சிக்கன் இல்லாட்டி என்ன? அதுக்கு இந்த டிஷ் டஃப் கொடுக்கும்; சிம்பிள் டிப்ஸ்

காளான் கிரேவி என்பது ஒரு எளிமையான, ஆனால் சத்தான உணவு. இதில் சேர்க்கப்படும் பச்சை மிளகாயானது கிரேவிக்கு பிரத்யேகமான காரத்தையும், நறுமணத்தையும் அளிக்கிறது. காளான் வெகு விரைவில் சமைக்கப்படுவதால், இந்த கிரேவியை 20 நிமிடங்களுக்குள் செய்து முடிக்கலாம். காளானை அதிகம் நறுக்காமல் சற்று பெரிதாக நறுக்கினால், அது சமைத்த பின் சுருங்கும் போது சரியான அளவில் இருக்கும். இதனை எப்படி செய்வது என்று கார்த்திஸ் குக்புக் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்
 
காளான் 
வெங்காயம் 
தக்காளி  
பச்சை மிளகாய் 
இஞ்சி பூண்டு விழுது  
மஞ்சள் தூள் 
தனியா தூள் 
சீரகத் தூள் 
கரம் மசாலா 
சீரகம் 
கறிவேப்பிலை
கொத்தமல்லி இலை     
உப்பு
எண்ணெய்     

செய்முறை:

ஒரு கடாயில் 2-3 தேக்கரண்டி எண்ணெய் ஊற்றி சூடாக்கவும். சீரகம் சேர்த்து வெடித்ததும், நறுக்கிய வெங்காயம் மற்றும் கறிவேப்பிலை சேர்த்து பொன்னிறமாகும் வரை வதக்கவும். நீளவாக்கில் கீறிய பச்சை மிளகாயை சேர்த்து ஒரு நிமிடம் வதக்கிய பின், இஞ்சி பூண்டு விழுது சேர்த்து அதன் பச்சை வாடை போகும் வரை நன்கு வதக்கவும்.

நறுக்கிய தக்காளியுடன் சிறிதளவு உப்பு சேர்த்து, தக்காளி குழைந்து வரும் வரை வதக்கவும். பிறகு, மஞ்சள் தூள், தனியா தூள், சீரகத் தூள் மற்றும் கரம் மசாலா சேர்த்து ஒரு நிமிடம் நன்கு கிளறவும். மசாலா கருகாமல் இருக்க கவனமாக இருக்க வேண்டும். சுத்தம் செய்து நறுக்கிய காளானை சேர்த்து, காளானில் இருந்து தண்ணீர் பிரியும் வரை 3 முதல் 4 நிமிடங்கள் வதக்கவும்.

View this post on Instagram

A post shared by karthis_cookbooks (@karthis_cookbooks)

கிரேவிக்கு தேவையான அளவு தண்ணீர் ஊற்றி (சுமார் 1/2 கப்), தேவையான அளவு உப்பு சேர்த்து நன்கு கிளறி விடவும். அடுப்பை மிதமான தீயில் வைத்து, கிரேவி கெட்டியாகி, எண்ணெய் பிரிந்து மேலே வரும் வரை (சுமார் 5-7 நிமிடங்கள்) கொதிக்க விடவும். இறுதியாக, பொடியாக நறுக்கிய கொத்தமல்லி இலைகளைத் தூவி அடுப்பை அணைக்கவும். சுவையான மற்றும் காரசாரமான பச்சை மிளகாய் காளான் கிரேவி தயார். இதை சப்பாத்தி அல்லது சாதத்துடன் சூடாகப் பரிமாறலாம்.