வச்சா வழுக்கி ஓடும்... இந்த தீபாவளிக்கு அல்வா இப்படி செய்யுங்க; எல்லோரும் விரும்புவாங்க!

இந்த தீபாவளிக்கு வீட்டிலேயே வாயில் வைத்தவுடன் வழுக்கி ஓடும் அளவுக்கு மென்மையான சுவையான அல்வா செய்ய வேண்டுமா? நீங்கள் கொடுத்த குறிப்புகளை வைத்து கேரட் அல்வா செய்முறையை இங்கு பார்ப்போம். இந்த இனிப்பு அனைவரையும் நிச்சயம் கவரும். இதனை எப்படி செய்வது என்று சக்கரசாதமும் வடகறியும் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

பால்: 1/2 லிட்டர் + 2 கப்
பால் பவுடர்: 1/4 கப்
நெய் : 1 டேபிள் ஸ்பூன் + 4 டேபிள் ஸ்பூன்
கேரட் (துருவியது): 3 கப்
சர்க்கரை: 1/4 கப்
ஏலக்காய் (நசுக்கியது): 1
குங்குமப்பூ: 5-6 இழைகள்
கண்டன்ஸ்டு மில்க்: 1/4 கப்
முந்திரி மற்றும் பாதாம்

செய்முறை:

ஒரு அடிகனமான பாத்திரத்தில் 1/2 லிட்டர் பாலை ஊற்றி, மிதமான தீயில் வைத்து 20 நிமிடங்கள் கொதிக்க வைக்கவும். பிறகு, அதனுடன் 1/4 கப் பால் பவுடரை சேர்த்து, கெட்டியான 'கோவா' பதம் வரும் வரை நன்கு கிளறி சிம்மரில் (குறைந்த தீயில்) வேக வைக்கவும். கோவா தயாரானதும், அதை தனியாக எடுத்து வைக்கவும்.

மற்றொரு கடாயில் 1 டேபிள் ஸ்பூன் நெய் சேர்த்து, துருவிய 3 கப் கேரட்டை போட்டு சிறிது வதக்கவும். அடுத்து, அதனுடன் 2 கப் பால் சேர்த்து, கேரட் மென்மையாகும் வரை நன்கு வேக வைக்கவும். கேரட் மென்மையானதும், அதில் 1/4 கப் சர்க்கரை, நாம் தயார் செய்து வைத்திருக்கும் கோவா, நசுக்கிய 1 ஏலக்காய் மற்றும் 5-6 குங்குமப்பூ இழைகள் சேர்த்து நன்கு கிளறவும். அல்வா கலவை நன்கு கெட்டியாகும் வரை குறைந்த தீயில் வைத்து சமைக்கவும்.

View this post on Instagram

A post shared by Sakarasaathamum_vadakarium 😉 (@sakarasaathamum_vadakarium)

இப்போது, 1/4 கப் கண்டன்ஸ்டு மில்க் சேர்த்து, அல்வாவில் நன்றாகக் கலக்கும் வரை கிளறவும். ஒரு சிறிய கடாயில் 4 டேபிள் ஸ்பூன் நெய் ஊற்றி சூடாக்கவும். அதில் நறுக்கிய முந்திரி மற்றும் பாதாமை சேர்த்து, பொன்னிறமாகும் வரை நன்கு வறுக்கவும். வறுத்த முந்திரி, பாதாம் மற்றும் மீதமுள்ள நெய்யை அல்வா கலவையுடன் சேர்த்து, மேலும் 2 நிமிடங்களுக்கு சமைக்கவும். நெய் அல்வாவை விட்டுப் பிரிந்து வரும் போது அடுப்பை அணைத்து விடலாம். சுவையான, வாயில் வழுக்கி ஓடும் கேரட் அல்வாவை சூடாக பரிமாறவும். இந்த தீபாவளிக்கு உங்கள் வீடே இனிமையால் மணக்கும்!