வரி பிடித்தமே இல்லாத வாழ்க்கை வேண்டுமா? இந்த 7 நாடுகளை நோட் பண்ணுங்க!

வரி செலுத்தும் காலம் வந்துவிட்டது! ஒவ்வொரு வருடமும் நம் சம்பாத்தியத்தில் ஒரு பெரும் பகுதியை அரசுக்கு வரியாகச் செலுத்தி நாம் சலிப்படைவதுண்டு. ஆனால், உலகிலேயே வருமான வரியே இல்லாத நாடுகள் இருக்கின்றன என்பது உங்களுக்குத் தெரியுமா? நம்ப முடியவில்லையா? இவை அனைத்தும் உண்மைதான்! அந்த நாடுகளின் வருமானம் வேறு வழிகளில் ஈட்டப்படுகிறது (எண்ணெய் வளம், சுற்றுலா, சுரங்கம்). அப்படிப்பட்ட அழகான, ஆடம்பரமான நாடுகளைப் பற்றி இங்கே பார்க்கலாம். குடியேற ஒரு ஆசையும் வந்துவிடும்!

ஐக்கிய அரபு அமீரகம் (UAE) 

அரேபியத் தீபகற்பத்தின் கிழக்குப் பகுதியில் அமைந்துள்ள ஐக்கிய அரபு அமீரகம் (யு.ஏ.இ) இன்று உலகின் முன்னணிப் பொருளாதார நாடுகளில் ஒன்று. சிறப்பான சுகாதார வசதிகள் முதல் தரமான கல்வி முறை வரை, தன் குடியிருப்பாளர்களுக்கு மிகச் சிறந்த வசதிகளை இந்த நாடு வழங்குகிறது.

இங்கு வசிக்கும் மக்கள் தங்கள் தனிப்பட்ட வருமானத்திற்கு எந்த வரியும் செலுத்த வேண்டியதில்லை! ஆம், இங்கு வருமான வரி என்பதே இல்லை. இருப்பினும், இந்த நாடு உயர்தர வாழ்க்கையை உறுதி செய்கிறது. இங்குள்ள எண்ணெய் நிறுவனங்கள் மற்றும் வெளிநாட்டு வங்கிகள் செலுத்தும் பெருநிறுவன வரி (Corporate Tax) மற்றும் எண்ணெய் உற்பத்தி போன்றவைதான் நாட்டின் பிரதான வருவாய் ஆதாரங்களாகும்.

மொனாக்கோ (Monaco)

மத்தியதரைக் கடலின் (Mediterranean Sea) ஓரத்தில் அமைந்துள்ள மொனாக்கோ, உலகின் இரண்டாவது மிகச் சிறிய நாடு ஆகும். இருப்பினும், இது உலகிலேயே மிகவும் ஆடம்பரமான மற்றும் செலவு மிகுந்த இடங்களில் ஒன்றாகும்.

இங்கு வசிப்பவர்களிடமிருந்து மூலதன ஆதாய வரி (Capital Gains Tax) அல்லது சொத்து வரி (Wealth Tax) போன்ற எந்த வரிகளும் வசூலிக்கப்படுவதில்லை. இது செல்வந்தர்களின் விருப்பமான குடியிருப்புத் தலமாக விளங்குகிறது.

கத்தார் (Qatar) 

பாரசீக வளைகுடாவில் அமைந்துள்ள கத்தார், எண்ணெய் வளமிக்க ஒரு நாடாகும். இங்கு வேலை செய்பவர்கள் தங்கள் சம்பளம், ஊதியம் அல்லது படிகள் மீது எந்த வரியும் செலுத்தத் தேவையில்லை. இருப்பினும், அவர்கள் கத்தாரில் இருந்து ஈட்டிய தகுதிவாய்ந்த வருமானத்திற்கு மட்டும் வரி செலுத்தப்படலாம். உலகின் மிக வேகமாக வளர்ந்து வரும் பொருளாதாரங்களில் இதுவும் ஒன்றாகும்.

பஹ்ரைன் (Bahrain) 

50 இயற்கை மற்றும் 22 செயற்கைத் தீவுகளைக் கொண்ட சிறிய தீவுக்கூட்டமான பஹ்ரைன், மற்றுமொரு எண்ணெய் வளம் கொண்ட நாடாகும். இங்கும் தனிப்பட்ட வருமான வரி எதுவும் கிடையாது. இது மட்டுமல்லாமல், எஸ்டேட்ஸ், விற்பனை அல்லது மூலதன ஆதாயங்கள் மீதும் வரிகள் இல்லை. எண்ணெய் மற்றும் எரிவாயு துறையில் இயங்கும் வணிகங்களுக்கு மட்டுமே அதிக வரி விதிக்கப்படுகிறது. புதைபடிவ எரிபொருட்களைச் சுத்திகரிப்பதன் மூலம் கிடைக்கும் இலாபமும் அரசுக்கு வருவாய் ஈட்டித் தருகிறது.

பெர்முடா (Bermuda)

அட்லாண்டிக் கடலில் அமைந்துள்ள அழகான தீவான பெர்முடாவில் நீங்கள் வசித்தால், வருமான வரி செலுத்தத் தேவையில்லை. அது மட்டுமல்லாமல், மதிப்புக்கூட்டு வரி (VAT), பெருநிறுவன வருமான வரி அல்லது விற்பனை வரிகள் (Sales Tax) எதுவும் இங்கு இல்லை. இங்குள்ள நிறுவனங்களுக்கு ஊதியப்பட்டியல் வரி (Payroll Tax) கூட இல்லை என்பது கூடுதல் சிறப்பு.

குவைத் (Kuwait) 

குவைத் நாட்டில் தனிநபர்கள் ஈட்டும் வருமானத்தின் மீது வருமான வரி விதிக்கப்படுவதில்லை. இருப்பினும், இங்கு வசிப்பவர்கள் சமூகப் பாதுகாப்புத் திட்டங்களுக்கு (Social Security) மட்டும் பங்களிக்க வேண்டும். அதன் எண்ணெய் வளம்தான் நாட்டின் முக்கிய வருமானத்திற்கு அடித்தளமாகும்.

பஹாமாஸ் (The Bahamas) 

சுற்றுலாப் பயணிகளின் சொர்க்கமான பஹாமாஸ் தீவுகளின் பொருளாதாரம் பெரும்பாலும் சுற்றுலாவை நம்பியுள்ளது. இங்கு வசிப்பவர்கள் வருமானம், பரம்பரைச் சொத்து, பரிசுகள் அல்லது மூலதன ஆதாயங்கள் போன்ற எதற்கும் வரி செலுத்தத் தேவையில்லை. எனவே, இது உலகளவில் மிகவும் கவர்ச்சிகரமான வரி புகலிடங்களில் (Tax Haven) ஒன்றாகக் கருதப்படுகிறது.

யோசிக்க வேண்டாம், உங்கள் லக்கேஜைத் தயார் செய்யுங்கள்! இந்த நாடுகளில் வரியும் இல்லை, வசதியான வாழ்க்கைக்கும் குறைவில்லை!

இந்த செய்தியை ஆங்கிலத்தில் வாசிக்க இங்கே கிளிக் செய்யுங்கள்!