ஜனவரி 26ஆம் தேதி ரிலீஸாகிறது சாய் பல்லவியின் முதல் தமிழ்ப்படம்

சாய் பல்லவி நடித்துள்ள முதல் தமிழ்ப்படமான ‘கரு’, வருகிற ஜனவரி 26ஆம் தேதி ரிலீஸாக இருக்கிறது.

‘பிரேமம்’ மலையாளப் படத்தின் மூலம் இளைஞர்களின் மனதைக் கொள்ளை கொண்டவர் சாய் பல்லவி. மலர் டீச்சரிடம் மனதைப் பறிகொடுக்காத இளைஞர்களை, விரல்விட்டு எண்ணிவிடலாம். தெலுங்கில் ‘ஃபிடா’ படத்தின் மூலம் அறிமுகமான சாய் பல்லவி, தமிழில் ‘கரு’ படத்தின் மூலம் அறிமுகமாக இருக்கிறார்.

‘கரு’ படத்தை, விஜய் இயக்கியுள்ளார். தமிழ் மற்றும் தெலுங்கில் உருவாகியுள்ள இந்தப் படம், அபார்ஷனை மையமாகக் கொண்டு எடுக்கப்பட்டுள்ளது. இந்தப் படத்தில், நாக செளரியா, ஆர்.ஜே.பாலாஜி, சந்தான பாரதி, ரேகா, நிழல்கள் ரவி, ஸ்டண்ட் சில்வா ஆகியோர் நடித்துள்ளனர்.

நீரவ் ஷா ஒளிப்பதிவு செய்துள்ள இந்தப் படத்துக்கு, சாம் சி.எஸ். இசை அமைத்துள்ளார். லைகா நிறுவனம், இந்தப் படத்தைத் தயாரித்துள்ளது. நான்கு வயது குழந்தைக்கு அம்மாவாக இந்தப் படத்தில் நடித்திருக்கிறார் சாய் பல்லவி. அடுத்த ஆண்டு ஜனவரி மாதம் 26ஆம் தேதி படத்தை ரிலீஸ் செய்யத் திட்டமிட்டுள்ளனர்.

அன்றைய தினம், ரஜினிகாந்த் நடித்துள்ள ‘2.0’ ரிலீஸாவதாக அறிவிக்கப்பட்டுள்ளது. ஆனால், ‘2.0’ புரொடக்‌ஷன் பணிகள் திட்டமிட்டபடி முடியாது என்பதால், ‘2.0’ படத்துக்குப் பதிலாக ‘கரு’ படத்தை ரிலீஸ் செய்யத் திட்டமிட்டுள்ளது லைகா நிறுவனம்.