வெறும் 5 நிமிசத்துல வெண்டை வறுவல்... அதுவும் மொறு மொறுன்னு ரெடி!

வெண்டைக்காய் பலருக்கும் பிடித்த ஒரு காய்கறி. ஆனால், சிலருக்கு அதன் பிசுபிசுப்புத் தன்மை காரணமாகப் பிடிக்காமல் இருக்கலாம். அத்தகையவர்களும் விரும்பி உண்ணக்கூடிய ஒரு சமையல் குறிப்பு இது. மொறுமொறுப்பான வெண்டைக்காய் வறுவலை குழந்தைகள் கூட மிச்சம் வைக்காமல் சாப்பிடுவார்கள். இதை எப்படி செய்வது என்று ஸ்வீட்பைட்ஸ் இன்ஸ்டா பக்கத்தில் செய்து காட்டியிருப்பது பற்றி பார்க்கலாம்.

தேவையான பொருட்கள்:

வெண்டைக்காய்
குழம்பு மிளகாய்த்தூள் - 1 ஸ்பூன் 
மிளகாய்த்தூள் (சில்லி பவுடர்) - சிறிதளவு 
கடலை மாவு - 1 ஸ்பூன்
சிக்கன் மசாலா - 1 ஸ்பூன்
கான்ஃப்ளோர் (சோள மாவு) - 1 ஸ்பூன் 
உப்பு - தேவையான அளவு 
எண்ணெய் - பொரிப்பதற்கு 

செய்முறை:

முதலில் வெண்டைக்காயை நன்கு சுத்தம் செய்து, தண்ணீரை முழுவதும் நீக்கிய பின், அவற்றை நீளவாக்கில் மெல்லிய துண்டுகளாக வெட்டிக்கொள்ளவும். ஒரு பெரிய கிண்ணத்தில் வெட்டிய வெண்டைக்காய் துண்டுகளை எடுத்துக்கொள்ளவும். இப்போது, வெண்டைக்காயுடன் ஒரு ஸ்பூன் குழம்பு மிளகாய்த்தூள், சிறிது சில்லி பவுடர், ஒரு ஸ்பூன் கடலை மாவு, ஒரு ஸ்பூன் சிக்கன் மசாலா, ஒரு ஸ்பூன் கான்ஃப்ளோர் மற்றும் தேவையான அளவு உப்பு ஆகியவற்றை சேர்க்கவும்.

View this post on Instagram

A post shared by Sweet Bytes (@sweetbytes1)

இந்த மசாலா கலவை வெண்டைக்காய் துண்டுகளில் நன்கு படுமாறு கை கொண்டு மெதுவாக பிசையவும். அதன் பிறகு, சிறிதளவு தண்ணீரை மட்டும் தெளித்து மீண்டும் ஒருமுறை நன்கு கலக்கவும். தண்ணீர் அதிகமாக விடக்கூடாது, மசாலா வெண்டைக்காயில் ஒட்டும் அளவுக்கு மட்டும் தெளித்தால் போதும்.

ஒரு வாணலியில் பொரிப்பதற்கு தேவையான அளவு எண்ணெய் ஊற்றி, நன்கு சூடாக்கவும். எண்ணெய் சூடானதும், மசாலா கலந்த வெண்டைக்காய் துண்டுகளை சிறிது சிறிதாக எண்ணெயில் போட்டு பொரித்தெடுக்கவும். வெண்டைக்காய் பொன்னிறமாக மாறி, மொறுமொறுப்பான நிலைக்கு வந்ததும், அவற்றை எண்ணெயில் இருந்து எடுத்துவிடவும். இப்போது சுவையான, மொறுமொறுப்பான கிரிஸ்பி வெண்டைக்காய் தயார். இதை சூடாக பரிமாறி மகிழலாம். இந்த ரெசிபி குழந்தைகளுக்கு மிகவும் பிடித்தமான ஒன்று.