கூலி, கே.ஜி.எஃப் வசூலை பின்னுக்கு தள்ளிய 'காந்தாரா சாப்டர் 1'... இதுவரையான பாக்ஸ் ஆபீஸ் கலெக்சன்!

நடிகர், இயக்குநர், கதையாசிரியர் என்ற பன்முகத் தன்மை கொண்ட ரிஷப் ஷெட்டி கன்னடத்தில் தவிர்க்க முடியாத இயக்குநராக வலம் வருகிறார். 'துக்ளக்’, ‘உலிதவரு கண்டந்தே’ போன்ற படங்களில் சிறிய கதாபாத்திரங்களில் நடித்த இவர் கடந்த 2014-ஆம் ஆண்டு வெளியான ‘ரிக்கி’ படத்தின் மூலம் இயக்குநராக அறிமுகமானார். தொடர்ந்து, ‘கிரிக் பார்ட்டி’ உள்ளிட்ட படங்களை இயக்கினார்.

ரிஷப் ஷெட்டி இயக்கிய படங்கள் பெரும் வரவேற்பை பெற்றது. தொடர்ந்து, இவர் கடந்த  2022-ஆம் ஆண்டு ‘காந்தாரா’ திரைப்படத்தை இயக்கி நடிக்கவும் செய்தார். இப்படம் முதலில் கன்னடத்தில் மட்டும் வெளியாகி நல்ல வரவேற்பை பெற்றது. தொடர்ந்து பான் இந்தியா மொழியில் டப் செய்யப்பட்டு திரையிடப்பட்ட நிலையில் வசூலை குவித்தது.

ரூ.16 கோடி செலவில் எடுக்கப்பட்ட இந்த படத்திற்கு உலகம் முழுவதும் ரசிகர்கள் கொடுத்த ஆதரவால் ரூ.500 கோடிக்கு மேல் வசூலை குவித்தது. ‘காந்தாரா’ திரைப்படம் முதலில் சீக்குவலாக வெளியான நிலையில் தற்போது அப்படத்தின் ப்ரீக்குவல் வெளியாகி உள்ளது. அதாவது ‘காந்தாரா சாப்டர் 1’  அக்டோபர் 2-ஆம் தேதி திரையரங்குகளில் வெளியானது.

இந்த படத்தில் கதாநாயகியாக ருக்மிணி வசந்த் நடித்துள்ளார். ஜெயராம் முக்கிய கதாபாத்திரத்தில் நடித்துள்ளார். இப்படத்தில் ருக்மணி நடித்துள்ள கதாபாத்திரம் ரசிகர்கள் மத்தியில் நல்ல வரவேற்பை பெற்று வருகிறது. ‘காந்தாரா சாப்டர் 1’ திரைப்படம் வெளியான முதல் நாளில் இருந்தே நல்ல விமர்சனங்களை பெற்று வருகிறது. இப்படம், வெளியான   6 நாட்களில் உலக அளவில் ரூ. 427.5 கோடியை வசூல் செய்துள்ளதாக படத்தின் தயாரிப்பு நிறுவனம் அதிகாரப்பூர்வமாக அறிவித்திருந்தது.

தொடர்ந்து, இப்படம் வசூலை குவித்து வருகிறது. இதன் மூலம் ‘காந்தாரா சாப்டர் 1’ திரைப்படம் ‘காந்தாரா’ மற்றும் ‘கே.ஜி.எஃப் சாப்டர் 1’ திரைப்படத்தின் வசூலை முறியடித்துள்ளது. அதுமட்டுமல்லாமல், கன்னடத்தில் அதிக வசூலை குவித்த இரண்டாவது திரைப்படம் என்ற பெருமையை ‘காந்தாரா சாப்டர் 1’ திரைப்படம் பெற்றுள்ளது. மேலும், ‘கே.ஜி.எஃப்’ இரண்டாம் பாகம் உலக அளவில் ரூ.1,250 கோடி வசூலித்த நிலையில் விரைவில் ‘காந்தாரா சாப்டர் 1’ திரைப்படம் இந்த வசூலை முறியடிக்கும் என்று கூறப்படுகிறது.

அதுமட்டுமல்லாமல், ‘காந்தாரா சாப்டர் 1’ திரைப்படம் தமிழில் கமல்ஹாசன் நடிப்பில் கடந்த 2022-ஆம் ஆண்டு வெளியான ‘விக்ரம்’ திரைப்படத்தின் வசூலையும் முறியடித்துள்ளதாக கூறப்படுகிறது. மேலும், அண்மையில் ரஜினி நடிப்பில் வெளியான ‘கூலி’ திரைப்படத்தின் வசூலையும் கடந்துள்ளதாக சினிமா வட்டாரங்கள் தெரிவிக்கின்றன.