’ஆர்யன்’ திரைப்படம்: மம்முட்டியின் சூப்பர் ஹிட் படத்திலிருந்து ஈர்க்கப்பட்ட காட்சிகள்; விஷ்ணு விஷால் ஓபன் டாக்

இயக்குநர் சுசீந்திரன் இயக்கத்தில் கடந்த 2009-ஆம் ஆண்டு வெளியான ‘வெண்ணிலா கபடி குழு’ திரைப்படத்தின் மூலம் தமிழ் திரையுலகில் அறிமுகமானவர் விஷ்ணு விஷால். இதுவே இயக்குநர் சுசீந்திரனின் முதல் படம் ஆகும். இதைத்தொடர்ந்து,  குள்ளநரி கூட்டம், நீர்ப்பறவை, முண்டாசுப்பட்டி, ராட்சசன், கட்டா குஸ்தி, லால் சலாம் போன்ற பல திரைப்படங்களில் நடித்து நடிகர் விஷ்ணு விஷால், ரசிகர்களின் மனதில் இடம் பிடித்தார்.  

நடிகர் விஷ்ணு விஷால் தற்போது ‘ஆர்யன்’ திரைப்படத்தில் நடித்துள்ளார். இயக்குநர் பிரவீன் இயக்கியுள்ள இந்த படத்தில் ஷ்ரத்தா ஸ்ரீநாத், மானசா சௌத்திரி, சாய் ரோனக், தாரக் பொன்னப்பா, மாலா பார்வதி, அவினாஷ், அபிஷேக் ஜோசப் ஜார்ஜ் ஆகியோர் முக்கிய கதாபாத்திரத்தில் நடித்துள்ளனர். திரில்லர் படமாக உருவாகியுள்ள ‘ஆர்யன்’ திரைப்படத்தில் நடிகர் விஷ்ணு விஷால் மீண்டும் போலீஸ் கதாபாத்திரத்தில் நடித்துள்ளார்.

’எஃப்.ஐ.ஆர்’ படத்தை இயக்கிய மனு ஆனந்த் இந்த படத்தில் இணை எழுத்தாளராக பணியாற்றியுள்ளார். இப்படம் வரும் 31-ஆம் தேதி திரையரங்குகளில் வெளியாகவுள்ளது. இதையடுத்து ‘ஆர்யன்’ படக்குழுவினர் ப்ரொமோஷன் பணிகளில் தீவிரமாக ஈடுபட்டு வருகின்றனர்.

இந்நிலையில், ‘ஆர்யன்’ திரைப்படத்தின் சில காட்சிகள்  மம்முட்டி நடித்த ‘கண்ணூர் ஸ்குவாட்’ திரைப்படத்திலிருந்து ஈர்க்கப்பட்டது என்று நடிகர் விஷ்ணு விஷால் கூறியுள்ளார். அவர் பேசியதாவது, “மம்முட்டி நடித்த ‘கண்ணூர் ஸ்குவாட் திரைப்படம் எனக்கு மிகவும் உத்வேகம் அளித்த திரைப்படம். உண்மையில் ‘ஆர்யன்’ படத்தின் சில காட்சிகள் ‘கண்ணூர் ஸ்குவாட்’ படத்திலிருந்து ஈர்க்கப்பட்டவை தான். அப்படம் மிகவும் அழகாக காட்சிப்படுத்தப்பட்டிருக்கும்” என்றார்.

மம்முட்டி நடிப்பில் கடந்த 2023-ஆம் ஆண்டு வெளியான திரைப்படம் ‘கண்ணூர் ஸ்குவாட்’. காவல்துறையின் ஒரு குழுவான ‘கண்ணூர் ஸ்குவாட்’ கேரளாவில் ஒரு வீட்டில் நடந்த கொள்ளைச் சம்பவத்தில் சம்பந்தப்பட்ட குற்றவாளிகளைத் தேடி நாடு முழுவதும் பயணம் மேற்கொள்வதே இத்திரைப்படத்தின் கதைக்களம் ஆகும். இயக்குநர் ராபி வர்கீஸ் ராஜ் இயக்கிய இந்த படத்தில் அஜீஸ் நெடுமங்காட், சபரீஷ் வர்மா, அர்ஜுன் ராதாகிருஷ்ணன் ஆகியோர் முக்கிய கதாபாத்திரங்களில் நடித்திருந்தனர்.

ரூ.25 கோடி பட்ஜெட்டில் உருவான இப்படம் இந்தியாவில் ரூ.40.17 கோடியும் உலக அளவில் ரூ.80 கோடியும் வசூல் செய்துள்ளதாக கூறப்படுகிறது. இப்படம் மலையாள ரசிகர்கள் மட்டுமல்லாமல் தமிழ் ரசிகர்கள் மத்தியிலும் நல்ல வரவேற்பை பெற்றது.

இந்த செய்தியை ஆங்கிலத்தில் படிக்க லிங்கை கிளிக் செய்க