வேளாண் மசோதாக்களுக்கு ஒப்புதல் வழங்காதீர்: ஜனாதிபதியிடம் எதிர்க்கட்சிகள் கோரிக்கை

மத்திய ரயில்வே இணை அமைச்சர் சுரேஷ் அங்காடிக்கு கொரோனா வைரஸ் பாதிக்கப்பட்டதையடுத்து, அவர் டெல்லி எய்ம்ஸ் மருத்துவமனையில் சிகிச்சை பெற்று வந்த நிலையில், அவர் இன்று சிகிச்சை பலனின்றி உயிரிழந்தார். அவருக்கு வயது 65.

நாடாளுமன்ற மக்களவை காலவரையின்றி ஒத்திவைக்கப்படுகிறது என மக்களவை சபாநாயகர் ஓம் பிர்லா அறிவித்துள்ளார். காலையில் ஏற்கனவே மாநிலங்களவை ஒத்திவைக்கப்பட்ட நிலையில், மக்களவையும் ஒத்திவைக்கப்பட்டுள்ளது. அக்டோபர் 1ம் தேதி வரை நடைபெறுவதாக அறிவிக்கப்பட்ட மழைக்கால கூட்டத் தொடர் இன்றுடன் நிறைவடைந்ததாக அறிவிக்கப்பட்டுள்ளது.

திமுக அமைப்புச் செயலாளர் ஆர்.எஸ்.பாரதிக்கு கொரோனா தொற்று உறுதி செய்யப்பட்டுள்ளது. இதையடுத்து அவர், சென்னை ஆதம்பாக்கத்தில் உள்ள தனியார் மருத்துவமனையில் சிகிச்சைக்காக அனுமதிக்கப்பட்டுள்ளார்.

தலைமை செயலக ஊழியர்களுக்கு சனிக்கிழமை விடுமுறை அளிக்க வேண்டும் என தலைமை செயலக ஊழியர்கள் சங்கத்தினர் முதலமைச்சருக்கு வலியுறுத்தியுள்ளனர்.

கால்நடைத் துறை அமைச்சர் உடுமலை ராதாகிருஷ்ணன்: கால்0நடை மருத்துவ படிப்புகளுக்கு விண்ணப்பிக்க அக்டோபர் 10ம் தேதி வரை அவகாசம் நீட்டிக்கப்பட்டுள்ளது. கால்நடை மருத்துவ படிப்புகளில் சேர இதுவரை 12,009 பேர் விண்ணப்பித்துள்ளனர் என்று தெரிவித்துள்ளார்.

வேளாண் மசோதாக்களுக்கு ஒப்புதல் வழங்க கூடாது என எதிர்க்கட்சிகள் சார்பில் காங்கிரஸ் தலைவர் குலாம் நபி ஆசாத் தலைமையில், குடியரசுத் தலைவர் ராம்நாத் கோவிந்தை சந்தித்து கோரிக்கை மனு அளித்தனர். வேளாண் மசோதா குறித்த எங்களின் கருத்தை குடியரசுத் தலைவரிடம் கூறினோம் என்று குலாம் நபி ஆசாத் கூறினார்.

பிரதமர் மோடி 7 மாநில முதல்வர்களுடன் கொரோனா வைரஸ் தடுப்பு பணியை தீவிரப்படுத்துவது குறித்து காணொளி வழியாக ஆலோசனை நடத்தி வருகிறார். இந்த ஆலோசனைக் கூட்டத்தில் கொரோனா பாதிப்பு அதிகம் உள்ள மாநிலங்களின் முதல்வர்கள் பங்கேற்றுள்ளனர். இந்த ஆலோசனைக் கூட்டத்தில் தமிழக முதல்வர் பழனிசாமி, கொரோனா தடுப்பு பணிக்காக ஏற்கனவே தமிழகம் கோரியிருந்த நிதியை விடுவிக்க வலியுறுத்துவார் என தகவல் வெளியாகி உள்ளது.

சென்னை உயர் நீதிமன்றத்துக்கு புதிதாக 10 நீதிபதிகள் நியமனம் செய்யப்பட்டுள்ளனர். நீதிபதிகள் சந்திர சேகரன், நக்கீரன், சிவஞானம் வீராசாமி, இளங்கோவன் கணேசன், ஆனந்தி சுப்பிரமணியம், நீதிபதிகள் கண்ணம்மாள் சண்முக சுந்தரம், சாந்திகுமார், முரளி சங்கர், மஞ்சுளா ராமராஜு, தமிழ்செல்வி ஆகிய 10 நீதிபதிகளின் பெயர்கஊக்கு உச்ச நீதிமன்ற கொலீஜியம் ஒப்புதல் அளித்துள்ளது.

நீட் தேர்வை கடந்த 13ஆம் தேதி நாடு முழுவதும் 15 லட்சம் மாணவர்கள் எழுதினார்கள். தேர்வு முடிவு வெளியாகும் தேதி தொடர்பாக தேசிய தேர்வு முகமை தெரிவிக்கையில், தேர்வு முடிவு தயாரிக்கக்கூடிய பணிகள் மும்முரமாக நடந்து வருவதாகவும், ஒரு வாரத்திற்குப் பிறகு தேர்வு முடிவு வெளியாகும் தேதி அறிவிக்கப்படும் என்றும் தெரிவித்துள்ளது . இந்த மாதம் கடைசியில் அல்லது அக்டோபர் முதல் வாரத்தில் தேர்வு முடிவுகள் வெளியாகும் என எதிர்பார்க்கப்படுகிறது.

தொகுதி மேம்பாட்டு நிதியை பயன்படுத்துவதற்கு அனுமதி மறுத்த கரூர் ஆட்சியர் பிறப்பித்த உத்தரவை எதிர்த்து, திமுக எம்.எல்.ஏ. செந்தில்பாலாஜி தொடர்ந்த வழக்கில், தொகுதி மேம்பாட்டு நிதியை பயன்படுத்துவதற்கு அனுமதி மறுத்த கரூர் ஆட்சியர் உத்தரவை சென்னை உயர்நீதிமன்றம் ரத்து செய்து உத்தரவிட்டுள்ளது.

தூத்துக்குடி தட்டார்மடம் வியாபாரி செல்வன் கொலை வழக்கில், காவல் ஆய்வாளர் ஹரிகிருஷ்ணன், திருமணவேல் உள்ளிட்ட 6 பேர் மீது 4 பிரிவுகளின் கீழ் சிபிசிஐடி வழக்குப்பதிவு செய்துள்ளனர்.

மொழி சம்பந்தப்பட்ட பிரச்சனை நாடெங்கிலும் உள்ளன. அந்த வரிசையில் குஜராத் மாநிலம் அஹமதாபாத்தில் செயல்பட்டு வந்த தமிழ் மேல்நிலைப் பள்ளி திடீரென்று மூடப்பட்டது. இந்த செயலுக்கு எதிர்ப்பு தெரிவித்து அங்கு வசித்து வரும் தமிழர்கள் போராட்டத்தில் ஈடுபட்டனர். இதனைத் தொடர்ந்து மூடப்பட்ட தமிழ்ப் பள்ளியைத் திறக்க வேண்டும் எனப் பாட்டாளி மக்கள் கட்சி நிறுவனர் ராமதாஸ் வலியுறுத்தியுள்ளார்.

TIME இதழ் வெளியிட்ட உலகின் செல்வாக்கு மிகுந்த 100 பேரின் பட்டியலில், இந்தியாவிலிருந்து பிரதமர் மோடி, பாலிவுட் நடிகர் ஆயுஷ்மான் குரானா, கூகுள் கூகுள் சிஇஓ சுந்தர் பிச்சை உள்ளிட்டோரின் பெயர்கள் இடம்பெற்றுள்ளன.

சட்டமன்றத்துக்கு குட்கா கொண்டு வந்த விவகாரத்தில் உரிமை மீறல் நோட்டீசை எதிர்த்த வழக்கில் ஸ்டாலின் உள்பட 18 எம்.எல்.ஏ.க்கள் மனு மீது நாளை இடைக்கால உத்தரவு பிறப்பிக்கப்படும் என சென்னை உயர் நீதிமன்றம் அறிவிப்பு

கலாச்சார குழுவில் தமிழருக்கு இடம் வேண்டும் என்று பிரதமர் மோடிக்கு கடிதம் மூலம் முதலமைச்சர் பழனிசாமி வேண்டுகோள் விடுத்துள்ளார். மேலும், `தமிழர் கலாச்சாரமும், தமிழ் மொழியும் இல்லாவிட்டால் இந்திய வரலாறு முழுமையடையாது. கீழடி ஆய்வு குறித்து, கடந்த ஆண்டு மகாபலிபுரம் வந்த போது வரலாற்று சிறப்பு வாய்ந்த சின்னங்களை பார்வையிட்டதை கடிதத்தில் நினைவுகூர்ந்த முதல்வர், ``கலாச்சார ஆய்வுக் குழுவில் தமிழர்களையும் இடம்பெறச் செய்ய, 16 பேர் கொண்ட குழுவை மாற்றி அமைக்க மத்திய கலாச்சார துறைக்கு அறிவுறுத்துமாறு' மோடிக்கு வேண்டுகோள் விடுத்துள்ளார்.

மத்திய அரசின் சட்டங்களைப் பற்றி ஆராய்ந்து கருத்துகளைச் சொல்ல விவசாயியாக இருக்க வேண்டுமென்ற அவசியமில்லை. வேளாண்மை குறித்த அடிப்படை அறிவும், விவசாயிகள் மீது அக்கரையும் இருந்தாலே போதும் என திமுக தலைவர் மு.க.ஸ்டாலின் தெரிவித்துள்ளார். 

தமிழக ஆளுநர் பன்வாரிலால் புரோஹித்துடன் பாஜக மாநில தலைவர் எல்.முருகன் திடீர் சந்திப்பு. ஆளுநர் மாளிகையில் நடந்துவரும் சந்திப்பால் பரபரப்பு ஏற்பட்டுள்ளது. 

சிறுமிக்கு பாலியல் தொல்லை கொடுத்த வழக்கில் ஜாமீன் கோரி நாகர்கோவில் அதிமுக முன்னாள் எம்எல்ஏ நாஞ்சில் முருகேசன் வழக்கு. அரசு தரப்பில் எதிர்ப்பு தெரிவித்ததால் வழக்கு விசாரணை ஒத்திவைக்கப்பட்டது. 

அண்ணா பல்கலைக்கழகத்தின் பெயரை மாற்ற எதிர்ப்பு தெரிவித்து முன்னாள் துணைவேந்தர்கள் ஆளுநரிடம் கடிதம் மூலம் வலியுறுத்தல்.

குஜராத் மாநிலம் அகமதாபாத் மணி நகரில் உள்ள தமிழ் பள்ளி மூடப்படுவதாக அறிவிக்கப்பட்டுள்ளது. தமிழ் பள்ளி மூடப்படுவதற்கு அங்கு வசிக்கும் தமிழர்கள் எதிர்ப்பு தெரிவித்து வருகின்றனர். தமிழ் வழியில் படித்த மாணவர்களின் எதிர்காலம் கேள்விக்குறியாகி விடும் என பெற்றோர்கள் வேதனை!

தங்கம் விலை சவரனுக்கு மேலும் ரூ.320 குறைந்தது. ஒரு சவரன் தங்கம் ரூ.38,480க்கு விற்பனை செய்யப்படுகிறது. ஒரு கிராம் தங்கம் ரூ.4,810-க்கு விற்பனையாகிறது. கடந்த 3 நாட்களில் மட்டும் சவரனுக்கு ரூ.992 குறைந்ததால், நகை வாங்குவோர் மகிழ்ச்சியடைந்துள்ளனர். 

இயற்கையாக சேமிக்கும் முறை என்பதால், தரைதளத்தொட்டியில் சேமிக்கும் நீர் குளிர் காலங்களில் சூடாகவும், கோடைகாலங்களில் குளிர்ச்சியாகவும் இருக்கும். செலவும் குறைவு, பராமரிப்பதும் எளிது.

மறுபடியும் இணைவோம், மகத்தான சாதனை புரிவோம். மழைநீரை சேமித்து வளமாக வாழ்வோம்.#மழைநீர்சேமிப்போம் pic.twitter.com/oFcSvIN4eK

— SP Velumani (@SPVelumanicbe) September 23, 2020

மாநிலங்களவையை இன்றோடு காலவரையின்றி ஒத்திவைக்க அரசு பரிந்துரைத்துள்ளதாக நாடாளுமன்ற விவகாரத்துறை இணை அமைச்சர் முரளிதரன் தெரிவித்துள்ளார். 

மாநிலங்களவையை இன்றோடு காலவரையின்றி ஒத்திவைக்க அரசு பரிந்துரைத்துள்ளதாக நாடாளுமன்ற விவகாரத்துறை இணை அமைச்சர் முரளிதரன் தெரிவித்துள்ளார். 

புதிய கல்விக் கொள்கை தொடர்பாக நாளை கருத்து கேட்கப்படுகிறது. பெற்றோர், மாணவர்கள், ஆசிரியர்கள் , கல்லூரி நிர்வாகத்தினர் இதில் பங்கேற்கலாம். ஆன்லைன் வழியில் கருத்துக்களை கேட்கிறது தமிழக உயர்கல்வித்துறை

இந்தியாவில் கொரோனாவால் உயிரிழந்தவர்கள் எண்ணிக்கை 90 ஆயிரத்தை தாண்டியது!

திமுக எம்.பி. கதிர் ஆனந்தை மிரட்டியது யார் என டெல்லி சாணக்கியபுரி போலீசார் விசாரணையை தொடங்கினர்.  உளவுத்துறையினர் எனக் கூறி தமிழ்நாடு இல்லத்துக்கு வந்து தன்னை சிலர் மிரட்டியதாக குற்றஞ்சாட்டியிருந்தார் கதிர் ஆனந்த். 

உலகளவில் கொரோனாவால் பாதிக்கப்பட்டோர் எண்ணிக்கை 3.17 கோடியாக உயர்ந்துள்ளது. குணமடைந்தோர் எண்ணிக்கை 2.33 கோடியாகவும், தொற்றால் உயிரிழந்தோர் எண்ணிக்கை 9.74 லட்சமாகவும் அதிகரித்துள்ளது.