குழந்தைகள் விரும்பும் ஈவினிங் ஸ்நாக்ஸ்: ரிங் முறுக்கு; இப்படி செஞ்சு குடுங்க!

மாலை நேரங்களில் குழந்தைகளுக்குப் பிடித்த, அதே சமயம் காரசாரமான ஒரு சிற்றுண்டி செய்ய விரும்புகிறீர்களா? இதோ, குழந்தைகள் மட்டுமல்ல, பெரியவர்களும் விரும்பிச் சாப்பிடும் ரிங் முறுக்கு செய்வதற்கான எளிய செய்முறை பற்றி பார்ப்போம். இந்த மொறுமொறுப்பான முறுக்கை வீட்டிலேயே சுலபமாக செய்து பாருங்கள்.

தேவையான பொருட்கள்:

மைதா -3 டம்ளர்
அரிசி மாவு - 1 டம்ளர்
தண்ணீர் 
சீரகம் - 1 டீஸ்பூன்
பெருங்காய பவுடர் - 1 டீஸ்பூன்
மிளகு - 1 டேபிள் ஸ்பூன்
மிளகாய் பொடி    - 1 டேபிள் ஸ்பூன்
எள்ளு- 1 டீஸ்பூன்
உப்பு 
எண்ணெய்     

செய்முறை:

முதலில், மைதா மற்றும் அரிசி மாவு ஆகியவற்றை ஒரு பாத்திரத்தில் ஒன்றாகக் கலந்து தயாராக வைத்துக் கொள்ளுங்கள். அடுத்து, ஒரு பாத்திரத்தில் தேவையான அளவு தண்ணீர் எடுத்துக் கொண்டு, அதில் சீரகம், மிளகு, மிளகாய் பொடி, பெருங்காய பவுடர், எள்ளு, உப்பு மற்றும் 4 டேபிள் ஸ்பூன் எண்ணெய் சேர்த்து நன்றாகக் கொதிக்க விடவும்.

தண்ணீர் நன்கு கொதித்ததும், தயாராக வைத்துள்ள மாவு கலவையை கொதிக்கும் நீரில் கொஞ்சம் கொஞ்சமாக மெதுவாகக் கொட்டிக் கொண்டே, கட்டிகள் சேராதவாறு உடனடியாகக் கிளற வேண்டும். மாவு கெட்டியான பதத்திற்கு வரும் வரை கிளறவும். மாவு கெட்டியான பின், அதை ஒரு அகலமான தாம்பாளத்தில் கொட்டி, கை பொறுக்கும் சூடு வந்ததும் நன்கு மிருதுவாகப் பிசையவும். தேவைப்பட்டால் சிறிதளவு எண்ணெய் தடவி பிசையலாம்.

பிசைந்த மாவைச் சிறு சிறு உருண்டைகளாக உருட்டி, அதை நீளவாக்கில் உருட்டவும். நீளமாக உருட்டிய மாவைத் ‘மோதிரம்’ (ரிங்) வடிவில் சுற்றிக் கொள்ளவும். ஒரு கடாயில் பொரிக்கத் தேவையான அளவு எண்ணெய் ஊற்றி, சூடானதும், செய்து வைத்த ரிங் முறுக்குகளைப் போட்டு, மிதமான தீயில் வைத்து, பொன்னிறமாக மாறும் வரை பொரித்தெடுக்கவும். இப்போது காரசாரமான மற்றும் மொறுமொறுப்பான ரிங் முறுக்குகள் தயார். இதை ஒரு ஏர்-டைட் டப்பாவில் போட்டு வைத்தால் பல நாட்களுக்குப் பயன்படுத்தலாம். குழந்தைகளுக்கான மாலை நேர சிற்றுண்டியாக இதைக் கொடுக்கலாம்.