'என்னைத் தாயாக்கும் ஆணுக்கு ₹25 லட்சம் பரிசு! ஜாதி, படிப்பு முக்கியமில்லை': ஆன்லைன் விளம்பரத்தால் பறிபோன ₹11 லட்சம்- நடந்து என்ன?

புனே: சமூக வலைத்தளங்களில் வந்த கவர்ச்சியான ஒரு விளம்பரத்தை நம்பி, புனேவைச் சேர்ந்த 44 வயது ஒப்பந்தக்காரர் ஒருவர் ரூ. 11 லட்சம் வரை பணத்தை இழந்துள்ள சம்பவம் அதிர்ச்சியை ஏற்படுத்தியுள்ளது.
 
"நான் ஒரு பெண்ணை கர்ப்பமாக்க ஒரு ஆணைத் தேடுகிறேன். அதற்கு 25 லட்சம் ரூபாய் தருகிறேன். அவர் படித்தவரா, எந்த சாதியைச் சேர்ந்தவர், நிறம் என்ன என்பது எனக்கு கவலையில்லை" என்று ஒரு பெண் பேசுவது போன்ற அந்த விளம்பரமே இந்த மோசடிக்குக் காரணமாகும்.

'கர்ப்பப் பணி' விளம்பரத்தின் கவர்ச்சி!

செப்டம்பர் முதல் வாரத்தில், அந்த ஒப்பந்தக்காரர் சமூக வலைத்தளங்களில் 'Pregnant Job' என்ற பெயரில் வெளியான ஒரு வீடியோ விளம்பரத்தைப் பார்த்தார். இந்த விளம்பரத்தில், ஒரு பெண் ஹிந்தியில் மேற்கண்ட கவர்ச்சியான சலுகையை அறிவித்தார்.

"சுலபமான வேலை, கூடவே லட்சக்கணக்கில் பணம்" என்று நினைத்த அந்த நபர், அந்த வீடியோவில் இருந்த தொலைபேசி எண்ணை அழைத்துள்ளார்.

மறுமுனையில் பேசிய நபர், தன்னை அந்த 'Pregnant Job' நிறுவனத்தின் உதவியாளர் என்று அறிமுகப்படுத்திக் கொண்டார்.

அந்தப் பெண்ணுடன் சேர்ந்து வாழ வேண்டுமென்றால், முதலில் நிறுவனத்தில் பதிவு செய்து, அடையாள அட்டை பெற வேண்டும் என்று கூறி, பல கட்டணங்களைக் கேட்டுள்ளார்.

நூறு தவணைகளில் பறிக்கப்பட்ட ரூ. 11 லட்சம்

இந்த மோசடிக் கும்பல், அந்த ஒப்பந்தக்காரரைத் தங்கள் வலையில் வீழ்த்தி, அடுத்த சில வாரங்களுக்குப் பல்வேறு கட்டணங்களைக் கேட்டு பணம் பறித்துள்ளது.

• ஆரம்பக் கட்டணம்
• உறுப்பினர் கட்டணம்
• தனியுரிமைக் கட்டணம் (Privacy charges)
• பதிவு கட்டணம் (Registration charges)
• வரி (GST, TDS)
• செயலாக்கக் கட்டணம் (Processing fee)

எனப் பல காரணங்களைக் கூறி, அந்த நபர் மூலம் கிட்டத்தட்ட 100 சிறிய பரிவர்த்தனைகள் மூலம் மொத்தமாக ரூ. 11 லட்சம் வரை அபகரித்துள்ளனர். இந்தப் பணப் பரிவர்த்தனைகள் அனைத்தும் UPI மற்றும் IMPS மூலம் செய்யப்பட்டுள்ளன.

உண்மை தெரிந்தபோது...

பணம் கைமாறிய பிறகு, மோசடிக்காரர்கள் அவரைத் தொடர்புகொள்வதை திடீரென நிறுத்திவிட்டனர். மேலும், அவரது எண்ணையும் முடக்கியுள்ளனர் (Blocked). அப்போதுதான் தான் ஏமாற்றப்பட்டதை உணர்ந்த அந்த ஒப்பந்தக்காரர், காவல் நிலையத்தில் புகார் அளித்துள்ளார்.

இது ஒரு நாடு தழுவிய சைபர் கும்பலின் வேலை!

விசாரணையில், இது புனேவில் மட்டும் நடந்த சம்பவம் அல்ல, 'Pregnant Job' அல்லது 'Playboy Service' என்ற பெயரில் 2022-ம் ஆண்டு முதல் நாடு முழுவதும் இயங்கி வரும் ஒரு பெரிய சைபர் மோசடிக் கும்பலின் வேலை என்று தெரியவந்துள்ளது.

• வேலையற்ற அல்லது பணத்துக்கு அவசரப்படும் ஆண்களைக் குறிவைத்து, 5 முதல் 25 லட்சம் ரூபாய் வரை ஊதியம் தருவதாக இவர்கள் ஆசை காட்டுவார்கள். மருத்துவப் பரிசோதனை, சட்டப்பூர்வ ஆவணங்கள், பாதுகாப்பு வைப்புத் தொகை, ஹோட்டல் முன்பதிவு மற்றும் பதிவு கட்டணங்கள் போன்ற பல காரணங்களைக் கூறி பணம் பறிப்பதே இவர்களது பாணி.

போலியான சட்ட ஆவணங்கள் மற்றும் பிரபலமானவர்களின் கையொப்பங்கள் போன்றவற்றைக்கூட இவர்கள் பயன்படுத்துகின்றனர். பல மோசடி சம்பவங்களில் பிகார் மற்றும் உ.பி.யில் கைதுகள் நடந்துள்ளன.

காவல்துறையின் எச்சரிக்கை!

இந்தச் சம்பவம் குறித்து புனே காவல்துறை, "அசாதாரணமான அல்லது சந்தேகத்திற்கிடமான ஆன்லைன் விளம்பரங்களுக்குப் பதிலளிப்பதைத் தவிர்க்குமாறு குடிமக்களை வலியுறுத்துகிறோம். தனிப்பட்ட வேலைகளுக்காக யாராவது ஆன்லைனில் பெரிய தொகைகளைக் கேட்டால், உடனடியாக காவல்துறையிடம் புகாரளிக்க வேண்டும்" என்று அறிவுறுத்தியுள்ளது.

இப்படிப்பட்ட கவர்ச்சியான விளம்பரங்களில் விழுந்து, உங்களின் பணம் மட்டுமல்லாமல் தனிப்பட்ட விவரங்களையும் இழக்க நேரிடலாம் என்பதால், சமூக வலைத்தளங்களில் அதிக எச்சரிக்கையுடன் இருக்க வேண்டியது அவசியம்.