TN MBBS BDS Admission: தமிழ்நாடு மருத்துவ கவுன்சலிங்; 3-ம் சுற்றில் இந்த தவறை செய்யாதீங்க!

தமிழ்நாடு மருத்துவ கவுன்சலிங்கின் இரண்டாம் சுற்று முடிவுகள் வெளியாகியுள்ள நிலையில், எத்தனை இடங்கள் காலியாக உள்ளன, மூன்றாம் சுற்றுக்கான விதிகள் என்ன என்பதை இப்போது பார்ப்போம்.

தமிழகத்தில் எம்.பி.பி.எஸ் மற்றும் பி.டி.எஸ் ஆகிய படிப்புகளின் மாணவர் சேர்க்கைக்கான கவுன்சலிங் நடைபெற்று வருகிறது. இதுவரை இரண்டு சுற்று கலந்தாய்வு நிறைவடைந்துள்ளது. இரண்டாம் சுற்றில் இடம் கிடைத்தவர்கள் தற்போது கல்லூரிகளில் சேர்க்கை பெற்று வருகின்றனர். செப்டம்பர் 30 ஆம் தேதிக்குள் இடம் கிடைத்தவர்கள் சேர்க்கை பெற வேண்டும்.

இந்தநிலையில், மூன்றாம் சுற்றுக்கு எத்தனை இடங்கள் காலியாக உள்ளன, விதிகள் என்ன என்பதை மிஸ்பா கேரியர் அகாடமி என்ற யூடியூப் சேனலில் கல்வி ஆலோசகர் டேனியல் பிரதீப் கூறியுள்ளார். 

வீடியோவின்படி, தகுதிப் பட்டியலில் இடம்பெற்று, முதல் இரண்டு சுற்றுகளில் இடம் கிடைக்காதாவர்கள் மூன்றாம் சுற்றில் பங்கேற்கலாம். மேலும் இரண்டாம் சுற்றில் இடம் கிடைத்து, அதை மாற்ற விரும்புபவர்களும் மூன்றாம் சுற்றில் பங்கேற்கலாம். அதேநேரம் அகில இந்திய கவுன்சலிங்கின் மூன்றாம் சுற்றில் இடம் கிடைத்து, அந்த இடத்தில் சேர்க்கை பெற்றவர்கள் தமிழக கவுன்சலிங்கின் மூன்றாம் சுற்றில் பங்கேற்க முடியாது.

மூன்றாம் சுற்றில் ஃப்ரீ எக்ஸிட் எனப்படும் வெளியேறுதல் வாய்ப்பு இல்லை. மூன்றாம் சுற்றில் இடம் கிடைத்து சேர்க்கை பெறாவிட்டால், அடுத்து நடக்கும் காலியிட சுற்று அல்லது நான்காம் சுற்றில் பங்கேற்க அனுமதி இல்லை. அதேநேரம் மூன்றாம் சுற்றில் இடம் கிடைத்து, சேர்க்கை பெற்றபின் கல்லூரியில் படிக்க விரும்பாமல், வெளியேற நினைத்தால் அபராதம் செலுத்த வேண்டி வரும். இடைநிற்றல் கட்டணம் ரூ. 10 லட்சம் அபராதம் செலுத்த வேண்டும் மற்றும் கல்வி கட்டணம், பாதுகாப்பு வைப்புத்தொகை திருப்பி தரப்படாது. 

தமிழக கவுன்சலிங்கில் இரண்டாம் சுற்று முடிவில், அரசு மருத்துவக் கல்லூரிகள், தனியார் கல்லூரிகளில் அரசு ஒதுக்கீடு இடங்கள் மற்றும் தனியார் நிறுவனங்களில் பொதுப்பிரிவு மேனேஜ்மெண்ட் இடங்கள் முழுவதுமாக நிரம்பிவிட்டன. யாரேனும் சேர்க்கை பெறவில்லை என்றால், அந்த இடங்கள் மூன்றாம் சுற்றுக்கு வரும். அதேநேரம் சிறுபான்மையினர் ஒதுக்கீட்டு பிரிவில் மலையாளம் பிரிவில் 6 இடங்களும், என்.ஆர்.ஐ பிரிவில் 366 இடங்களும் என 372 இடங்கள் காலியாக உள்ளன. ஒருவேளை இந்த இடங்கள் மூன்றாம் சுற்றில் நிரப்பப்படவில்லை என்றால், அவை பொதுப்பிரிவு மேனேஜ்மெண்ட் இடங்களாக மாற்றப்படும்.