TNPSC Group 4: குரூப் 4 தேர்வு டைப்பிஸ்ட் கட் ஆஃப்; சாதி வாரியான நிலவரம் இதுதான்!

தமிழ்நாடு அரசுப் பணியாளர் தேர்வாணையம் (TNPSC) நடத்திய குரூப் 4 தேர்வு முடிவுகள் வெளிவந்த பிறகு, ஒவ்வொரு பணிக்குமான கட்ஆஃப் நிலவரம் குறித்த ஆவலில் தேர்வர்கள் உள்ளனர். இதில், டைப்பிஸ்ட் (Typist) பணிக்குத் தேவையான கட்ஆஃப் மார்க்ஸ் (Cutoff Marks) குறித்த தெளிவான ஆய்வு முடிவுகளை இப்போது பார்க்கலாம். இந்தக் கணிப்புகள், சமுதாய ஒதுக்கீடுகள் மற்றும் சிறப்பு முன்னுரிமைகளைக் கணக்கில் கொண்டு தயாரிக்கப்பட்டுள்ளன.

1,335 டைப்பிஸ்ட் பணியிடங்கள்: சலுகை யாருக்குச் சாதகம்?

டி.என்.பி.எஸ்.சி. (TNPSC) குரூப் 4-ல், டைப்பிஸ்ட் பணிக்கு மொத்தம் 1,335 காலிப் பணியிடங்கள் (Vacancies) உள்ளன. இது, ஜூனியர் அசிஸ்டன்ட் பணியிடங்களுக்கு அடுத்தபடியாக அதிக இடங்கள் கொண்ட முக்கியப் பிரிவாகும்.

இந்த 1,335 இடங்கள் சமூக வாரியாகப் பிரிக்கப்பட்டுள்ளன:

ஒ.சி (OC) பிரிவுக்கு: 431 இடங்கள் (31%)
பி.சி (BC) பிரிவுக்கு: 369 இடங்கள் (26.5%)
எம்.பி.சி/ டி.என்.சி. (MBC/DNC) பிரிவுக்கு: 278 இடங்கள் (20%)
எஸ்.சி. (SC) பிரிவுக்கு: 209 இடங்கள் (15%)
பி.சி (முஸ்லிம்) (BCM) பிரிவுக்கு: 49 இடங்கள் (3.5%)
எஸ்.சி. (அருந்ததியர்) (SC(A)) பிரிவுக்கு: 42 இடங்கள் (3%)
எஸ்.டி. (ST) பிரிவுக்கு: 14 பணியிடங்கள் (1%)

இந்த ஒதுக்கீட்டிற்குள் இருக்கும் ஒரு சலுகைதான், டைப்பிஸ்ட் பணிக்கு உண்மையிலேயே 'லோ கட்ஆஃப்' வாய்ப்பை வழங்குகிறது. அதுதான் பெண்களுக்கான 30% முன்னுரிமை மற்றும் மாற்றுத்திறனாளிகளுக்கு இருக்கும் 4% முன்னுரிமைக் கோட்டா!

கட்ஆஃப் சவாலை உடைக்கும் பெண்களின் 30% கோட்டா!

பெண்களுக்கான 30% கிடைமட்ட ஒதுக்கீடு (Horizontal Reservation), ஒவ்வொரு சமூகப் பிரிவிலும் உள்ள கட்ஆஃப் மதிப்பெண்களை பொதுப் பிரிவை விடக் குறைத்து, பெண்களின் தேர்ச்சி வாய்ப்புகளை அதிகரித்துள்ளது. அதேபோல், மாற்றுத்திறனாளிகளுக்கான 4% ஒதுக்கீடு, அவர்களுக்கு மிகக் குறைந்த மதிப்பெண்களிலும் அரசுப் பணி உறுதி செய்யப்பட வழிவகுக்கிறது.

டைப்பிஸ்ட் கட்ஆஃப் கணிப்புகள் (கேள்விகள் அடிப்படையில்)

ஒ.சி. பிரிவினர் (OC): ஒ.சி. பிரிவில், பொதுப் பிரிவினர் 180 கேள்விகளுக்கு மேல் சரியாகப் பதிலளித்திருந்தால் வேலை நிச்சயம். பெண்களுக்கு 175 கேள்விகள் போதுமானது. மாற்றுத்திறனாளிகள் 165 முதல் 170 கேள்விகளுக்குள் இருந்தாலே வேலை கிடைப்பதற்கான வாய்ப்பு உள்ளது.

பி.சி (BC): பொதுப் பிரிவினருக்கு 178 கேள்விகள் வரையிலும், பெண்களுக்கு 173 கேள்விகள் வரையிலும் கட்ஆஃப் அமையலாம். மாற்றுத்திறனாளிகளுக்கு இது 165 கேள்விகள் போதும்.

எம்.பி.சி./ டி.என்.சி பிரிவினர் (MBC/DNC): பொதுப் பிரிவினருக்கு 175 கேள்விகள் வரையிலும், பெண்களுக்கு 170 கேள்விகள் வரையிலும் வாய்ப்புள்ளது. மாற்றுத்திறனாளிகளுக்கு 160 கேள்விகள் போதும்.

எஸ்.சி (SC), எஸ்.சி(A) பிரிவினர்: SC பொதுப் பிரிவினருக்கு 173 கேள்விகள் வரையிலும், பெண்களுக்கு 168 கேள்விகளும் கட்ஆஃபாக இருக்கலாம். மாற்றுத்திறனாளிகளுக்கு 155 கேள்விகள் போதும். . SC(A) பிரிவினருக்குப் பொதுப் பிரிவில் 168 கேள்விகளும், பெண்களுக்கு 163 கேள்விகளும் கட்ஆஃபாக இருக்கலாம்.

பி.சி.எம் மற்றும் எஸ்.டி. பிரிவினர் (BCM/ ST): BCM பிரிவில் பொதுப் பிரிவினருக்கு 170 கேள்விகளும், பெண்களுக்கு 165 கேள்விகளும் போதுமானது. ST பிரிவில் பொதுப் பிரிவினருக்கு 165 கேள்விகள் கட்ஆஃப் ஆக இருக்கலாம்.

• மாற்றுத்திறனாளிகளுக்குப் பெரும்பாலான பிரிவுகளில் கட்ஆஃப் 150 முதல் 165 கேள்விகளுக்குள்ளேயே முடிவடையும் வாய்ப்பு உள்ளது. குறிப்பாக, ST பிரிவினருக்கு 150-க்குக் கீழேயும் செல்ல வாய்ப்புள்ளது.

இறுதி வாய்ப்பு: உறுதி கொள்ளுங்கள்!

இங்கே கொடுக்கப்பட்டிருக்கும் கட் ஆஃப் மதிப்பெண்கள் அனைத்தும், பணியிடங்களின் எண்ணிக்கை மற்றும் இடஒதுக்கீட்டின் அடிப்படையில் எதிர்பார்க்கப்படும் கட் ஆஃப் மார்க்ஸ் (Expected Cutoff Marks) தான். இதில் ஒரு மார்க் கூடுதலாகவோ அல்லது குறைவாகவோ சிறிய மாற்றங்கள் வரலாம்.

நீங்கள் டைப்பிஸ்ட் பணிக்கு விண்ணப்பித்து, இந்த கட் ஆஃப் மதிப்பெண்களைத் தாண்டி மதிப்பெண் எடுத்திருந்தால், நீங்கள் தைரியமாக இருக்கலாம். இந்த டைப்பிஸ்ட் போஸ்ட் உங்களுக்குத் தான்!