தனுஷின் 'இட்லி கடை'க்கு தமிழக பா.ஜ.க திடீர் பாராட்டு: தமிழக அரசு வரிவிலக்கு வழங்க வேண்டுகோள்

தனுஷ் இயக்கி நடித்துள்ள இட்லி கடை திரைப்படம் வெளியாகி ரசிகர்கள் மத்தியில் நல்ல வரவேற்பை பெற்று வரும் நிலையில், இந்த படத்திற்கு, தமிழ்நாடு அரசு வரி விலக்கு அளிக்க வேண்டும் பாஜக செய்தித் தொடர்பாளர் ஏ.என்.எஸ்.பிரசாத் வலியுறுத்தியுள்ளார்.

தமிழ் சினிமாவில் பன்முக திறமை கொண்ட நட்சத்திரமாக இருக்கும் தனுஷ் நடிப்பில் வெளியான படம் இட்லி கடை. அவரே கதை திரைக்கதை எழுதி இயக்கிய இந்த படத்தில், அருண்விஜய், நித்யா மேனன், சத்யராஜ், ராஜ்கிரண், சமுத்திரக்கனி, பார்த்திபன் உள்ளிட்ட பலர் நடித்திருந்தனர். ஜி.வி.பிரகாஷ்குமார் இந்த படத்திற்கு இசையமைத்திருந்தார். படத்தின் பாடல்கள் நல்ல வரவெற்பை பெற்றிருந்த நிலையில், கடந்த அக்டோபர் 1-ந் தேதி ஆயுதபூஜை தினத்தை முன்னிட்டு இந்த படம் திரையரங்குகளில் வெளியானது.

இந்த படத்திற்கு வரி விலக்கு அளிகக் வேண்டும் என்று தமிழ்நாடு அரசுக்கு கோரிக்கை வைத்துள்ள பாஜக செய்தித் தொடர்பாளர் ஏ.என்.எஸ்.பிரசாத், தனது அறிக்கையில், 'இட்லிக் கடை' ஒரு "உயர்ந்த எண்ணங்களை விதைக்கும், கருணையைப் போதிக்கும், நமது பாரம்பரிய விழுமியங்களைக் கொண்டாடும்" படைப்பு என்று கூறியுள்ளார். அவரது கருத்துப்படி, இத்திரைப்படத்தின் கதைக்களம், எதிர்மறை மதிப்புகளைப் பரப்பும் திரைப்படங்களுக்கு மாறாக, கருணை மற்றும் சமூகப் பிணைப்பில் வேரூன்றிய பாடங்களை வழங்குகிறது.

அதே சமயம், பாரம்பரியவாதம் மற்றும் சாதி அடிப்படையிலான தொழில்களைச் சித்தரிப்பதாகக் கூறப்படும் விமர்சனங்களை நிராகரித்த பிரசாத், 'இட்லிக் கடை' "எந்தவொரு தொழிலிலும் சுயமரியாதை மற்றும் நேர்மையைக் கொண்டாடுகிறது, இத்திரைப்படம் கல்வியின் நோக்கம் மற்றும் ஒருவர் தனது பாரம்பரியத்துடனான பிணைப்பைப் பற்றிய ஒரு பரந்த செய்தியைக் கொண்டுள்ளது. "ஒருவரின் கல்வி, வேர்கள் அல்லது குடும்பத்திலிருந்து அந்நியப்படுத்தாமல், தேசத்திற்குப் பயன்பட வேண்டும்" என்றும் அவர் குறிப்பிட்டார்.

மேலும், பரவலான ரசிகர்களுக்கு உரிய ஒரு திரைப்படத்தை வழங்கியதற்காக நடிகர் தனுஷுக்கு வாழ்த்து தெரிவித்த அவர், தமிழக அரசு 'இட்லிக் கடை' திரைப்படத்திற்கு வரி விலக்கு அளிப்பதுடன், அரசுப் பள்ளிகள் மற்றும் கிராமப்புற மாணவர்களுக்கு இலவசமாக திரையிட ஏற்பாடு செய்ய வேண்டும் என்றும் அவர் பரிந்துரைத்தார். குழந்தைகள், மாணவர்கள் மற்றும் குடும்பங்களுக்கு மனிதநேயம் மற்றும் அஹிம்சையைப் போதிக்கும் வாழ்க்கையை உறுதிப்படுத்தும் படம். இளைஞர்களுக்கும் குடும்பங்களுக்கும் முக்கியமான தார்மீகப் பாடங்களை இத்திரைப்படம் வழங்க முடியும்.

தொழிலின் கண்ணியம் மற்றும் ஒருவர் தனது பரம்பரைத் தொழிலை வெட்கமின்றித் தொடர்வதில் உள்ள பெருமையை இத்திரைப்படம் அழகாகப் படம்பிடித்துக் காட்டுகிறது. செல்வத்தையும் அந்தஸ்தையும் விட நேர்மை, அன்பு மற்றும் ஒற்றுமை ஆகியவை வெற்றிக்கான சிறந்த அளவுகோல்கள் என்பதை இது நமக்கு நினைவூட்டுகிறது. மேலும், இத்திரைப்படத்தின் கதை "இளைஞர்களின் மனதைத் தூய்மைப்படுத்துகிறது மற்றும் பெற்றோர், கலாச்சாரம் மற்றும் தாய்நாட்டின் மீதான மரியாதையைத் தூண்டுகிறது. இட்லிக் கடை' திரைப்படத்திற்கு வரி விலக்கு அளிப்பதற்கான தமிழக அரசின் முடிவை ஆவலுடன் எதிர்பார்த்துக் காத்திருப்பதாக பாஜக தரப்பில் தெரிவிக்கப்பட்டுள்ளது.