நீர்ச்சத்து அதிகம்... தொப்பை குறைய பெஸ்ட்; இந்த சட்னி ஒருமுறை ட்ரை பண்ணுங்க!

பூசணிக்காயை வைத்து சட்னி செய்ய முடியுமா? என்று யோசிக்கும் பலருக்கும் ஆச்சரியம் அளிக்கும் வகையில், இந்த சட்னி ஒரு தனித்துவமான சுவையைக் கொண்டுள்ளது. மேலும், இதில் தேங்காய் சேர்க்கப்படாமலேயே, பூசணிக்காயின் சுவை மற்ற மசாலாப் பொருட்களுடன் கலந்து அற்புதமான ஒரு சுவையை அளிக்கிறது. பொதுவாக இட்லி, தோசைக்கு ஒரு புதிய சட்னியை முயற்சி செய்ய விரும்புபவர்களுக்கு இது ஒரு சிறந்த தேர்வாகும்.

இது சமைக்க மிகக் குறைந்த நேரமே எடுத்துக்கொள்வதுடன், ஆரோக்கியமான நன்மைகளையும் வழங்குகிறது. இந்த சுவையான சட்னியை நீங்கள் ஒருமுறை செய்து பார்த்தால், இதன் சுவையில் நிச்சயம் வியந்து போவீர்கள். இதனை எப்படி செய்வது என்று ஆர்.கே. ரெசிபி பவுல் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

பூசணிக்காய் (தோல் சீவியது) - 1 துண்டு
கடலை பருப்பு - 1 டேபிள் ஸ்பூன்
உளுத்தம் பருப்பு - 1 டேபிள் ஸ்பூன்
சின்ன வெங்காயம் - 4
இஞ்சி - 1 துண்டு
பச்சை மிளகாய்
புளி - 1 பெரிய நெல்லிக்காய் அளவு
பொட்டுக்கடலை - 3 டேபிள் ஸ்பூன்
உப்பு
கொத்தமல்லி இலை
எண்ணெய், கடுகு, உளுத்தம் பருப்பு, கறிவேப்பிலை.

செய்முறை:

பூசணிக்காயின் தோலை சீவி, விதைகளுடன் சிறிய துண்டுகளாக நறுக்கிக் கொள்ளவும். (விதைகள் உடலுக்கு நல்லது என்பதால் சேர்க்கலாம்; விரும்பினால் நீக்கிக் கொள்ளலாம்). ஒரு கடாயில் சிறிது எண்ணெய் ஊற்றி சூடாக்கவும். அதில் 1 டேபிள் ஸ்பூன் கடலை பருப்பு மற்றும் 1 டேபிள் ஸ்பூன் உளுத்தம் பருப்பு சேர்த்து, நல்ல வாசனை வர சிவக்கும் வரை வறுக்கவும்.

வறுத்த பருப்புடன், 4 சின்ன வெங்காயம், 1 துண்டு இஞ்சி, காரத்திற்கு ஏற்ற பச்சை மிளகாய் மற்றும் நெல்லிக்காய் அளவு புளியைச் சேர்க்கவும். நறுக்கி வைத்திருக்கும் பூசணிக்காய் துண்டுகளை இவற்றுடன் சேர்த்து, நன்றாக வதக்கவும். பூசணிக்காய் நன்கு வதங்கியதும், அடுப்பை அணைத்து, தேவையான அளவு உப்பு மற்றும் சிறிது கொத்தமல்லி இலை சேர்த்து விடவும்.

View this post on Instagram

A post shared by RK Recipes Bowl (@rk_recipes_bowl)

இந்த கலவையை ஆற வைத்து, ஒரு மிக்ஸியில் சேர்க்கவும். அதனுடன் 3 டேபிள் ஸ்பூன் பொட்டுக்கடலையைச் சேர்த்து, தண்ணீர் அதிகமில்லாமல் திட்டமாகச் சேர்த்து சட்னியாக அரைக்கவும். இறுதியாக, ஒரு சிறு தாளிப்பு கரண்டியில் எண்ணெய், கடுகு, உளுத்தம் பருப்பு மற்றும் கறிவேப்பிலை சேர்த்து தாளித்து, அரைத்த சட்னியில் சேர்க்கவும். இப்போது சுவையான மற்றும் ஆரோக்கியமான பூசணிக்காய் சட்னி தயார்.