28 வருஷம் ஆச்சு, தியேட்டருக்கு அதிகம் பேர் வந்து பார்த்த படம் இதுதான்: காமெடி படத்தின் சீரியஸ் ரெக்கார்டு!

தமிழ் திரையுலகில் முக்கிய நடிகர்களில் ஒருவராக வலம் வருபவர் சரத்குமார். இவர் கதாநாயகன், குணசித்திர வேடம் என பல பரிணாமங்களில் கலக்கியுள்ளார். சரத்குமார் கதாநாயகனாக நடித்த படங்களில் சில காலம் கடந்தாலும் ரசிகர்கள் மனதில் நீங்கா இடம் பிடித்துள்ளது. அந்த வரிசையில் இடம்பெற்ற ஒரு படம் தான் ‘சூர்யவம்சம்’.  கடந்த 1997-ஆம் ஆண்டு இயக்குநர் விக்ரமன் இயக்கத்தில் சரத்குமார் கதாநாயகனாக நடித்த திரைப்படம் ‘சூர்யவம்சம்’.

இந்த படத்தில் தேவயானி, மணிவண்ணன், சுந்தர் ராஜன், ஆனந்தராஜ், பிரியா ராமன், ஜெய் கணேஷ், அஜய் ரத்னம் உள்ளிட்டோர் முக்கிய கதாபாத்திரத்தில் நடித்திருந்தனர். சூப்பர் குட் பிலிம்ஸ் சார்பாக ஆர்.பி.சவுத்ரி தயாரித்திருந்த இந்த படத்திற்கு எஸ்.ஏ. ராஜ்குமார் இசையமைத்திருந்தார். 'சூர்யவம்சம்’ படத்தில்  இடம்பெற்ற ’ரோஜாப்பூ சின்ன ரோஜாப்பூ’, ’சலக்கு சலக்கு சருகை சேல’ என எல்லா பாடலும் சூப்பர் டூப்பர் ஹிட். 90-ஸ் கிட்ஸ்களின் மனம் கவர்ந்த படமான சூர்ய வம்சம், மீம் கிரியேட்டர்களுக்கு தொடர்ந்து கன்டென்டுகளை கொடுத்து வருகிறது.

ஞாயிற்று கிழமை வந்து விட்டால் சின்னராசை கையில் பிடிக்க முடியாது, ராதிகா பேசும் டயலாக் உள்ளிட்டவை அதிக எண்ணிக்கையில் மீம்ஸ்களாக ரசிக்கப்பட்டன. இந்நிலையில், அதிக ரசிகர்கள் வந்து பார்த்த படம் என்ற பெருமையை ‘சூர்யவம்சம்’ திரைப்படம் பெற்றுள்ளதாக நடிகர் சரத்குமார் தெரிவித்துள்ளார். இதுகுறித்து நேர்காணலில் பேசிய அவர், “சூர்ய வம்சம் ரிலீஸின் போது நான், விக்ரமன் சார், செளத்ரி எல்லாம் திரையரங்கு வெளியில் ரிவ்யூ கேட்பதற்காக நின்று கொண்டு இருந்தோம். அப்போது ஒரு இயக்குநர் வந்து எங்களை எல்லாம் அழைத்து சென்று என்ன படம் எடுத்திருக்கிறீர்கள். எப்படி இந்த படம் ஓடும் என்று சொல்லிவிட்டு சென்றுவிட்டார். 

அப்போது எங்களுக்கு அதிர்ச்சியாக இருந்தது. எல்லோரும் நன்றாக இருக்கிறது என்கிறார்கள், இவ்வளவு பெரிய இயக்குநர் படம் நன்றாக இல்லை என்று சொல்லிவிட்டாரே என்று நினைத்தோம். ஒவ்வொரு ஆளுக்கும் ஒவ்வொரு டேஸ்ட் இருக்கும். ஆடியன்ஸ் என்ன நினைக்கிறார்கள், அவர்களுக்கு அந்த படத்தில் என்ன பிடித்திருக்கிறது என்பது தான் முக்கியம். சில நேரம் நம் பார்வையை விட ஆடியன்ஸ் பார்வை ரொம்ப முக்கியம். அந்த விதத்தில் இன்று வரை அதிக ஆடியன்ஸ் பார்த்த திரைப்படம் என்றால் அது ’சூர்யவம்சம்’ திரைப்படம் தான். வேன், மாட்டு வண்டி கட்டிக் கொண்டுலாம் மக்கள் படம் பார்க்க வந்தார்கள்” என்றார்.