மலம் கழிப்பதில் சிக்கல்? இனி நைட் இந்த உணவு சாப்பிடாதீங்க: டாக்டர் டெய்ஸி

மலச்சிக்கல் என்பது பலரும் எதிர்கொள்ளும் ஒரு பொதுவான பிரச்சனை. ஆரம்பத்தில் மலம் கழிப்பது சிரமமாக இருப்பது அல்லது 'டைட் மோஷன்' இருப்பது எனத் தொடங்கி, இது முற்றிய நிலையில் பைல்ஸ் (Piles) போன்ற தீவிர பிரச்சனைகளாக மாறலாம் என்று டாக்டர் டெய்ஸி தனது யூடியூப் பக்கத்தில் தெரிவித்துள்ளார்.

மீன், கறி போன்ற உணவுகளைச் சாப்பிட்ட பின் முக்கினால் வலி ஏற்படுவது, சிலசமயம் இரத்தம் வருவது போன்ற அறிகுறிகள் மலச்சிக்கலின் தீவிரத்தைக் காட்டுகின்றன. மலச்சிக்கல் மற்றும் அஜீரணம் (Constipation and Indigestion) ஆகியவற்றை, "அனைத்து நோய்களுக்கும் தாய்" (Mother of all diseases) என்று சொல்வதிலிருந்து இதன் முக்கியத்துவத்தை நாம் உணரலாம் என்று டாக்டர் டெய்ஸி வலியுறுத்துகிறார்.

மலச்சிக்கல் உள்ளவர்கள் இந்தப் பிரச்சனை மேலும் தீவிரமாகாமல் இருக்க, சில பழக்கவழக்கங்களையும் உணவுகளையும் கண்டிப்பாகத் தவிர்க்க வேண்டும்.

1. இரவு நேரத்தில் தவிர்க்க வேண்டியவை:

இரவு 7:30 மணிக்கு மேல் எந்த உணவையும் சாப்பிடவே கூடாது. மலச்சிக்கல் உள்ளவர்கள் இரவு நேரத்தில் உயர் புரதச்சத்து (High Protein) நிறைந்த உணவுகளைத் தவிர்க்க வேண்டும். குறிப்பாக, பயிறு வகைகள், பன்னீர், ராகி தோசை, அடை தோசை, மற்றும் ராகிக்கழி, கறி போன்றவற்றை இரவு உணவாக எடுக்கக் கூடாது. இந்த உணவுகள் செரிமானத்திற்கு கடினமானவை.

2. தயிர் சாதம்: தயிர் சாதம் மலத்தைக் கட்டும் தன்மை கொண்டது என்பதால், இதையும் தவிர்ப்பது நல்லது.

3. ஐஸ் வாட்டர்: ஐஸ் வாட்டர் அல்லது குளிர்ந்த நீரைக் குடிப்பதால் மலச்சிக்கல் மேலும் தீவிரமடையும். இது, உள்ளே சாப்பிட்ட உணவை உரையச் செய்யக்கூடிய சக்தி கொண்டது. உணவுக்குப் பின் ஜிகர்தண்டா, ரோஸ் மில்க், ஐஸ் வாட்டர், ஐஸ்கிரீம் போன்ற குளிர்ந்த பானங்களையும் கட்டாயம் தவிர்க்க வேண்டும்.

4. நீர்ச்சத்து: தினமும் கட்டாயம் 3 லிட்டர் தண்ணீர் குடிக்க வேண்டும். உடலுக்குப் போதுமான நீரை வழங்காமல் இருப்பது மலச்சிக்கலை இன்னும் சீரியஸாக்கும். இந்த உணவு மற்றும் பழக்கவழக்கங்களில் மாற்றம் செய்வதன் மூலம் மலச்சிக்கல் பிரச்சனையைத் தவிர்த்து, ஆரோக்கியமான வாழ்க்கையை வாழலாம் என்று டாக்டர் டெய்ஸி அறிவுறுத்துகிறார்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.