மெயின் டிஷ், சைடிஷ்... எல்லாமே இந்த ஒரு டிஷ் தான்; இப்படி செஞ்சு ருசிங்க!

கத்தரிக்காய்... ஐயயோ, அது எனக்கு பிடிக்காது என்று நீங்கள் சொல்லியிருக்கலாம். ஆனால், இந்த 'கத்திரிக்காய் தயிர் பச்சடி'  உங்கள் கருத்தை ஒரே நிமிடத்தில் மாற்றும். சூடான சாதம், ஒரு துளி நெய்யுடன் இந்த பச்சடியை பிசைந்து சாப்பிட்டால், சொர்க்கம் உங்கள் நாக்கிற்கே வரும். சப்பாத்தி அல்லது புலாவிற்கு தொட்டுக்கொள்ள ஒரு 'ஸ்டார்' சைடிஷ்-ஆகவும் இருக்கும். இதனை எப்படி செய்வது என்று ஸ்பைசி சமையல் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

கத்தரிக்காய்
 தயிர்
மஞ்சள் தூள்
சீரகத் தூள்
மிளகு தூள்
உப்பு
எண்ணெய்
கடுகு
உளுத்தம் பருப்பு
காய்ந்த மிளகாய்
பெருங்காயம்
கறிவேப்பிலை
கொத்தமல்லி இலை

செய்முறை:

கத்திரிக்காயை வட்டமாகவோ அல்லது நீளவாக்கிலோ மெல்லிய துண்டுகளாக வெட்டிக் கொள்ளவும். ஒரு தட்டையான தவாவில் சிறிதளவு எண்ணெய் ஊற்றி சூடாக்கவும். வெட்டி வைத்த கத்திரிக்காய் துண்டுகளை இரண்டு பக்கமும் பொன்னிறமாகும் வரை அல்லது நன்கு மென்மையாகும் வரை வறுத்து எடுக்கவும். ஒரு பெரிய பாத்திரத்தில் கெட்டித் தயிரை எடுத்து, அதனுடன் உப்பு, மஞ்சள் தூள், சீரகத் தூள், மற்றும் மிளகு தூள் சேர்த்து நன்கு கட்டி இல்லாமல் அடித்துக் கொள்ளவும்.

View this post on Instagram

A post shared by Sri priya (@spicysamayals)

ஒரு சிறிய தாளிக்கும் கரண்டியில் எண்ணெய் ஊற்றி சூடாக்கி, கடுகு சேர்க்கவும். கடுகு வெடித்ததும், உளுத்தம் பருப்பு, காய்ந்த மிளகாய், பெருங்காயம், கறிவேப்பிலை ஆகியவற்றைச் சேர்த்து தாளித்து, அதை நேரடியாக தயிர்க் கலவையின் மேல் ஊற்றவும். இப்போது வறுத்து வைத்த கத்திரிக்காய் துண்டுகளை தயிர்க் கலவையில் சேர்த்து மெதுவாகக் கலக்கவும். உப்பு சரிபார்த்து, தேவைப்பட்டால் சேர்த்துக்கொள்ளலாம். பச்சடியை 15-20 நிமிடங்கள் ஊற வைத்த பிறகு, நறுக்கிய கொத்தமல்லி இலைகளால் அலங்கரித்து, சாதம் அல்லது சப்பாத்தியுடன் பரிமாறவும். பச்சடி ஊறிய பின், சுவை இன்னும் கூடும்.