ரேவதி முதல் சரத்குமார் வரை; நடிகை வீட்டில் நடந்த 80ஸ் ரியூனியன் கொண்டாட்டம்: சிரஞ்சீவி நெகிழ்ச்சி

தென்னிந்தியத் திரையுலகின் மனதுக்கு நெருக்கமான வருடாந்திர நிகழ்வான, ரீயூனியன் (Reunion), மூன்று ஆண்டுகள் இடைவெளிக்குப் பிறகு, இந்த ஆண்டு அக்டோபர் 4-ஆம் தேதி சென்னையில் நடைபெற்றது. இந்த உணர்வுப்பூர்வமான சந்திப்பில், பெரிதும் எதிர்பார்க்கப்பட்ட 80களின் நட்சத்திரங்கள் பங்கேற்றிருந்தனர்.

சிரஞ்சீவி, வெங்கடேஷ், ஜாக்கி ஷெராஃப், சரத்குமார், ராஜ்குமார் சேதுபதி, ஸ்ரீபிரியா, நதியா, ராதா, சுஹாசினி, ரம்யா கிருஷ்ணன், ஜெயசுதா, சுமலதா, ரஹ்மான், குஷ்பு, பாக்யராஜ், பூர்ணிமா பாக்யராஜ், லிஸ்ஸி, நரேஷ், சுரேஷ், ஷோபனா, மேனகா, ரேவதி, பிரபு, ஜெயராம், அஸ்வதி ஜெயராம், சரிதா, பானுசந்தர், மீனா, லதா, ஸ்வப்னா, மற்றும் ஜெயஸ்ரீ  உள்ளிட்ட பலர் கலந்துகொண்டனர்.

உண்மையில், இந்த ரீயூனியன் 2024-ஆம் ஆண்டு நடத்த திட்டமிடப்பட்டிருந்தது. ஆனால், சென்னையில் ஏற்பட்ட வரலாறு காணாத வெள்ளப் பெருக்கு காரணமாக இது ஒத்திவைக்கப்பட்டது. இந்த ஆண்டு, இந்த சந்திப்பு ஒரு பெரிய கொண்டாட்டமாக இல்லாமல், தமிழகத்தை சமீபத்தில் பாதித்த நிகழ்வுகளை மனதில் கொண்டு, நட்பு, ஒற்றுமை மற்றும் ஒருமைப்பாட்டைக் கொண்டாடும் ஒரு நெருக்கமான, எளிமையான சந்திப்பாக வேண்டுமென்றே குறைத்து நடத்தப்பட்டது.

வழக்கமாக ஐந்து நட்சத்திர விடுதியில் நடைபெறும் இந்த நிகழ்வு, நடிகர்களின் ஒருமித்த கோரிக்கையை ஏற்று, இந்த முறை ராஜ்குமார் சேதுபதி மற்றும் ஸ்ரீபிரியா அவர்களின் இல்லத்தில் மிகச் சிறப்பாக நடைபெற்றது. அவர்களின் இந்த விருந்தோம்பல் அனைவராலும் பாராட்டப்பட்டது. மொத்தம் 31 நடிகர்கள் கலந்துகொண்ட இந்த நிகழ்வில் தமிழகம், கேரளா, கர்நாடகா, ஆந்திரப் பிரதேசம், தெலுங்கானா மற்றும் ஹிந்தி திரையுலகில் இருந்தும் முக்கிய நட்சத்திரங்கள் வந்திருந்தனர்.

இந்த ரீயூனியன் அரவணைப்பு, அசைபோடல் மற்றும் தோழமை உணர்வால் நிரம்பியிருந்தது. காலம் கடந்தாலும், 1980களில் உருவான பிணைப்புகள் இன்னமும் வலுவாக உள்ளன என்பதை இது மீண்டும் ஒருமுறை நிரூபித்தது. மாலை முழுவதும், நடிகர்கள் தங்களுக்குள்ளான நினைவுகள், யோசனைகள், சினிமா மற்றும் வாழ்க்கை பற்றிய எண்ணங்களைப் பகிர்ந்து கொண்டனர். மொழி, எல்லைகள் கடந்து தங்களை இணைக்கும் இந்த பங்களின் பன்முகத்தன்மையைக் கொண்டாடினர். விடியற்காலை நெருங்கும்போது, அனைவரும் தங்கள் இல்லங்கள் மற்றும் பணி இடங்களுக்குப் புறப்பட்டனர். நீடித்த நட்பின் புதிய பலத்தையும், இந்த ஒன்றுகூடி இருந்த ஆறுதலையும் தங்கள் மனதில் சுமந்து சென்றனர்.

Every reunion with my beloved friends from the 80s is a walk down memory lane, filled with laughter, warmth, and the same unbreakable bond we’ve shared for decades.☺️

So many beautiful memories, and yet every meet feels as fresh as the first! ❤️#80sStarsReunionpic.twitter.com/97uT70U4CV

— Chiranjeevi Konidela (@KChiruTweets) October 5, 2025

இந்த சந்திப்பு குறித்து தனது எக்ஸ் தளத்தில் பதிவிட்டுள்ள நடிகர் சிரஞ்சீவி, "80களில் இருந்த என் அன்பான நண்பர்களுடனான ஒவ்வொரு சந்திப்பும், சிரிப்பு, அரவணைப்பு மற்றும் பல தசாப்தங்களாக நாம் பகிர்ந்து கொண்ட அதே பிரிக்க முடியாத பிணைப்பால் நிரம்பிய நினைவுப் பாதையில் ஒரு நடைப்பயணம். பல அழகான நினைவுகள், ஆனாலும் ஒவ்வொரு சந்திப்பும் முதல் சந்திப்பைப் போலவே புதியதாக உணர்கிறது என்று பதிவிட்டுள்ளார்.