போஸ்ட் ஆபீஸ் உடனடி அக்கவுண்ட்: பேப்பர் அப்ளிகேஷனே வேண்டாம்; மாதம் தோறும் வருமானம் பெற ஸ்கீம் இருக்கு!

நீளமான படிவங்களைப் பூர்த்தி செய்வது, டெபாசிட் ஸ்லிப் நிரப்புவது போன்ற வழக்கமான அஞ்சல் நிலைய நடைமுறைகளால் சலிப்படைந்தவர்களுக்கு ஒரு நற்செய்தி! அஞ்சல் துறை (Department of Posts) தற்போது, ஆதார் பயோமெட்ரிக் அங்கீகாரத்தைப் பயன்படுத்தி, சில சேமிப்புத் திட்டங்களை முழுவதும் டிஜிட்டல் முறையில் திறக்கும் புதிய வசதியை அறிமுகப்படுத்தியுள்ளது.

இதன் மூலம், மாதாந்திர வருமானத் திட்டம் (MIS), கால வைப்பு (Time Deposit - TD), கிசான் விகாஸ் பத்ரா (KVP), மற்றும் தேசிய சேமிப்புச் சான்றிதழ் (NSC) போன்ற பிரபலமான திட்டங்களை இப்போது காகிதமில்லா, வேகமான முறையில் தொடங்கலாம்.

ஏப்ரல் 23 முதல் அமல்!

தகவல் தொடர்பு அமைச்சகத்தின் கீழ் செயல்படும் அஞ்சல் துறை, புதிய வாடிக்கையாளர்களை இணைக்க கடந்த ஜனவரி 6, 2025  முதல் சேமிப்புக் கணக்குகளுக்கு (POSA) ஆதார் அடிப்படையிலான e-KYC செயல்முறையை அமல்படுத்தியது. அதன் தொடர்ச்சியாக, ஏப்ரல் 23, 2025 முதல், மாதாந்திர வருமானத் திட்டம், கால வைப்பு நிதி, கிசான் விகாஸ் பத்ரா மற்றும் தேசிய சேமிப்புப் பத்திரம் ஆகிய முக்கியச் சேமிப்புத் திட்டங்களுக்கும் ஆதார் e-KYC விரிவுபடுத்தப்பட்டுள்ளது.

இதன் மூலம், தனிநபர் முதலீட்டுக் கணக்குகளை (Single-Individual Type) இனிமேல் தபால் நிலையங்கள், ஆதார் பயோமெட்ரிக் அங்கீகாரத்தைப் பயன்படுத்தித் திறக்க முடியும்.

எளிமையான முறை:

அஞ்சல் நிலைய அதிகாரி (PA) கணக்கு தொடங்கும் செயல்முறையை அமைப்பில் தொடங்குவார்.

முதலில், e-KYC-க்கு ஆதார் எண்ணைப் பயன்படுத்த வாடிக்கையாளரின் பயோமெட்ரிக் (விரல் ரேகை) ஒப்புதல் பெறப்படும்.

ஒப்புதல் கிடைத்தவுடன், திட்டத்தின் வகை, வைப்புத் தொகை போன்ற விவரங்களை அதிகாரி உள்ளிடுவார்.

இறுதியாக, பரிவர்த்தனையை முடிக்க இரண்டாவது விரல் ரேகை பெறப்படும்.

இதில், வாடிக்கையாளர்கள் டெபாசிட் ஸ்லிப் (Deposit Slip) பூர்த்தி செய்யத் தேவையில்லை. இந்த முழு செயல்முறையும் விரைவானது மட்டுமல்ல, வாடிக்கையாளரின் ஆதார் எண் போன்ற முக்கியத் தகவல்களின் முதல் 8 இலக்கங்கள் மறைக்கப்பட்டு (Masking) பாதுகாக்கப்படுவதாகவும் அஞ்சல் துறை தெரிவித்துள்ளது.

கணக்கு மூடுதல், கணக்கு மாற்றுதல் போன்ற பிற சேவைகளுக்கான பயோமெட்ரிக் வசதிகள் விரைவில் அறிமுகப்படுத்தப்படும் என்றும் அறிவிக்கப்பட்டுள்ளது. இதன் மூலம் வாடிக்கையாளர்கள் அஞ்சல் நிலைய சேமிப்பை எளிதாகவும் பாதுகாப்பாகவும் அனுபவிக்க முடியும்.