கர்ப்பிணி பெண்களுக்கு பெஸ்ட் அரிசி; இப்படி கஞ்சி செய்து சாப்பிடுங்க: டாக்டர் கார்த்திகேயன்

பாரம்பரிய நெல் வகைகளில் ஒன்றான பூங்கார் அரிசி, குறிப்பாகப் பெண்களுக்குப் பல ஆரோக்கிய நன்மைகளைத் தருவதால் "பெண்களுக்கான அரிசி" என்று டாக்டர் கார்த்திகேயன் தனது யூடியூப் பக்கத்தில் கூறியிருக்கிறார். பூங்கார் அரிசி கஞ்சியை கர்ப்பிணிப் பெண்கள் தங்கள் கர்ப்ப காலத்தில் ஆறாவது மாதம் முதல் பிரசவம் முடியும் வரை தொடர்ந்து சாப்பிடுவது சுகப்பிரசவத்திற்கு வழிவகுக்கும் என்றும் தெரிவித்தார். இந்த அரிசியில் இரும்புச் சத்து, கால்சியம், துத்தநாகம் (Zinc), மெக்னீசியம் போன்ற அத்தியாவசிய ஊட்டச்சத்துக்கள் மற்ற வெள்ளை அரிசிகளை விட அதிகமாக உள்ளன. இரும்புச் சத்து அதிகமாக இருப்பதால், இது இரத்த சோகை வராமல் தடுப்பதற்கும், பிரசவத்திற்குப் பிந்தைய உடல் சோர்வைக் குறைப்பதற்கும் உதவுகிறது. மேலும், இது ஹார்மோன் சமநிலைத்தன்மைக்கு உதவுவதால், பூங்கார் அரிசி கர்ப்பிணிகளுக்கான சிறந்த உணவுகளில் ஒன்றாகப் பரிந்துரைக்கப்படுகிறது. இந்த ஆரோக்கியமான அரிசியைக் கொண்டு காய்கறிக் கஞ்சி தயாரிப்பது எப்படி என்று பார்ப்போம். 

தேவையான பொருட்கள்:

பூங்கார் அரிசி 1 கப்
கேரட், பீன்ஸ் 
மிளகுப் பொடி
சீரகம்
நெய்
உப்பு

செய்முறை:

பூங்கார் அரிசியை நன்கு கழுவி, தேவையான நேரம் ஊறவைக்கவும். கேரட், பீன்ஸ் போன்ற காய்கறிகளை நன்றாகக் கழுவி, சிறு துண்டுகளாக நறுக்கித் தயாராக வைக்கவும். ஒரு பெரிய குக்கரில் 4 கப் தண்ணீர் ஊற்றவும். அதில் ஊறவைத்த அரிசி, நறுக்கிய காய்கறிகள், பொடித்த மிளகு, சீரகம் மற்றும் தேவையான அளவு உப்பு ஆகியவற்றைச் சேர்க்கவும். குக்கரை மூடி, அரிசியும் காய்கறிகளும் நன்கு வேகும் வரை 3 முதல் 4 விசில் வரும்வரை வேக விடவும்.

விசில் அடங்கி, ஆறிய பின் குக்கரைத் திறந்து, கஞ்சியை நன்கு கிளறி, அதன் பதத்தை உறுதிப்படுத்திக் கொள்ளவும். ஒரு சிறிய கடாயில் 1 டீஸ்பூன் நெய்யை உருக்கி, அதை வேகவைத்த கஞ்சியின் மீது ஊற்றி உடனடியாகச் சூடாகப் பரிமாறவும். இந்த பூங்கார் அரிசி காய்கறி கஞ்சி சுவையாக இருப்பதுடன், கர்ப்பிணிப் பெண்களுக்குத் தேவையான அத்தியாவசிய ஊட்டச்சத்துக்களையும் வழங்குவதால், இது மிகவும் பரிந்துரைக்கப்படுகிறது.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.