ஹாஸ்டலில் இருக்கும் பேச்சுலர்ஸ் கவனியுங்க... கெட்டிலில் அம்மா கைப்பக்குவத்தில் ஒரு பிரியாணி ரெசிபி

ஹாஸ்டல் உணவைச் சாப்பிட்டு அலுத்துப்போன பேச்சுலர்ஸ் மத்தியில், வார இறுதியில் அம்மா சமைத்த பிரியாணியின் சுவைக்கு ஏங்கும் நபர்கள் ஏராளம். பெரிய குக்கரோ, அடுப்போ இல்லாமல், ஒரு சாதாரண கெட்டிலைக் கொண்டே அந்தச் சுவையை மீண்டும் கொண்டு வர  முடியும். ஹாஸ்டல் சாப்பாட்டுக்காக இனி வெயிட் பண்ணாமல் உங்களுக்கு பிடித்த மாதிரி சுவையான வெஜ் பிரியாணி கெட்டிலில் எப்படி செய்வது என்று பார்ப்போம். 

தேவையான பொருட்கள்:

அரிசி  
வெங்காயம் 
தக்காளி 
இஞ்சி பூண்டு  
பிரியாணி மசாலா / கரம் மசாலா 
புதினா, கொத்தமல்லி     
எண்ணெய்  
உப்பு 
ஏலக்காய், லவங்கம், பட்டை 
காய்கறிகள் 

செய்முறை:

முதலில் அரிசியைக் கழுவி சுமார் 15 நிமிடங்கள் ஊறவைக்கவும். இது சமையல் நேரத்தைக் குறைக்கும். கெட்டிலில் 2 டீஸ்பூன் நெய் அல்லது எண்ணெயை ஊற்றவும். (கெட்டிலை ஆன் செய்யவும்). எண்ணெய் சூடானதும், ஏலக்காய், லவங்கம், பட்டை ஆகியவற்றைச் சேர்த்து ஒரு நிமிடம் வதக்கவும். நீளமாக நறுக்கிய வெங்காயத்தைச் சேர்த்து பொன்னிறமாகும் வரை வதக்கவும். பின்னர் இஞ்சி பூண்டு பேஸ்ட்டைச் சேர்த்து அதன் பச்சை வாசனை போகும் வரை கிளறவும்.

நறுக்கிய தக்காளி, பிரியாணி மசாலா மற்றும் தேவையான அளவு உப்பு சேர்த்து நன்கு கிளறவும். மசாலா வாடை வரும்போது, நறுக்கிய காய்கறிகள், புதினா மற்றும் கொத்தமல்லியையும் சேர்க்கவும். ஊறவைத்த அரிசியைத் தண்ணீரை வடித்துவிட்டு கெட்டிலில் உள்ள மசாலா கலவையுடன் சேர்க்கவும். ஒரு நிமிடம் மெதுவாகக் கிளறவும். பின்னர் 1 முதல் 1.5 கப் வரை தண்ணீரை ஊற்றவும்.

கெட்டிலின் மூடியை மூடி, ஆன் செய்யவும். நீர் கொதிக்க ஆரம்பித்ததும், கெட்டில் தானாக அணைந்தால், மீண்டும் ஒருமுறை ஆன் செய்யவும். கெட்டில் தானாக அணைந்த பிறகு, மூடியைத் திறக்காமல் சுமார் 10 முதல் 15 நிமிடங்கள் அப்படியே 'தம்' போட விடுங்கள். கெட்டிலின் உள்ளே இருக்கும் சூட்டிலேயே பிரியாணி வெந்துவிடும். 15 நிமிடங்களுக்குப் பிறகு மூடியைத் திறந்து மெதுவாகக் கிளறினால், சுவையான மினி-பிரியாணி தயார்.