PM Modi Rally in Coimbatore: 'நாற்பதும் நமதே... நாடும் நமதே' - கோவையில் பிரதமர் மோடி சூளுரை

வழக்கம் போல் தமிழில் பேச்சைத் துவக்கிய பிரதமர் மோடி,' மருதமலை முருகனுக்கு அரோகரா' என்று சொல்லி தனது உரையைத் துவக்கினார். தொடர்ந்து பேசிய மோடி, "நிலையான ஆட்சி அமைய நமது கூட்டணி விரும்புகிறது. ஆனால், எதிர்க்கட்சிகள் அதிகாரத்தை கைப்பற்ற துடித்துக் கொண்டிருக்கின்றன. நாட்டின் பாதுகாப்பில் எந்த சமரசமும் செய்து கொள்வதில்லை என்பதில் உறுதியாக இருக்கிறோம். தேசிய பாதுகாப்பு தொடர்பாக எதிர்க்கட்சிகளிடம் எந்த திட்டமும் இல்லை. பாதுகாப்பான நாட்டை உருவாக்குவதில் தமிழகத்தின் பங்கு முக்கியமானது" என்றார். 

தேர்தல் பிரச்சார பொதுக் கூட்டத்தில் கலந்து கொள்வதற்காக பிரதமர் மோடி, கோவை வந்தடைந்தார். மாலை 6.45 மணிக்கு விமான நிலையம் வந்தடைந்த பிரதமரை முதல்வர் பழனிசாமி, துணை முதல்வர் ஓ.பன்னீர் செல்வம் மற்றும் அமைச்சர்கள் வரவேற்றனர்.

பொதுக்கூட்டம் நடைபெறும் கொடிசியா மைதானம் மற்றும் விமான நிலையத்தில் 5 அடுக்கு போலீஸ் பாதுகாப்பு போடப்பட்டுள்ளது. பொதுமக்கள், கட்சியினர் வாகனங்கள் நிறுத்த தனி இடம் ஒதுக்கப்பட்டு உள்ளது. அவினாசி சாலையில் பொதுக்கூட்டம் நடைபெறும் நேரத்தில் வாகனங்கள் செல்ல கட்டுப்பாடு விதிக்கப்பட்டு உள்ளது.

கடந்த 2014-ம் ஆண்டு கொடிசியா மைதானத்தில் நடைபெற்ற பொதுக்கூட்டத்தில் மோடி பங்கேற்று பேசினார். அதே கொடிசியா மைதானத்தில் நடைபெற உள்ள கூட்டத்தில் இன்று 2-வது முறையாக பேசுகிறார் என்பது குறிப்பிடத்தக்கது.