பைக்கை இடித்த எஸ்.ஐ கார் - நியாயம் கேட்ட நபரை காரை விட்டு ஏற்றி 200 மீட்டர் தூரத்திற்கு இழுத்துச் சென்ற எஸ்.ஐ

நேற்று இரவு திருநெல்வேலி டவுன் பகுதியில் நடந்த ஒரு சம்பவத்தில், நியாயம் கேட்ட இளைஞரை ஒரு சிறப்பு உதவி ஆய்வாளர் (எஸ்.ஐ.) தனது காரில் 200 மீட்டருக்கும் மேல் இழுத்துச் சென்றது பெரும் பரபரப்பை ஏற்படுத்தியுள்ளது. இந்தச் சம்பவம் அப்பகுதியில் உள்ள மக்களை அதிர்ச்சியில் ஆழ்த்தியுள்ளது.

நேற்று இரவு, டவுன் பகுதியில் ஒரு அரசுப் பேருந்து முன்னே சென்று கொண்டிருந்தது. அதற்குப் பின்னால் வந்த இருசக்கர வாகனம் ஒன்று திடீரென பிரேக் பிடித்தது. அப்போது, இருசக்கர வாகனத்திற்குப் பின்னால் வந்த சிறப்பு உதவி ஆய்வாளர் காந்தி ராஜனின் கார், இருசக்கர வாகனத்தின் மீது மோதியது.

இதைத் தொடர்ந்து, பைக் ஓட்டுநர் காவலரிடம் நியாயம் கேட்டு வாக்குவாதத்தில் ஈடுபட்டார். அப்போது, உதவி ஆய்வாளர் கோபமடைந்து, வாக்குவாதத்தில் ஈடுபட்ட நபரின் மீது காரை வேண்டுமென்றே ஏற்றியது போலச் சென்று, அவரை காரின் பேனட்டில் 200 மீட்டர் தூரத்திற்கு இழுத்துச் சென்றார். இந்த அதிர்ச்சியான காட்சி அப்பகுதியில் இருந்த மக்களால் பதிவு செய்யப்பட்டுள்ளது.

இந்தச் சம்பவம் குறித்து தகவல் அறிந்த நெல்லை மாநகர காவல்துறை, உடனடியாக நடவடிக்கைகளைத் தொடங்கியது. இந்தச் செயலில் ஈடுபட்ட சிறப்பு உதவி ஆய்வாளர் காந்தி ராஜன், ஆயுதப்படைக்கு மாற்றப்பட்டுள்ளார். அவரைப் பணியிடை நீக்கம் (சஸ்பெண்ட்) செய்வதற்கான நடவடிக்கைகளும் மேற்கொள்ளப்பட்டு வருகின்றன.

பைக்கை இடித்த எஸ்.ஐ கார் - நியாயம் கேட்ட நபரை காரை விட்டு ஏற்றி 200 மீட்டர் தூரத்திற்கு இழுத்துச் சென்ற எஸ்.ஐ#tirunelveli#Sipic.twitter.com/PPI6FRpqKQ

— Indian Express Tamil (@IeTamil) September 19, 2025

இது குறித்து நெல்லை மாநகர காவல்துறை வட்டாரங்கள் கூறுகையில், "இந்தச் சம்பவம் தொடர்பாக உரிய விசாரணை மேற்கொள்ளப்படும். விசாரணைக்குப் பிறகு, சிறப்பு உதவி ஆய்வாளர் மீது துறைரீதியான நடவடிக்கையும், குற்றவியல் நடவடிக்கையும் எடுக்கப்படும்" என்று தெரிவித்துள்ளன. இந்தச் சம்பவம் பொதுமக்கள் மத்தியில் காவல்துறையின் மீதான நம்பிக்கையைக் குலைப்பதாகவும், அதிகார துஷ்பிரயோகம் குறித்த கேள்விகளை எழுப்புவதாகவும் உள்ளதாக மக்கள் தெரிவித்துள்ளனர். இந்த சம்பவத்தை அந்த பகுதியில் நின்று கொண்டிருந்த மக்கள் வீடியோவாக எடுத்து சமூக வலைதளங்களில் வெளியிட்டனர். வைரலாக பரவிய அந்த வீடியோ சம்பவம் பொதுமக்களிடையே பெரும் பேசு பொருளாக மாறியது.