ஜெட் வேக உயர்விலிருந்து தங்கம் விலை தடாலடி சரிவு: சவரன் ரூ.1,320 குறைந்தது

கடந்த சில நாள்களாக மின்னல் வேகத்தில் உயர்ந்து, சவரன் ரூ. 90,000 என்ற இதுவரை இல்லாத உச்சத்தைத் தொட்டிருந்த ஆபரணத் தங்கத்தின் விலையில் இன்று (வெள்ளிக்கிழமை) பெரும் சரிவு ஏற்பட்டுள்ளது. இந்த திடீர் விலை குறைவு, தங்கம் வாங்க காத்திருந்த மக்கள் மத்தியில் சற்று ஆறுதலை ஏற்படுத்தியுள்ளது.

சர்வதேச அளவில் நிலவும் போர் பதற்றம், அமெரிக்க ஃபெடரல் ரிசர்வ் வங்கியின் வட்டி விகிதக் குறைப்பு எதிர்பார்ப்புகள், அத்துடன் இந்திய ரூபாயின் மதிப்புச் சரிவு உள்ளிட்ட காரணங்களால், முதலீட்டாளர்கள் தங்கத்தின் மீது கவனம் செலுத்தி வந்தனர். இதன் காரணமாக, செப்டம்பர் 23ஆம் தேதி ரூ. 85,000-ஐ தாண்டிய ஒரு சவரன் தங்கம், அக்டோபர் 8 மற்றும் 9 ஆகிய தேதிகளில் தொடர்ந்து உயர்ந்து, நேற்று (அக். 9) மாலை நிலவரப்படி ஒரு சவரன் ரூ. 91,400 என்ற புதிய உச்சத்தை எட்டியிருந்தது.

இன்றைய விலை நிலவரம்:

நேற்றைய உச்ச விலையிலிருந்து இன்று காலை நிலவரப்படி, ஒரு சவரன் தங்கம் ஒரே நாளில் ரூ. 1,320 குறைந்து, ரூ. 90,080-க்கு விற்பனை செய்யப்படுகிறது. அதேபோல, ஒரு கிராம் தங்கம் ரூ. 165 குறைந்து, அதன் விலை ரூ. 11,260-ஆக நிர்ணயிக்கப்பட்டுள்ளது. இன்று மாலை நிலவரப்படி தங்கம் விலை சவரனுக்கு ரூ.640 ரூபாய் உயர்ந்து ஒரு சவரன் தங்கம் ரூ.90,720-க்கு விற்பனையாகிறது. ஒரு கிராம் தங்கம் ரூ.11,340-க்கு விற்பனையாகிறது. 

வெள்ளி விலை புதிய உச்சம்!

தங்கம் விலை குறைந்திருந்தாலும், வெள்ளி விலை இன்றும் அதிகரித்துள்ளது. நேற்று கிராமுக்கு ரூ. 7 அதிகரித்து விற்பனையான நிலையில், இன்று மேலும் கிராமுக்கு ரூ. 3 உயர்ந்து, ஒரு கிராம் வெள்ளி ரூ. 180-க்கும், ஒரு கிலோ கட்டி வெள்ளி ரூ. 3,000 அதிகரித்து, ரூ. 1,80,000-க்கும் விற்பனை செய்யப்பட்டு வருகிறது. தங்கம் விலையைப் போலவே வெள்ளி விலையும் வரலாறு காணாத உச்சத்தைத் தொட்டிருப்பது குறிப்பிடத்தக்கது.