/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/2025/10/03/post-office-fd-scheme-interest-rate-2025-10-03-15-00-49.jpg)
Post Office Tax Saving Schemes| PPF |Sukanya Samriddhi Yojana
புதிய வருமான வரி விதிப்பு முறை நடைமுறைக்கு வந்த பிறகு, ₹12 லட்சம் வரை வரி விலக்குடன் கூடிய வருமானம் ஈட்ட முடிவதால், பெரும்பாலான முதலீட்டாளர்கள் பழைய வரி முறையையும், அதன் கீழ் கிடைத்த பிரிவு 80C வரி விலக்குகளையும் சத்தமில்லாமல் கைவிடத் தொடங்கியுள்ளனர். "80C விலக்கே இல்லையே, அப்புறம் எதுக்கு அந்த அஞ்சலகத் திட்டங்களில் பணத்தைப் போடணும்?" என்று பலரும் நினைக்கின்றனர்.
இப்படிச் சிந்திப்பவர்கள் ஒரு முக்கியமான 'தந்திரத்தை' (Investment Trick) கோட்டை விடுகிறார்கள். அதுதான்: வரி விலக்கு பெற்ற கூட்டு வட்டி வளர்ச்சி (Tax-free Compounding)!
ஆம், புதிய வரி விதிப்பு, முதலீட்டுக்குக் கிடைக்கும் 'விலக்குகளை' (Deductions) நீக்கினாலும், குறிப்பிட்ட இரண்டு அஞ்சல் அலுவலகத் திட்டங்களின் 'விலக்குகளை' (Exemptions) அதனால் தொட முடியாது. இந்த விலக்குகள், நீங்கள் எந்த வரி விதிப்பைத் தேர்வு செய்தாலும், தொடரும் ஒரு அரிய சலுகை.
தடையற்ற செல்வ வளர்ச்சி (E-E-E மந்திரம்)
இதற்குச் சிறந்த உதாரணம், பொது வருங்கால வைப்பு நிதி (PPF) மற்றும் சுகன்யா சம்ரித்தி யோஜனா (SSY). இந்தத் திட்டங்கள் ஈ.ஈ.ஈ. (EEE- Exempt-Exempt-Exempt) என்ற மந்திரத்தின் கீழ் வருகின்றன.
E1 (முதலீட்டுக்கு விலக்கு): முதலீடு செய்யும் தொகைக்கு விலக்கு (பழைய வரி விதிப்பில் 80C).
E2 (வட்டிக்கு விலக்கு): ஆண்டுதோறும் கிடைக்கும் வட்டிக்கு முழு வரி விலக்கு (பிரிவு 10(11)-ன் கீழ்).
E3 (முதிர்வுக்கு விலக்கு): முதிர்வின்போது கிடைக்கும் மொத்தத் தொகைக்கு முழு வரி விலக்கு.
இதில் ஈ2 மற்றும் ஈ3 சலுகைகள்தான் முக்கியம். புதிய வரி விதிப்பின் கீழ் 80C விலக்கு (E1) இல்லாவிட்டாலும், ஆண்டுதோறும் வட்டி மீதும், முதிர்வுத் தொகை மீதும் கிடைக்கும் வரி விலக்கு (E2 & E3) அப்படியே நீடிக்கிறது.
பங்குச் சந்தை, மியூச்சுவல் ஃபண்டுகள் என முதலீடுகள் நிறைந்திருக்கும் சூழலில், வங்கியின் ஃபிக்சட் டெபாசிட்டில் (FD) 7% வட்டி கிடைத்தாலும், நீங்கள் 30% வரி வரம்பில் இருந்தால், உங்கள் கையில் எஞ்சும் வரிக்குப் பிந்தைய உண்மையான வருமானம் வெறும் 4.9% தான். ஆனால், பி.பி.எஃப்-ல் கிடைக்கும் 7% வட்டி (சுமார்), முற்றிலும் வரி விலக்கு என்பதால், உங்கள் உண்மையான வருமானம் 7% ஆகவே உள்ளது!
10 ஆண்டுகளில் ₹5 லட்சம் முதலீடு:
வங்கி எஃப்.டி.: வரிக்குப் பிறகு, சுமார் ₹8.5 லட்சம் மட்டுமே.
பி.பி.எஃப்.: வரி இல்லாததால், சுமார் ₹9.8 லட்சம் கிடைக்கும்.
வரிச் சேமிப்பு: சுமார் ₹1.3 லட்சம்!
இந்த ₹1.3 லட்சம் சேமிப்புதான், பி.பி.எஃப். மற்றும் எஸ்.எஸ்.ஒய். திட்டங்களை புதிய வரி விதிப்பு காலத்திலும் முதலீடுகளின் ராஜாவாக (Smartest Investment Bet) அமர வைக்கிறது.
மற்ற அஞ்சலகத் திட்டங்களின் பலம்!
பி.பி.எஃப்., எஸ்.எஸ்.ஒய். (PPF, SSY) திட்டங்களைப் போலவே, மூத்த குடிமக்கள் சேமிப்புத் திட்டம் (SCSS) (8.2% வட்டி) மற்றும் அஞ்சல் அலுவலக மாத வருமானத் திட்டம் (POMIS) (7.4% வட்டி) போன்ற பிற திட்டங்களும் உள்ளன. இவற்றின் வட்டிக்கு வரி உண்டு என்றாலும், வங்கி எஃப்.டி-களை விட அதிக வட்டி விகிதத்தை இவை வழங்குகின்றன. மேலும், வங்கி எஃப்.டி-க்கு ₹5 லட்சம் வரை மட்டுமே காப்பீடு உள்ள நிலையில், இந்த அரசுத் திட்டங்களுக்கு இந்திய அரசின் முழு உத்தரவாதம் (Sovereign Guarantee) உள்ளது.
ஆகவே, தற்காலப் பொருளாதார நிலையற்ற சூழலில், அஞ்சல் அலுவலகத் திட்டங்கள் ஒரு பலமான பாதுகாப்புக் கோட்டையாகத் திகழ்கின்றன. "வரிச்சலுகை இல்லையே" என்று இதை ஒதுக்குவதற்குப் பதில், "வரி இல்லா வருமானம் கிடைக்கிறதே" என்று சிந்திப்பதே புத்திசாலித்தனமான முதலீட்டு முடிவாகும்!
Stay updated with the latest news headlines and all the latest Lifestyle news. Download Indian Express Tamil App - Android or iOS.