9 வயதில் பரத நாட்டியம், கல்வி, விளையாட்டில் ஆல்ரவுண்டர்: 15-ல் தேசிய விருது, 21-வயதில் மரணம்: இந்த நடிகை சாதனை நாயகி!

திரைத்துறையில், சில நடிகர்கள் மக்கள் நினைவில் வைத்திருக்கும் அளவுக்கு பெரிய படங்களில் நடித்திருக்கமாட்டார்கள் ஆனால் ஒரு சில, நட்சத்திரங்கள் குறைவான திரைப்படங்களில் நடித்திருந்தாலும், கோடிக் கணக்கான ரசிகர்களின் இதயங்களைக் கவர்ந்து, தங்கள் பெயரை ரசிகர்களின் மனதில் என்றென்றும் வைத்திருப்பார்கள். இதன் விளைவாக, அவர்களின் அகால மறைவுக்குப் பிறகும் பல தசாப்தங்களுக்கு அவர்கள் நினைவுகூரப்படுகிறார்கள்.

இந்த செய்தியை ஆங்கிலத்தில் படிக்க இங்கே க்ளிக் செய்யவும்:

அந்த வகையில், தனது திரைப்பட வாழ்க்கை ஒரு தசாப்தத்திற்கும் குறைவாகவே இருந்தாலும், மோனிஷா உன்னியை தென்னிந்திய சினிமா இன்னும் மறக்கவில்லை. அதற்குக் காரணம், தனது 21 வயதில் இளம் வயதில் மறைவதற்கு முன் அவர் கொடுத்த மறக்க முடியாத நடிப்பும், திரைப்படங்களும் தான். மூத்த மோகினியாட்டம் நடனக் கலைஞரும் நடிகையுமான ஸ்ரீதேவி உன்னி மற்றும் நாராயணன் உன்னி ஆகியோரின் மகளான மோனிஷா, திரைப்பட உலகில் 1986-ம் ஆண்டு வெளியான நகுஷதங்கள் என்ற திரைப்படத்தில் நாயகியாக நடித்தார். இத்திரைப்படம் ஞானபீட விருது மற்றும் பல தேசிய விருதுகளை வென்ற எழுத்தாளர் எம்.டி. வாசுதேவன் நாயர் மற்றும் மலையாளத் திரையுலகின் மிகவும் கொண்டாடப்பட்ட எழுத்தாளர்-இயக்குநர் ஜோடிகளில் ஒருவரான பழம்பெரும் திரைப்படத் தயாரிப்பாளர் ஹரிஹரன் ஆகியோரால் உருவாக்கப்பட்டது.

கேரளத்தின் கலாச்சாரப் பின்னணியில் ஆழமாக வேரூன்றிய தீவிரமான இசை, காதல் முக்கோணக் கதையான 'நகுஷதங்கள்', பரவலான பாராட்டைப் பெற்றது. இதன் மூலம், 15 வயதான மோனிஷாவுக்கு சிறந்த நடிகைக்கான தேசிய திரைப்பட விருது கிடைத்தது. இதன மூலம் இந்த விருதைப் பெற்ற இளைய நடிகை என்ற பெருமையையும் அவர் பெற்றார். அவரது நடிப்பு மிகவும் தாக்கத்தை ஏற்படுத்தியதால், மலையாளத் திரையுலகின் மிகவும் கொண்டாடப்பட்ட திரைப்பட ஜாம்பவான்கள் அவரைத் தங்கள் படங்களில் நடிக்க வைக்க விரைந்தனர். எம்.டி. எழுதிய ரிதுபேதம் படத்தில் பிரதாப் போத்தனுடன் இணைந்து நடித்ததுடன், அதே ஆண்டில் சாயாம் சந்தியா படத்தில் ஜோஷியுடனும் அவர் நடித்திருந்தார். 

'நகுஷதங்கள்' திரைப்படம் அடுத்த ஆண்டு தமிழில் பூக்கள் விடும் தூது என்று ரீமேக் செய்யப்பட்டபோது, மோனிஷாவைத் தவிர வேறு யாரையும் அந்தப் பாத்திரத்தில் நடிக்க வைக்க தயாரிப்பாளர்கள் நினைத்துப் பார்க்கவில்லை. சினிமா சகாப்தமான சிங்கிதம் சீனிவாசராவ் இயக்கிய கன்னட காதல் நாடகமான சிரஞ்சீவி சுதாகர் படத்திலும் அவர் கதாநாயகியாக நடித்தார். எம்.டி. வாசுதேவன் நாயர் மோனிஷாவின் நடிப்பால் மிகவும் ஈர்க்கப்பட்டார். அவர் தனது சில திரைப்படங்களில், அதாவது பெருந்தச்சன் (1990), வேணல் கினாவுகள் (1991), மற்றும் கடவு (1991) ஆகியவற்றில் அவருக்கு முக்கிய கேரக்டர்களை கொடுத்தார். 

மேலும், மோகன்லாலுடன் பிரியதர்ஷனின் ஆரியன் (1988), கே.மதுவின் அதிபன் (1989), மற்றும் சிபி மலையிலின் கமலதளம் (1992)  மூன்று குறிப்பிடத்தக்க படங்களில் அவர் பணியாற்றினார். இந்த திரைப்படங்களில், மோகன்லால் போலவே, மோனிஷாவின் நடிப்பும் பாராட்டையும் கவனத்தையும் ஈர்த்தது. தனது தாயைப் போலவே, மோனிஷாவும் ஒரு திறமையான நடனக் கலைஞர். "சிறு வயதிலிருந்தே, மோனிஷா ஒரு திறமையான நடனக் கலைஞராகவும் பாடகியாகவும் இருந்தார். அவர் விளையாட்டிலும் பங்கேற்று, ஒரு 'ஆல்-ரவுண்டராக' திகழ்ந்தார். 

அவரது பரதநாட்டிய அரங்கேற்றம் 9 வயதில் நடந்தது. 10 வயதில் இருந்து, அவர் பல மேடைகளில் நடனமாடினார். அவர் ஏழாம் வகுப்பு படிக்கும்போதுதான் 'நகுஷதங்கள்' படத்திற்காக அழைக்கப்பட்டார்," என்று ஸ்ரீதேவி 2017 இல் ஸ்கிரீன் உடனான ஒரு நேர்காணலில் பகிர்ந்துள்ளார். அவர் மேலும் கூறுகையில், "அவளைவிட நான் தான் அவள் நடிகையாக வர வேண்டும் என்று விரும்பினேன். இரண்டு மூன்று படங்கள் செய்த பிறகு, அவளுக்கு நடிப்பு பிடிக்க ஆரம்பித்தது. இருப்பினும், அவளுக்கு அதில் கண்மூடித்தனமான மோகம் இல்லை. அவர் திரைக்குப் பின்னால் இருக்க விரும்பினார். 'நான் இன்னும் கொஞ்ச காலம் நடித்து, கொஞ்சம் பணம் சம்பாதித்து, பிறகு நான் கேமராவுக்குப் பின்னால் இருப்பேன்' என்று அவள் சொல்வாள். அந்தக் காலங்களில், யாரும் கேமராவுக்குப் பின்னால் இருக்க விரும்பியதில்லை, ஆனால் மோனிஷா வித்தியாசமானவர். அவர் நல்ல ஃபிரேமிங் உணர்வு கொண்ட குழந்தை என்று கூறியிருந்தார்.

மிகப்பெரிய உயரங்களைத் தொடக்கூடிய ஆற்றலும், வாக்குறுதியும் நிரம்பி, அவர் இப்பதான் தொடங்கினார். ஆனால், ஒரு சோகமான சம்பவம் அவரது அனைத்து அபிலாஷைகளையும் குறைத்தது. 1992 ஆம் ஆண்டு டிசம்பர் 5 ஆம் தேதி ஆழப்புழா மாவட்டத்தில் உள்ள சேர்த்தலைக்கு அருகில் நடந்த சாலை விபத்தில் மோனிஷா மரணமடைந்தார். அந்த நேரத்தில், அவர் மலையாளத் திரைப்படமான சேப்பாடிவித்யாவில் நடித்துக் கொண்டிருந்தார். அந்த விபத்து நடந்த துயரமான நாளை நினைவுகூர்ந்த அவரது தாயார் ஸ்ரீதேவி, ஒருமுறை ஆன் மனோரமா உடனான நேர்காணலின் போது "நாங்கள் திருவனந்தபுரத்தில் இருந்து காலை விமானத்தைப் பிடிக்கச் சென்று கொண்டிருந்தோம். சாலை தெளிவாக இருந்தது. இருப்பினும், எதிரே வரும் வாகனங்களின் முகப்பு விளக்கு எங்கள் ஓட்டுநரின் முகத்தில் விழுவதைக் கவனித்தேன். அவர் தூங்கிவிடக் கூடாது என்பதற்காக நான் அவரிடம் பேசிக்கொண்டே இருந்தேன். என் மகள் பின் இருக்கையில் தூங்கிக் கொண்டிருந்தாள்.

அந்த இடத்தின் தனித்துவமான புவியியல் அம்சத்தாலும் விபத்து நடந்ததாக நான் நினைக்கிறேன். பின்னர், அந்த குறிப்பிட்ட சந்திப்பில் பல விபத்துக்கள் நடந்திருப்பதை நான் அறிந்தேன். சேர்த்தலையில் சாலை தெளிவாக இருந்தது, அது எந்த ஓட்டுநரையும் வேகத்தைக் கூட்டத் தூண்டும். இதை நான் உணர்ந்து அவரிடம் பேசிக்கொண்டே இருந்தேன். அது காலை 6 மணி. வெளியேயும் பனிமூட்டமாக இருந்தது. எங்களை முந்திச் சென்ற ஒரு பேருந்தின் ஒளியை என்னால் பார்க்க முடிந்தது. ஆனால் அது திடீரென எங்கள் காரைத் தாக்கியது. எங்கள் ஓட்டுநர் ஒரு நொடி தூங்கியிருக்கலாம் என்று நினைக்கிறேன், உறுதியாகத் தெரியவில்லை. பேருந்து எங்கள் காரைத் தாக்கும் கணம் வரை நாங்கள் பேசிக் கொண்டிருந்தோம். என்ன நடக்கிறது என்பதை உணரும் முன்பே, நான் தூக்கி எறியப்பட்டேன், கார் தலைகீழாகக் கவிழ்ந்தது," என்று ஸ்ரீதேவி கூறினார்.

இந்த விபத்தில் குறிப்பிடத்தக்க காயங்களுடன் ஸ்ரீதேவி தப்பித்தாலும், மோனிஷாவின் உயிரைக் காப்பாற்ற முடியவில்லை. மோனிஷாவின் மகத்தான திறமையைக் கருத்தில் கொண்டால், அதன் காட்சிகளை அவர் 21 வயதிலேயே வெளிப்படுத்திக் காட்டி, மக்களிடையே வென்றார். அவர் இன்று நம்முடன் இருந்திருந்தால், அவர் அடைந்திருக்கக்கூடிய உயரங்களை நினைத்துப் பார்ப்பது கூட கடினம்.