கமல்ஹாசன் 63வது பிறந்த நாள் : Live Updates

கமல்ஹாசனுக்கு இன்று 63வது பிறந்த நாள். அவர் அரசியல் பேச ஆரம்பித்ததில் இருந்து, அடுத்தடுத்து என்ன நடக்குமெனத் தெரியாமல் ஆவலுடன் எதிர்பார்த்துக் காத்திருக்கின்றனர் மக்கள். எனவே, வழக்கமான பிறந்த நாளைவிட இந்தப் பிறந்த நாள் எல்லோராலும் உற்றுக் கவனிக்கப்படுகிறது. கமலின் பிறந்த நாளை முன்னிட்டு இன்று என்னென்ன நடக்கிறது என்பதை லைவ் அப்டேட்டாக உடனுக்குடன் தொகுத்துத் தருகிறோம்...

காலை 9.00 மணி : திருவள்ளூர் மாவட்டம் ஆவடியில் இலவச மருத்துவ முகாமைத் தொடங்கி வைத்தார் கமல். “மருத்துவ முகாம் நடத்துவதற்கும், அரசியலுக்கும் சம்பந்தமில்லை. மருத்துவ முகாம்களுக்காக அரசியலைப் பயன்படுத்திக் கொள்வோம். தேங்கிய மழைநீரை அரசு அகற்றி வருவதால், நாங்கள் மருத்துவ முகாம்களை நடத்துகிறோம். முடிந்தவரை உதவ வேண்டும் என்பதற்காக மருத்துவ முகாமைத் தொடங்கி வைக்கிறோம். மழைக்காலம் என்பதால் தொற்றுநோய் அபாயம் உள்ளது. எனவே, மக்கள் முன்னெச்சரிக்கை எடுக்க வேண்டும். மக்கள் இதனை பயன்படுத்திக் கொள்ள வேண்டும். எங்களுடைய பணிகள் அமைதியாக நடந்து கொண்டிருக்கின்றன. எங்கள் முயற்சிகள் வலுப்பெறும் என்ற நம்பிக்கை உள்ளது. கனவில் இருந்துதான் பல கண்டுபிடிப்புகள் உருவாகின. காணும் கனவுகளை நிஜமாக மாற்ற நாங்கள் பாடுபடுவோம்” என்று பேசினார். இந்த நிகழ்ச்சியில், கமலின் இளைய மகளும், நடிகையுமான அக்‌ஷரா ஹாசன் உடன் இருந்தார்.

காலை 10.00 மணி : மழை மற்றும் போக்குவரத்து நெரிசலால், பள்ளிக்கரணையில் மழை வெள்ளம் பாதித்த பகுதிகளைப் பார்வையிடும் கமல்ஹாசனின் திட்டம் ரத்து செய்யப்பட்டது.

காலை 10.11 மணி : “தங்களின் 63வது பிறந்தநாளில், விவசாயம்தான் அரசியல் என்ற லட்சிய உணர்வுடன், கொள்கை உறுதியுடன் அரசியல் பயணம் தொடர அன்புடன் விவசாயிகள் சார்பில் நல்வாழ்த்துகளைத் தெரிவித்துக் கொள்கிறேன்” என அனைத்து விவசாயிகள் சங்க ஒருங்கிணைப்புக்குழு தலைவர் பி.ஆர்.பாண்டியன் வாழ்த்து தெரிவித்துள்ளார்.

மதியம் 1 மணி : தி.நகரில் உள்ள ஜி.ஆர்.டி. ஹோட்டலில் நற்பணி மன்ற செயலியை அறிமுகப்படுத்தும் நிகழ்ச்சி நடைபெற்றது. “நான் வெளியிட இருப்பது செயலி மட்டுமல்ல, அது ஒரு டிஜிட்டல் அரங்கம். உண்மைகளை மட்டுமே எப்போதும் எல்லோராலும் பேச முடியாததாக இருக்கிறது. தவறான ஆட்களிடம் தானத்தைக் கொடுப்பது கூட தவறுதான். நல்லது செய்தாலும், பண்பு அறிந்து ஜாக்கிரதையாக செய்ய வேண்டும்.

மக்கள் பிரச்னைகளை அறிந்து கொள்வதற்காக தமிழகம் முழுவதும் சுற்றுப் பயணம் மேற்கொள்ளத் திட்டமிட்டிருக்கிறேன். நல்ல தமிழ்நாட்டை உருவாக்குவதுதான் என் கனவு. தமிழகத்தை இயக்க வேண்டிய சக்கரங்கள் பழுதடைந்துள்ளதாகக் கருதுகிறேன். அக்கிரமங்களுக்கு எதிராகத் தரப்படும் குரல்கள் குறைந்துவிட்டதாகக் கருதுகிறேன்.

தீயவை நடக்கும்போது விசில் அடிக்கும் கருவியாக ‘மய்யம் விசில்’ செயலி செயல்படும். மக்கள் பிரச்னைகளை #maiamwhistle #KH #theditheerpomvaa #virtuouscvcles ஆகிய ஹேஷ்டேக்கில் பேசலாம்.

கட்சி தொடங்குவதற்கான ஆயத்தங்களை செய்யத் தொடங்கிவிட்டேன். சினிமா எடுப்பதற்கே 6 மாதங்கள் முன்னேற்பாடுகள் செய்பவன் நான். அரசியல், அதைவிட பெரிய பணி. அரசியல் கட்சிக்கான முன்னேற்பாடுகளைச் செய்ய வேண்டியிருக்கிறது. அஸ்திவாரம் பலமாக இருக்க வேண்டும் என்பதற்காக காத்திருக்கிறேன். நான் பிறந்ததற்கான காரணத்தை நிரூபிக்கும் தருணம் வந்துவிட்டது. உங்கள் உதவியுடன் அது நடக்கும்” என்று கமல்ஹாசன் தெரிவித்துள்ளார்.