காந்தாராவை பின்னுக்கு தள்ளிய காந்தாரா சாப்டர் 1: ; வசூல் வேட்டையில் முந்தைய சாதனை முறியடிப்பு!

கன்னட சினிமாவில் தயாராகி இந்திய சினிமாவை அலறவிடும் அளவுக்கு வசூலை வாரி குவித்து வரும் காந்தாரா ஏ லெஜண்ட் சாப்டர் 1 திரைப்படம் பெரிய வசூலை நோக்கி பயணித்து வரும் நிலையில், கன்னட சினிமாவில் அதிக வசூல் செய்த திரைப்படமாக மாறியுள்ளது.

இந்திய சினிமாவில் சிறிய திரையுலமாக இருந்த கன்னட சினிமாவில் தற்போது இந்திய அளவில் பிரம்மாண்ட வெற்றியை தரக்கூடிய அளவுக்கு பெரிய பட்ஜெட் படங்கள் எடுக்க தொடங்கியுள்ளனர். இந்த படங்கள், எதிர்பார்ப்பை பூர்த்தி செய்யும் வகையிலும், எதிர்பார்ப்புக்கு மிஞ்சிய படமாகவும் இருந்து வருகிறது. அந்த வகையில் வெளியான கே.ஜி.எஃப் 1 மற்றும் 2 படங்கள் பெரிய வசூல் வேட்டை நடத்தியது. கன்னட சினிமாவில் இன்றுவரை அதிகம் வசூல் செய்த படம் கே.ஜி.எஃப் 2 படம்.

இந்த சாதனையை எட்டும் வகையில், தற்போது காந்தாரா எ லெஜண்ட் சாப்டர் 1 திரைப்படம் பயணித்து வருகிறது. கடந்த 2022-ம் ஆண்டு வெளியான காந்தாரா திரைப்படம், 15 கோடியில் தயாராகி 400 கோடிக்கு மேல் வசூலித்து புதிய சாதனை படைத்தது, அதனைத் தொடர்ந்து இந்த படத்தின் ப்ரீக்கோல் படமாக காந்தாரா ஏ லெஜண்ட் சாப்டர் 1 திரைப்படம், அறிவிக்கப்பட்டது. இந்த படத்தின் அறிவிப்பு வெளியானபோதே ரசிகர்கள் மத்தியில் எதிர்பார்ப்பும் அதிகமாக இருந்தது. இந்த எதிர்பார்ப்புகளை பூர்த்தி செய்யும் வகையில் வசூலை குறித்து வருகிறது.

கடந்த அக்டோபர் 2-ந் தேதி வெளியான காந்தாரா ஏ லெஜண்ட் சாப்டர் 1 திரைப்படம் சுமார் 125 கோடி பட்ஜெட்டில் எடுக்கப்பட்டுள்ள நிலையில், படம் தற்போது 400 கோடிக்கு அதிகமாக வசூலை எட்டியுள்ளது. இதன் மூலம் அதிக வசூல் செய்த கன்னட படங்களின் பட்டியலில் இந்த படம் 2-வது இடத்தை பிடித்துள்ளது, இந்த பட்டியலில், யஷ் நடிப்பில் வெளியான கே.ஜி.எஃப் 2 திரைப்படம் ரூ1200 கோடி வசூலித்து முதலிடத்தில் உள்ளது. அதேபோல் 408 கோடி வசூலித்து இந்த பட்டியலில் 2-வது இடத்தில் இருந்த காந்தாரா திரைப்படம் தற்போது 3-வது இடத்தை பிடித்துள்ளது.

இதுவரை 418 கோடி வசூலித்துள்ள காந்தாரா ஏ லெஜண்ட் சாப்டர் 1 திரைப்படம் இந்த பட்டியலில் 2-வது இடத்திற்கு முன்னேறியுள்ளது. இதன் மூலம் கன்னட சினிமா பாக்ஸ்ஆபீஸில் 2-வது மற்றும் 3-வது இடத்தை ஒரே படத்தின் 2 பாகங்கள் பிடித்துள்ளது, காந்தாரா கர்நாடகா மட்டும் இல்லாமல், இந்திய சினிமாவில் வசூல் வேட்டை நடத்தி வரும் நிலையில், தென்னிந்தியா, பாலிவுட் என பலதரப்பட்ட ரசிகர்கள் மத்தியில் பெரிய வரவேற்பினை பெற்று வருவது குறிப்பிடத்தக்கது.