பெண் ஊழியர்களின் எண்ணிக்கையை 30 சதவீதமாக உயர்த்த எஸ்.பி.ஐ முடிவு; இதுதான் பெஸ்ட் சான்ஸ் லேடீஸ்!

நாட்டின் மிகப்பெரிய பொதுத்துறை வங்கியான பாரத ஸ்டேட் வங்கி (SBI), தன் பணியிடத்தில் பாலினப் பன்முகத்தன்மையை மேம்படுத்த ஒரு முக்கிய முடிவை அறிவித்துள்ளது. அடுத்த ஐந்து ஆண்டுகளுக்குள் வங்கியின் மொத்த ஊழியர்களில் 30 சதவிகிதம் பெண்களைக் கொண்டிருக்க இலக்கு நிர்ணயித்து, அதற்கான புதிய வியூகத்தை வகுத்துள்ளது. இது, இந்திய வங்கித் துறையில் பெண் ஊழியர்களின் பங்களிப்பை அதிகரிக்கும் ஒரு திருப்புமுனையாகப் பார்க்கப்படுகிறது.

தற்போதைய நிலையும் இலக்கும்

இது குறித்து ஊடகங்களிடம் பேசிய எஸ்.பி.ஐ-யின் துணை நிர்வாக இயக்குநர் (மனித வளங்கள்) மற்றும் தலைமை மேம்பாட்டு அதிகாரி (CDO) கிஷோர் குமார் பொலுதாசு, "எங்கள் களப் பணியாளர்களில் (Frontline Staff) பெண்கள் சுமார் 33% ஆக உள்ளனர். ஆனால், மொத்த ஊழியர்களைக் கணக்கில் கொண்டால், அவர்களின் பங்கு 27% ஆக மட்டுமே உள்ளது. இந்தச் சதவீதத்தை உயர்த்தி, பன்முகத்தன்மையை மேம்படுத்த நாங்கள் தீவிரமாகப் பணியாற்றி வருகிறோம்" என்று தெரிவித்தார்.

இந்திய வங்கித் துறையிலேயே மிகப் பெரிய பணியாளர் தளத்தைக் கொண்டுள்ள எஸ்.பி.ஐ-யில், தற்போது 2.4 லட்சத்திற்கும் அதிகமானோர் பணிபுரிகின்றனர். இந்த இடைவெளியைக் குறைத்து, நடுத்தர கால இலக்கான 30% பெண் ஊழியர்களை அடைவதற்கு வங்கி உறுதியான நடவடிக்கைகளை எடுத்து வருகிறது.

பெண்களுக்கான சிறப்புத் திட்டங்கள்

அனைத்து மட்டங்களிலும் பெண்கள் முன்னேறக்கூடிய ஒரு பாதுகாப்பான மற்றும் உள்ளடக்கிய பணியிடத்தை உருவாக்க வங்கி உறுதிபூண்டுள்ளது. இதற்காக, தலைமைத்துவம், பணி-வாழ்க்கை சமநிலை மற்றும் பணியிடத்தில் கண்ணியம் ஆகியவற்றை மேம்படுத்தும் சிறப்புத் திட்டங்களை SBI செயல்படுத்தி வருகிறது:

குழந்தைப் பராமரிப்புப் படி (Creche Allowance): பணிபுரியும் தாய்மார்களுக்குக் குழந்தைகள் காப்பகப் பண உதவி வழங்கப்படுகிறது.

மீண்டும் பணிக்குத் திரும்புதல்: மகப்பேறு, நீண்ட விடுப்பு அல்லது மருத்துவ விடுப்புக்குப் பிறகு பணிக்குத் திரும்பும் பெண் ஊழியர்களுக்கு உதவுவதற்காகச் சிறப்புப் பயிற்சித் திட்டம்.

தலைமைப் பண்பை வளர்க்க: 'Empower Her' என்ற முதன்மைத் திட்டத்தின் கீழ், எதிர்கால உயர்மட்ட நிர்வாகப் பதவிகளுக்காகப் பெண்களை அடையாளம் கண்டு, அவர்களுக்கு வழிகாட்டி, பயிற்சி அளிக்கப்படுகிறது.

ஆரோக்கியப் பாதுகாப்பு முயற்சிகள்

பெண் ஊழியர்களின் பிரத்யேக சுகாதாரத் தேவைகளைக் கருத்தில் கொண்டு, வங்கி சிறப்பு கவனம் செலுத்துகிறது:

சுகாதாரப் பரிசோதனைகள்: மார்பகம் மற்றும் கர்ப்பப்பை புற்றுநோய் பரிசோதனைகள்.

ஊட்டச்சத்துப் படி: கர்ப்பிணி ஊழியர்களுக்குச் சிறப்பு ஊட்டச்சத்து அலவன்ஸ்.

தடுப்பூசி இயக்கம்: கர்ப்பப்பை புற்றுநோய் தடுப்பூசி இயக்கம்.

அனைத்து மகளிர் கிளைகளும் டிஜிட்டல் மாற்றம்
உள்நாட்டுச் சேவைகளில் SBI கொண்டுள்ள பன்முகத்தன்மைக்குச் சான்றாக, நாடு முழுவதும் 340-க்கும் அதிகமான கிளைகள் முழுவதும் பெண் ஊழியர்களைக் கொண்டே இயங்குகின்றன என்றும், இந்தக் கிளைகளின் எண்ணிக்கையை அதிகரிக்கத் திட்டமிட்டுள்ளதாகவும் பொலுதாசு கூறினார்.

மேலும், வங்கித் துறையில் முன்னணி வகிக்கும் SBI, புதிய தொழில்நுட்பங்களையும், வாடிக்கையாளர் எதிர்பார்ப்புகளையும் ஏற்று, செயல்முறைகள், தொழில்நுட்பம் மற்றும் வாடிக்கையாளர் அனுபவம் ஆகியவற்றில் புதுமைகளைப் புகுத்தி வருவதாகவும் அவர் குறிப்பிட்டார்.