சிறப்பு தீவிரத் திருத்தம் 2025: வாக்காளர் பட்டியலில் பெயர் நீங்காமல் இருக்க நீங்கள் செய்ய வேண்டியது என்ன?

இந்தியா முழுவதும் உள்ள சுமார் 100 கோடி பதிவுசெய்யப்பட்ட வாக்காளர்களில், ஏறக்குறைய பாதிப் பேர் – அதாவது 12 மாநிலங்கள் மற்றும் யூனியன் பிரதேசங்களில் உள்ள வாக்காளர்கள் – இப்போது புதிய வாக்காளர் கணக்கெடுப்பு படிவத்தை (Enumeration Form) நிரப்ப வேண்டிய கட்டாயத்தில் உள்ளனர்.

வாக்காளர் பட்டியலில் தொடர்ந்து நீடிக்க, அவர்கள் சுமார் இருபது ஆண்டுகளுக்கு முன் நடந்த கடைசி தீவிரத் திருத்தத்தில் வெளியிடப்பட்ட பட்டியலில் தங்கள் பெயர், அல்லது தங்கள் பெற்றோர் அல்லது உறவினர்களின் பெயரைக் கண்டறிந்து நிரப்ப வேண்டும். அவ்வாறு செய்ய முடியாதவர்கள், தங்கள் தகுதியை நிரூபிக்க ஆவணங்களைச் சமர்ப்பிக்க வேண்டும்.

எனவே, நீங்கள் அந்தமான் & நிக்கோபார் தீவுகள், சத்தீஸ்கர், கோவா, குஜராத், கேரளா, லட்சத்தீவுகள், மத்தியப் பிரதேசம், புதுச்சேரி, ராஜஸ்தான், தமிழ்நாடு, உத்தரப்பிரதேசம் அல்லது மேற்கு வங்காளம் ஆகிய மாநிலங்கள்/யூனியன் பிரதேசங்களில் பதிவுசெய்யப்பட்ட வாக்காளராக இருந்தால், வாக்காளர் பட்டியலில் உங்கள் பெயர் நீடிப்பதை உறுதிசெய்ய, அடுத்த மூன்று மாதங்களில் நீங்கள் செய்ய வேண்டியவை இங்கே கொடுக்கப்பட்டுள்ளன:

படி 1: உங்கள் கணக்கெடுப்பு படிவத்தைப் பெறுங்கள் (நவம்பர் 4 – டிசம்பர் 4)

வாக்காளர் பட்டியலில் உங்கள் பெயர் தொடர்ந்து நீடிக்க, இந்த படிவத்தை நிரப்பி சமர்ப்பிப்பது முதல் படி.

நவம்பர் 4 முதல் டிசம்பர் 4 வரை, தேர்தல் ஆணையத்தின் சாவடி நிலை அலுவலர்கள் (BLO) வீடுகளுக்கு (தேவைப்பட்டால் மூன்று முறை வரை) வந்து, முன்பே அச்சிடப்பட்ட கணக்கெடுப்பு படிவங்களை விநியோகிப்பார்கள். இந்த 12 மாநிலங்கள் மற்றும் யூனியன் பிரதேசங்களில் தற்போது வாக்காளர் பட்டியலில் உள்ள ஒவ்வொரு பதிவுசெய்யப்பட்ட வாக்காளரும், டிசம்பர் 9 அன்று வெளியிடப்படவிருக்கும் வரைவு வாக்காளர் பட்டியலில் தங்கள் பெயர் இடம்பெறுவதை உறுதிசெய்ய இந்தப் படிவத்தை நிரப்பி சமர்ப்பிக்க வேண்டும்.

பி.எல்.ஒ. (BLO) உங்கள் வீட்டிற்கு வரும்போது, உங்கள் பெயர், வாக்காளர் புகைப்பட அடையாள அட்டை (EPIC) எண், முகவரி, சட்டமன்றத் தொகுதி, பகுதி மற்றும் வரிசை எண் மற்றும் தற்போதைய புகைப்படம் ஆகிய விவரங்களுடன் முன்பே நிரப்பப்பட்ட கணக்கெடுப்பு படிவத்தை நீங்கள் பெறுவீர்கள். 

உங்கள் பி.எல்.ஒ.  (BLO) இன்னும் வரவில்லை என்றால் அல்லது காத்திருக்க வேண்டாம் என்று நினைத்தால் voters.eci.gov.in இணையதளம் அல்லது ECINet செயலிக்கு சென்று, உங்கள் (EPIC) எண்ணைப் பயன்படுத்தி உங்கள் பி.எல்.ஒ. -ன் தொடர்பு எண்ணைக் கண்டறியலாம் அல்லது படிவத்தை நேரடியாகப் பதிவிறக்கம் செய்து நிரப்பலாம்.

படி 2: உங்கள் விவரங்களைச் சரிபார்த்து நிரப்பவும்

உங்கள் கணக்கெடுப்பு படிவத்தில் உங்கள் பெயர், வாக்காளர் புகைப்பட அடையாள அட்டை (EPIC) எண், முகவரி, சட்டமன்றத் தொகுதி மற்றும் புகைப்படம் போன்ற உங்கள் தகவல்களில் சில ஏற்கெனவே அச்சிடப்பட்டிருக்கும். இந்த விவரங்களை கவனமாகச் சரிபார்க்கவும். பின்னர் பிறந்த தேதி, பெற்றோர்/துணையின் பெயர், EPIC எண் (கிடைத்தால்), மொபைல் எண் மற்றும் ஆதார் எண் (விருப்பம்) போன்ற விடுபட்ட விவரங்களை நிரப்பவும்.

இந்த 12 மாநிலங்கள் மற்றும் யூனியன் பிரதேசங்களில் நடக்கும் சிறப்பு தீவிரத் திருத்தத்திற்காக, தேர்தல் ஆணையம் கணக்கெடுப்பு படிவத்தில் ஒரு புதிய பிரிவைச் சேர்த்துள்ளது. 

• 2002 மற்றும் 2005-க்கு இடைப்பட்ட காலத்தில் நடைபெற்ற கடைசி தீவிரத் திருத்தத்தின்போது வெளியிடப்பட்ட பழைய வாக்காளர் பட்டியலில், உங்கள் பெயரை அல்லது உங்கள் பெற்றோர்/நெருங்கிய உறவினரின் (அத்தை, மாமா உட்பட) பெயரைக் கண்டறிந்து, அந்தத் தொகுதி எண், பகுதி எண் மற்றும் வரிசை எண் போன்ற விவரங்களைப் படிவத்தில் நிரப்ப வேண்டும்.

எங்கு தேடுவது? voters.eci.gov.in என்ற இணையதளத்தில் தேர்தல் ஆணையம் பராமரிக்கும் பழைய (SIR) பதிவேடுகளை நீங்கள் அணுகலாம்.

இது எவ்வாறு செயல்படுகிறது என்பதைக் காண்போம்: நீங்கள் அகமதாபாத்தில் வசித்து வாக்களிப்பதாக வைத்துக்கொள்வோம். voters.eci.gov.in இல் உள்நுழைந்து, குஜராத்தின் கடைசிக் தீவிரத் திருத்த ஆண்டான ஜனவரி 1, 2002-ஐக் குறிப்புத் தேதியாகக் கொண்ட வாக்காளர் பட்டியலைக் கண்டறியவும். அதில் உங்கள் பெயரைக் கண்டுபிடித்து, சட்டமன்றத் தொகுதியின் பெயர், பகுதி எண் மற்றும் வரிசை எண்ணைக் குறித்துக்கொள்ளுங்கள். பின்னர் இந்தப் படிவத்தில் அந்த விவரங்களை நிரப்பவும். பி.எல்.ஒ (BLO) வரும்போது தகவலைக் கண்டறிய சிரமப்படாமல் இருக்க, இந்தப் படிவத்தை நீங்கள் முன்கூட்டியே voters.eci.gov.in இல் தேடிப் பார்ப்பது சிறந்தது.

நீங்கள் இப்போது அகமதாபாத்தில் வசித்தாலும், சமீபத்தில் மேற்கு வங்காளத்திலிருந்து இங்கு வந்திருந்தால், ஜனவரி 1, 2002 குறிப்புத் தேதியாகக் கொண்ட மேற்கு வங்கத்தின் பழைய வாக்காளர் பட்டியலில் உங்கள் பெயரைத் தேடி, அந்த விவரங்களை உங்கள் படிவத்தில் நிரப்ப வேண்டும்.

எந்தவொரு மாநிலத்தின் பழைய சிறப்பு தீவிர திருத்த (SIR) பட்டியலில் உங்கள் பெயரைக் கண்டறிய முடியவில்லை என்றால் (அல்லது அந்த நேரத்தில் நீங்கள் வாக்காளராகப் பதிவு செய்யப்படவில்லை என்றால்), அதற்குப் பதிலாக உங்கள் பெற்றோர் அல்லது நெருங்கிய உறவினரின் (அத்தை, மாமா அல்லது அதே தலைமுறையைச் சேர்ந்த எவரேனும்) பெயரைத் தேடவும். எந்தவொரு மாநிலம் அல்லது யூனியன் பிரதேசத்தின் கடைசி தீவிரத் திருத்தத்தின் வாக்காளர் பட்டியலில் உங்கள் அல்லது குடும்ப உறுப்பினரின் பெயரைக் கண்டறிய முடிந்தால், நீங்கள் அந்த விவரங்களை மட்டும் நிரப்பினால் போதும். இந்த நிலையில் நீங்கள் எந்த ஆவணங்களையும் சமர்ப்பிக்கத் தேவையில்லை என்று ஆணையம் மிகத் தெளிவாகக் கூறியுள்ளது.

படி 3: படிவத்தைச் சமர்ப்பித்தல் (நேரடியாக/ ஆன்லைனில்)

அனைத்து விவரங்களையும் பூர்த்தி செய்து, பழைய பட்டியலுடன் உங்கள் இணைப்பை நிறுவிய பிறகு, நீங்கள் கையொப்பமிட்டுப் படிவத்தைச் சமர்ப்பிக்க வேண்டும்.

நீங்கள் உங்கள் பி.எல்.ஒ. (BLO) வரும்போது அவரிடம் நேரடியாகக் கொடுக்கலாம் அல்லது voters.eci.gov.in மூலம் ஆன்லைனில் சமர்ப்பிக்கலாம்.

சாவடி நிலை அலுவலர் (BLO) வாக்காளரிடமிருந்து படிவத்தின் ஒரு நகலைச் சேகரித்து, மற்ற நகலை ஒப்புதல் ரசீதாக வாக்காளரிடம் வழங்க வேண்டும். நீங்கள் படிவத்தை ஆன்லைனில் சமர்ப்பித்திருந்தால், உங்கள் பதிவுகளுக்காக ஒப்புதல் ரசீதின் ஸ்கிரீன்ஷாட்டை எடுத்து வைக்கவும். உங்கள் பி.எல்.ஓ (BLO) வரும்போது, நீங்கள் ஏற்கெனவே ஆன்லைனில் செயல்முறையை முடித்துவிட்டீர்கள் என்று அவர்களுக்குத் தெரிவிக்கலாம்.

இந்தக் கணக்கெடுப்பு படிவம், குடும்பத்தில் உள்ள வேறு எந்த வயதுவந்த உறுப்பினரையும் மற்ற குடும்ப உறுப்பினர்கள் சார்பாகக் கையொப்பமிடவும் அனுமதிக்கிறது. உதாரணமாக, உங்கள் குழந்தை அல்லது வேறு குடும்ப உறுப்பினர் வெளியூர் சென்றிருந்தால், குடும்பத்தில் உள்ள மற்றொரு வயதுவந்த உறுப்பினர் அவர்களின் விவரங்களை நிரப்பி கையொப்பமிடலாம்.

படி 4: உங்கள் ஆவணங்களைத் தயாராக வைத்திருங்கள் (பழைய பட்டியலுடன் இணைக்க முடியாதவர்களுக்கு மட்டும்)

இந்த படி, கடைசி சிறப்பு தீவிரத் திருத்தத்தின் (SIR) எந்தவொரு வாக்காளர் பட்டியலிலும் தங்கள் பெயரையோ — அல்லது பெற்றோர் அல்லது உறவினரின் பெயரையோ — கண்டறிய முடியாத வாக்காளர்களுக்கு மட்டுமே பொருந்தும். நீங்கள் ஏற்கெனவே உங்கள் படிவத்தைச் சமர்ப்பித்துவிட்டீர்கள், ஆனால் “பழைய சிறப்பு தீவிரத் திருத்த (SIR)” துறைகளை நிரப்பாமல் இருந்தால், வாக்காளர் பட்டியலில் தொடர்ந்து இருக்க உங்கள் தகுதியை நிரூபிக்கும் ஆவணங்களைக் காட்டத் தயாராக இருங்கள். வரைவுப் பட்டியல் டிசம்பர் 9 அன்று வெளியிடப்பட்ட பிறகு இதுகுறித்து உங்களிடம் கேட்கப்படும்.

பின்வரும் ஆவணங்களில் ஒன்று அல்லது அதற்கு மேற்பட்டவற்றைத் தயாராக வைத்திருக்கவும்:

1. மத்திய அரசு/மாநில அரசு/பொதுத்துறை நிறுவனங்களின் நிரந்தர ஊழியர்/ஓய்வூதியதாரருக்கு வழங்கப்பட்ட ஏதேனும் அடையாள அட்டை/ஓய்வூதியப் பணம் செலுத்தும் ஆணை.
2. 01.07.1987-க்கு முன் அரசாங்கம்/உள்ளூர் அதிகாரிகள்/வங்கிகள்/அஞ்சல் அலுவலகம்/எல்ஐசி/பொதுத்துறை நிறுவனங்களால் இந்தியாவில் வழங்கப்பட்ட ஏதேனும் அடையாள அட்டை/சான்றிதழ்/ஆவணம்.
3. உரிய அதிகாரியால் வழங்கப்பட்ட பிறப்புச் சான்றிதழ்.
4. பாஸ்போர்ட்.
5. அங்கீகரிக்கப்பட்ட வாரியங்கள்/பல்கலைக்கழகங்களால் வழங்கப்பட்ட மெட்ரிகுலேஷன்/கல்விச் சான்றிதழ்.
6. உரிய மாநில அதிகாரியால் வழங்கப்பட்ட நிரந்தர குடியிருப்புச் சான்றிதழ்.
7. வன உரிமைச் சான்றிதழ்.
8. OBC/SC/ST அல்லது உரிய அதிகாரியால் வழங்கப்பட்ட ஏதேனும் சாதிச் சான்றிதழ்.
9. தேசிய குடிமக்கள் பதிவேடு (எங்கு உள்ளதோ அங்கு).
10. மாநில/உள்ளூர் அதிகாரிகளால் தயாரிக்கப்பட்ட குடும்பப் பதிவேடு.
11. அரசாங்கத்தால் வழங்கப்பட்ட நிலம்/வீடு ஒதுக்கீட்டுச் சான்றிதழ்.
12. 01.07.2025-ஐக் குறிப்புத் தேதியாகக் கொண்ட பீகார் SIR வாக்காளர் பட்டியலின் சுருக்கம்.
13. ஆதார் (அடையாளச் சான்றாக மட்டுமே, குடியுரிமைக்கு அல்ல.)

குடியுரிமை விதிமுறைகள்: 01.07.1987-க்கு முன் பிறந்தவர்கள், பிறந்த தேதி/இடத்தைச் சான்றளிக்க மேலே உள்ள ஒரு ஆவணத்தைக் காட்ட வேண்டும். 01.07.1987 முதல் 02.12.2004 வரை பிறந்தவர்கள், தங்களுக்கும் ஒரு பெற்றோருக்கும் ஆவணம் காட்ட வேண்டும். 02.12.2004-க்குப் பிறகு பிறந்தவர்கள், தங்களுக்கும் இரண்டு பெற்றோருக்குமான ஆவணங்களைக் காட்ட வேண்டும்.

மேலே உள்ள பட்டியல் ஒரு குறியீடு மட்டுமே, விரிவானது அல்ல. தேர்தல் பதிவு அதிகாரி (ERO) — உங்கள் வயது (நீங்கள் 18 வயதுக்கு மேல் இருக்க வேண்டும்) அல்லது குடியுரிமை (இந்தியக் குடிமக்கள் மட்டுமே வாக்களிக்கத் தகுதியுடையவர்கள்) குறித்து திருப்தி அடையவில்லை என்றால் கூடுதல் ஆவணங்களைக் கேட்கலாம்.

• மிக முக்கியமாக, தகுதியை நிரூபிக்க, தனியாக ஆதார் மட்டும் போதுமானதாக இருக்காது என்று ஆணையம் கூறியுள்ளது. இது உங்கள் வயது மற்றும் குடியுரிமையை நிறுவும் பட்டியலிலிருந்து வேறு ஆவணத்துடன் இருக்க வேண்டும்.

படி 5: டிசம்பர் 9-ல் வரைவுப் பட்டியலைச் சரிபார்க்கவும்!

வரைவு வாக்காளர் பட்டியல்கள் டிசம்பர் 9 அன்று வெளியிடப்படும். உங்கள் பெயர் இருக்கிறதா என்று கவனமாகச் சரிபார்க்கவும். கணக்கெடுப்பு படிவத்தைச் சமர்ப்பித்த ஒவ்வொரு வாக்காளரின் பெயரும் வரைவுப் பட்டியலில் இடம்பெற வேண்டும் என்று தேர்தல் ஆணையம் கூறியுள்ளது. நீங்கள் உங்கள் படிவத்தைச் சமர்ப்பித்திருந்தும் உங்கள் பெயர் விடுபட்டிருந்தால் அல்லது உங்கள் விவரங்கள் தவறாக இருந்தால், உங்கள் தகவலைச் சரிசெய்ய அல்லது உங்கள் பெயரை மீண்டும் சேர்க்க டிசம்பர் 9, 2025 முதல் ஜனவரி 8, 2026 வரை கோரிக்கை (Claim) அல்லது ஆட்சேபனை (Objection) மனுவைத் தாக்கல் செய்யலாம்.

பழைய சிறப்பு தீவிர திருத்த (SIR) வாக்காளர் பட்டியலில் தங்கள் அல்லது தங்கள் குடும்பத்தின் பெயரைக் கண்டறிய முடியாத அனைத்து வாக்காளர்களுக்கும் டிசம்பர் 9 முதல் ஜனவரி 31 வரை அவர்களின் தேர்தல் பதிவு அதிகாரியிடமிருந்து (ERO) குடியுரிமைச் சான்று உட்பட தகுதியை நிரூபிக்க ஆவணங்களைக் கேட்டு ஒரு அறிவிப்பு (Notice) வரும். உங்கள் பெயர் வரைவுப் பட்டியலில் தோன்றினாலும், படிவத்தைச் சமர்ப்பிக்கும்போது "பழைய (SIR) பட்டியல்" துறைகளை நிரப்பாமல் விட்டிருந்தாலும், உங்களுக்கு அத்தகைய அறிவிப்பு வரும். அப்போதுதான் நீங்கள் தயாராக வைத்திருந்த ஆவணங்கள் (படி 4 ஐப் பார்க்கவும்) கைகொடுக்கும்.

படி 6: பிப்ரவரி 7, 2026 அன்று வெளியிடப்படும் இறுதி வாக்காளர் பட்டியலில் உங்கள் பெயரை உறுதிப்படுத்தவும்

ஏதேனும் காரணத்திற்காக, உங்கள் பெயர் பட்டியலில் இருந்து நீக்கப்பட்டால், இறுதிப் பட்டியல் வெளியிடப்பட்ட 15 நாட்களுக்குள் மாவட்ட ஆட்சியரிடம் முடிவை எதிர்த்து மேல்முறையீடு செய்யலாம். உங்கள் முதல் மேல்முறையீடு தோல்வியடைந்தால், அடுத்த 15 நாட்களுக்குள் உங்கள் மாநிலத்தின் தலைமைத் தேர்தல் அதிகாரியிடம் இரண்டாவது மேல்முறையீட்டைச் சமர்ப்பிக்கலாம்.

முக்கிய தேதிகள்:

இந்த செய்தியை ஆங்கிலத்தில் வாசிக்க இங்கே கிளிக் செய்யுங்கள்!