசியம் இருப்பதால் கடன் வாங்கப்படுகிறது. எந்த திட்டத்தை அறிவித்தாலும் அதை அரசே நிறைவேற்றும் என்பதை உறுதி செய்துள்ளோம்” என்று கூறினார்.

தமிழகத்தில் பின்பற்றப்படும் 69% இடஒதுக்கீடு முறைக்கு தடைவிதிக்க உச்சநீதிமன்றம் மறுப்பு தெரிவித்துள்ளது. பின்தங்கிய பிரிவினரை முன்னேற்றவே 69% இடஒதுக்கீடு பின்பற்றப்படுவதாக ஏற்கனவே தமிழக அரசு உச்ச நீதிமன்றத்தில் பதில் மனு தாக்கல் செய்துள்ளது.

தமிழகத்தில் ஏற்கனவே பின்தங்கிய பிரிவினரை முன்னேற்றவே 69% இடஒதுக்கீடு பின்பற்றப்படுவதாக  தமிழக அரசு பதில் மனு தாக்கல் செய்திருந்த நிலையில், தமிழகத்தில் பின்பற்றப்படும் 69% இடஒதுக்கீடு முறைக்கு தடைவிதிக்க உச்சநீதிமன்றம் மறுப்பு தெரிவித்துள்ளது.

இந்திய கம்யூனிஸ்ட் கட்சியின் மூத்த தலைவர் தா.பாண்டியன் மறைவுக்கு முதல்வர் பழனிசாமி ஆழ்ந்த இரங்கல் தெரிவித்துள்ளார்.

முதல்வர் பழனிசாமி தனது ட்விட்டர் பக்கத்தில் குறிப்பிடுகையில், “முன்னாள் நாடாளுமன்ற உறுப்பினரும் இந்திய கம்யூனிஸ்ட் கட்சியின் மூத்த தலைவருமான சகோதரர் தா.பாண்டியன் காலமான செய்தியறிந்து அறிந்து மிகுந்த வேதனையடைந்தேன். அவரது குடும்பத்தாருக்கும், கட்சியினருக்கும் ஆழ்ந்த இரங்கலை தெரிவித்து அன்னாரது ஆன்மா சாந்தியடைய பிரார்த்திக்கிறேன்.” என்று தெரிவித்துள்ளார்.

முன்னாள் நாடாளுமன்ற உறுப்பினரும் இந்திய கம்யூனிஸ்ட் கட்சியின் மூத்த தலைவருமான சகோதரர் திரு.தா.பாண்டியன் அவர்கள் காலமான செய்தியறிந்து அறிந்து மிகுந்த வேதனையடைந்தேன். அவரது குடும்பத்தாருக்கும், கட்சியினருக்கும் ஆழ்ந்த இரங்கலை தெரிவித்து அன்னாரது ஆன்மா சாந்தியடைய பிரார்த்திக்கிறேன். pic.twitter.com/WyjHAD92TC

— Edappadi K Palaniswami (@CMOTamilNadu) February 26, 2021

தேர்தல் தேதி இன்று மாலை அறிவிக்கப்பட உள்ளதால், சட்டப்பேரவை கூட்டத்தொடரை இன்றே முடிக்க திட்டமிட்டுள்ளதாகத் தகவல் வெளியாகி உள்ளது.

அற்புதம்மாள் தனது ட்விட்டர் பக்கத்தில் குறிப்பிடுகையில், “அய்யா த.பா அவர்களின் மறைவு பெரும் வேதனைதருகிறது. ராஜீவ் காந்தீன் அன்றைய பொதுக்கூட்டத்தில் மொழிபெயர்ப்பாளராக உடனிருந்தவர். கடுங்காயமுற்றவர். அரசுதரப்பு சாட்சியாளர். உலகமே கேட்குமாறு 'அறிவு நிரபராதி' என ஆணித்தரமாக அவர் கூறியது உள்ளபடியே எங்களுக்கு பெரும் ஆறுதலை தந்தது.” என்று அற்புதம்மாள் இரங்கல் தெரிவித்துள்ளார்.

அய்யா த.பா. அவர்களின் மறைவு பெரும் வேதனைதருகிறது. ராஜிவ்காந்தி அவர்களின் அன்றைய பொதுக்கூட்டத்தில் மொழிபெயர்ப்பாளராக உடனிருந்தவர். கடுங்காயமுற்றவர். அரசுதரப்பு சாட்சியாளர். உலகமே கேட்குமாறு 'அறிவு நிரபராதி' என ஆணித்தரமாக அவர் கூறியது உள்ளபடியே எங்களுக்கு பெரும் ஆறுதலை தந்தது.. pic.twitter.com/adB4fltKix

— Arputham Ammal (@ArputhamAmmal) February 26, 2021

தா.பாண்டியன் மறைவுக்கு மதிமுக பொதுச்செயலாளரும் மாநிலங்களவை உறுப்பினருமான வைகோ ஆழ்ந்த இரங்கல் தெரிவித்துள்ளார்.

வைகோ வெளியிட்டுள்ள இரங்கல் செய்தியில், “தம் வாழ்நாள் முழுவதும் பொதுவுடைமைக்  கொள்கைக்காகப் பாடுபட்டு வந்த தா.பாண்டியன் தம் முச்சை நிறுத்திக்கொண்டார். தா.பாண்டியன் தமிழ்நாட்டு அரசியல் மேடைகளில் தன்னிகரற்ற சொற்பொழிவாளர். ஆற்றொழுக்குபோல தங்கு தடையின்றி தமது கருத்துகளை எடுத்து உரைப்பவர். மிகச் சிறந்த எழுத்தாளர், இலக்கியவாதி எண்ணற்ற கட்டுரைகள், நூல்களை எழுதியவர். நாடாளுமன்றத்தில் தமது வாதங்களைத் திறம்பட எடுத்து உரைப்பவர். தா.பா-வின் மறைவு பொதுவுடைமை இயக்கத்திற்கும் தமிழ்நட்டின் பொது வாழ்விற்கும் ஈடு செய்யமுடியாத இழப்பு. தா.பா மறைவால் வேதனையில் தவிக்கும் இந்திய கம்யூனிஸ்ட் கட்சியினருக்கும் உற்றார் உறவினர்களுக்கும்  ஆழ்ந்த இரங்கலைத் தெரிவித்துக்கொள்கிறேன்” என்று குறிப்பிட்டுள்ளார்.

விசிக தலைவர் திருமாவளவன், இந்திய கம்யூனிஸ்ட் கட்சியின் மூத்த தலைவர் தோழர் தா.பா அவர்களின் மறைவு மிகுந்த வேதனையளிக்கிறது என்று தெரிவித்துள்ளார். மேலும்,  “அவரது மறைவு  ஒட்டுமொத்த உழைக்கும் வர்க்கத்திற்கும் நேர்ந்த பேரிழப்பாகும். ஈழத் தமிழர்களின் நலன்களில் அக்கறையோடு பணியாற்றியவர். முற்போக்கு சிந்தாந்த தளத்தில் அவரது பங்களிப்பு மகத்தானது. அவருக்கு எமது வீரவணக்கம்.” என்று திருமாவளவன் தெரிவித்துள்ளார்.

தோழர் தா.பா அவர்களின் மறைவு மிகுந்த வேதனை யளிக்கிறது.

அவரது மறைவு ஒட்டுமொத்த உழைக்கும் வர்க்கத்திற்கும் நேர்ந்த பேரிழப்பாகும்.

ஈழத் தமிழர்களின் நலன்களில் அக்கறையோடு பணியாற்றியவர்.

முற்போக்கு சிந்தாந்த தளத்தில் அவரது பங்களிப்பு மகத்தானது.

அவருக்கு எமது #வீரவணக்கம்.#CPI pic.twitter.com/B7SxH3HNxL

— Thol. Thirumavalavan (@thirumaofficial) February 26, 2021

தா.பாண்டியன் மறைவு பொதுவுடைமைக் கொள்கையில் நம்பிக்கையுள்ள அனைவருக்கும் பேரிழப்பு என்று திமுக தலைவர் மு.க.ஸ்டாலின் இரங்கல் தெரிவித்துள்ளார். மேலும், உங்கள் தொகுதியில் ஸ்டாலின் நிகழ்ச்சியில் தா.பாண்டியன் மறைவுக்கு அஞ்சலி செலுத்தினார்.

இது குறித்து மு.க.ஸ்டாலின் தனது ட்விட்டர் பக்கத்தில், “பொதுவுடைமைப் போராளி - ஒடுக்கப்பட்டோரின் போர்க்குரல் - பண்பாளர் - தமிழ் மண்ணை அடிமையாக விடமாட்டோம் என சிம்மக்குரல் எழுப்பிய தா.பாண்டியன் மறைவு பொதுவுடைமைக் கொள்கையில் நம்பிக்கையுள்ள அனைவருக்கும் பேரிழப்பு” என்று தெரிவித்துள்ளார். மேலும், உங்கள்தொகுதியில் ஸ்டாலின் நிகழ்வில் அஞ்சலி செலுத்தினோம். ஆழ்ந்த இரங்கல்!” என்று குறிப்பிட்டுள்ளார்.

இந்திய கம்யூனிஸ்ட் கட்சியின் மூத்த தலைவர் தா.பாண்டியன் மறைவுக்கு தமிழக ஆளுநர் பன்வாரிலால் புரோகித் இரங்கல் தெரிவித்துள்ளார்.

தா.பாண்டியனின் மறைவு தமிழகம் மற்றும் இந்திய கம்யூனிஸ்ட் கட்சிக்கு ஈடு செய்ய முடியாத இழப்பு என்று ஆளுநர் பன்வாரிலால் புரோகித் தெரிவித்துள்ளார்.

புதுச்சேரியில் பெட்ரோல், டீசல் மீதான வாட் வரியை 2% குறைத்து  துணை நிலை ஆளுநர் தமிழிசை சௌந்தரராஜன் உத்தரவிட்டுள்ளார். வாட் வரி குறைப்பால் பெட்ரோல், டீசல் விலை லிட்டருக்கு ரூ1.40 குறைய வாய்ப்பு ஏற்பட்டுள்ளது.

காங்கிரஸ் தலைவர் ராகுல் காந்தி திருக்குறளை வாசித்து வருவதாக ட்வீட் செய்துள்ளார். திருக்குறளின் கருத்தாழம் என்னை வியப்பில் ஆழ்த்தியது என்று தெரிவித்துள்ளார்.

Have been reading "Tirukkural”. Am stunned by its depth.

Listening

Through your ears to hear, to listen and to understand.

Is to make gold of grain and golden grain of sand.

— Rahul Gandhi (@RahulGandhi) February 26, 2021

தலைமைச் செயலகத்தில், இன்று மதியம் 2:30 மணிக்கு செய்தியாளர்களை சந்திக்கிறார் முதல்வர் எடப்பாடி பழனிசாமி

மகளிர் சுய உதவிக் குழுவினர், கூட்டுறவு வங்கிகளில் பெற்ற கடனும் தள்ளுபடி செய்யப்படும் என என 110 விதியின் கீழ் சட்டப்பேரவையில்  முதல்வர் அறிவித்துள்ளார். 

தமிழகம் உள்ளிட்ட 5 மாநிலங்களின் தேர்தல் தேதி குறித்து அறிவிப்பு இன்று வெளியாக வாய்ப்பு இருப்பதாக தகவல் வெளியாகியுள்ளது. இந்திய தலைமை தேர்தல் ஆணையம் இன்று மாலை 4.30 மணிக்கு செய்தியாளர் சந்திக்கின்றனர். 

கூட்டுறவு வங்கிகளில் விவசாயிகள் வாங்கிய 6 சவரன் வரையிலான நகைக் கடன்கள் தள்ளுபடி  செய்யப்படுவதாக முதல்வர் பழனிசாமி அறிவித்துள்ளார். தமிழக சட்டப்பேரவையில் 110 விதியின் கீழ் முதலமைச்சர் பழனிசாமி அறிவிப்பை வெளியிட்டுள்ளார். 

இந்திய கம்யூனிஸ்ட் கட்சியின் மூத்த தலைவரும், முன்னாள் நாடாளுமன்ற உறுப்பினருமான தா.பாண்டியன்  காலமானார். அவருக்கு வயது 88. சிறுநீரக தொற்று, குறைந்த ரத்த அழுத்தம் காரணமாக அரசு மருத்துவமனையில்  சிகிச்சை பெற்று வந்த நிலையில் இன்று காலமானர். 

”பாலகோட் தாக்குதலை முறியடித்த இந்திய விமானப்படை வீர‌ர்களின் செயல் போற்றத்தக்கது .பாலகோட் தாக்குதலின் வெற்றி, பயங்கரவாத‌த்திற்கு எதிரான இந்தியாவின் பலத்தை நிரூபித்துள்ளது ” என மத்திய அமைச்சர் ராஜ்நாத் சிங் ட்வீட் செய்துள்ளார். இன்றுடன், பாலகோட் தாக்குதல் நடைபெற்று ஒரு ஆண்டு நிறைவடைந்த நிலையில் ராஜ்நாத் சிங் அதனை நினைவு கூர்ந்துள்ளார். 

பிரசாரத்தின் போது அருந்ததியர் வகுப்பைச் சேர்ந்த அந்தியூர் செல்வராஜ் எம்.பியை தனியாக உட்கார வைத்ததாக, திமுக தலைவர் மு.க.ஸ்டாலினுக்கு எதிராக தேசிய தாழ்த்தப்பட்டோர் ஆணையத்தில் புகார் அளிக்கப்பட்டுள்ளது. 

சிவகாசி, காளையார் குறிச்சியில் பட்டாசு ஆலையில் நடந்த வெடி விபத்தில் சிக்கி, பலியானவர்களின் எண்ணிக்கை 6 ஆக உயர்ந்துள்ளது. மேலும் காயமடைந்த 19 பேர் சிகிச்சைப் பெற்று வருகின்றனர்.

சென்னை மின்வாரிய கேங்மேன் பணி நியமன முறைக்கேட்டை கண்டித்து முதலமைச்சர்  எடப்பாடி இல்லம் முன்பு 50-க்கும் மேற்பட்டோர் போராட்டத்தில் ஈடுப்பட்டதால் பரபரப்பு ஏற்பட்டது. போராட்டத்தில் ஈடுப்பட்டவர்கள் கைது செய்யப்பட்டனர். 

+2 பொதுத் தேர்வை எழுத விரும்பும் தனித் தேர்வர்கள் நாளை முதல் மார்ச் 6-ம் தேதி வரை விண்ணப்பிக்கலாம் என்று தமிழ்நாடு தேர்வாணையம் அறிவித்துள்ளது. 

சேலம் மாவட்டத்தில் ரூ.565 கோடி செலவில், மேட்டூர் அணை உபரி நீரை 100 வறண்ட ஏரிகளில் நிரப்பும் திட்டத்தை முதல்வர் பழனிசாமி தொடங்கி வைத்தார்.