3 வேளை வச்சு சாப்பிடலாம்... பேச்சுலர்சுக்கு ஏற்ற குருமா: செஃப் வெங்கடேஷ் பட் ரெசிபி!

சமையலில் அதிக அனுபவமோ, நேரமோ இல்லாத பேச்சுலர்ஸ் மற்றும் புதியவர்களுக்கு ஏற்ற, எளிமையான மற்றும் ஆரோக்கியமான ரெசிபி தான் செஃப் வெங்கடேஷ் பட் அவர்களின் ஸ்டைலில் செய்யப்படும் இந்த உருளைக்கிழங்கு பட்டாணி குருமா. இந்த குருமா இட்லி, தோசை, சப்பாத்தி, பூரி, மற்றும் சாதம் என அனைத்திற்கும் ஒரு சிறந்த பக்க உணவாக இருக்கும். இதன் தனிச்சிறப்பு என்னவென்றால், இது அதிக நேரம் கெட்டுப்போகாமல் இருப்பதுடன், சுவையும் குறையாமல் மூன்று வேளைக்கும் பயன்படுத்தி மகிழலாம். குறைந்த நேரத்தில், வீட்டிலேயே சுவையான இந்த குருமாவை எப்படி செய்வது என்று பிரியாஸ்கிச்சன் இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

தேங்காய்    1/4 கப்
பொட்டுக் கடலை / வறுத்த கடலை    2 தேக்கரண்டி
முந்திரி பருப்பு    4 முதல் 5
பச்சை மிளகாய்    2 முதல் 3
சோம்பு (சீரகம்)    1/2 தேக்கரண்டி
இஞ்சி     1/2 அங்குலம் 
உருளைக்கிழங்கு (வேக வைத்து, மசித்தது)    2 நடுத்தர அளவிலானது
பச்சை பட்டாணி (உரித்தது)    1/2 கப்
வெங்காயம் (நறுக்கியது)    1 நடுத்தர அளவிலானது
தக்காளி (நறுக்கியது)    1 சிறியது
கரம் மசாலா தூள்    1/2 தேக்கரண்டி
மஞ்சள் தூள்    ஒரு சிட்டிகை
எண்ணெய், உப்பு 
பட்டை, கிராம்பு, ஏலக்காய்    தலா 1
சோம்பு    1/2 தேக்கரண்டி
கறிவேப்பிலை 

செய்முறை:

முதலில், 'மசாலா அரைக்க' கொடுக்கப்பட்டுள்ள தேங்காய், பொட்டுக் கடலை, முந்திரி, பச்சை மிளகாய், சோம்பு மற்றும் இஞ்சி ஆகியவற்றை மிக்ஸியில் சேர்த்து, சிறிது தண்ணீர் ஊற்றி, மைய பேஸ்ட் போல அரைத்துக் கொள்ளவும். ஒரு கடாயில் எண்ணெய் ஊற்றி, அது சூடானதும் தாளிக்க வேண்டிய பட்டை, கிராம்பு, ஏலக்காய், சோம்பு மற்றும் கறிவேப்பிலை சேர்த்துத் தாளிக்கவும். நறுக்கிய வெங்காயத்தைச் சேர்த்து, பொன்னிறமாகும் வரை வதக்கவும். பின்னர் தக்காளி மற்றும் மஞ்சள் தூள் சேர்த்து, தக்காளி குழையும் வரை வதக்கவும்.

View this post on Instagram

A post shared by Priya's Kitchen (@priyanka_m_jagadish)

அதன் பிறகு வேக வைத்து மசித்த உருளைக்கிழங்கு, பச்சை பட்டாணி, தேவையான உப்பு மற்றும் கரம் மசாலா தூள் சேர்த்து, சில நிமிடங்கள் கிளறவும். அடுத்து, அரைத்து வைத்த தேங்காய் மசாலாவைச் சேர்த்து, குருமாவிற்கு தேவையான அளவு நீர் சேர்த்து நன்கு கலக்கவும். குழம்பு கெட்டியாகி, எண்ணெய் பிரிந்து வரும் வரை மிதமான தீயில் கொதிக்க விடவும். இறுதியாக கொத்தமல்லி இலைகளைத் தூவி அடுப்பை அணைக்கவும். சுவையான செஃப் வெங்கடேஷ் பட் உருளைக்கிழங்கு பட்டாணி குருமா தயார்.