எப்ப பார்த்தாலும் அதே உருளை பொரியல் தானா? இப்படி 65 ட்ரை பண்ணுங்க; சிக்கன் கிட்ட வர முடியாது!

உருளைக்கிழங்கு என்றாலே பலருக்கும் பிடித்த ஒரு காய். ஆனால், தினசரி ஒரே மாதிரியான உருளைக்கிழங்கு பொரியலைச் செய்து அலுத்துவிட்டதா? அப்படியானால், இந்த 'பொட்டேட்டோ 65' ரெசிபி உங்களுக்காகத்தான். இதன் வெளிப்புறம் நல்ல மொறுமொறுப்பாகவும்  உட்புறம் மென்மையாகவும் இருக்கும். இதன் தனிப்பட்ட சுவை காரணமாக, இது சிக்கன் 65-க்கு இணையான வரவேற்பைப் பெறும் என்பதில் சந்தேகம் இல்லை. இதை ஒரு முறை சமைத்து சுவைத்தால், பிறகு அடிக்கடி இதைத்தான் செய்வீர்கள். சாம்பார் சாதம், ரசம் சாதம் அல்லது வேறு எந்த வகையான வெரைட்டி ரைஸுக்கும் இது ஒரு அற்புதமான சைட் டிஷ்ஷாக இருக்கும். இதனை எப்படி செய்வது என்று காத்துவாக்குல சமையல் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

உருளைக்கிழங்கு - 3 
கடலை மாவு - 2 டேபிள் ஸ்பூன்
கான்ஃப்ளவர் மாவு - 2 டேபிள் ஸ்பூன்
அரிசி மாவு - 1 டேபிள் ஸ்பூன்
காஷ்மீர் சிவப்பு மிளகாய் தூள் - 1.5 தேக்கரண்டி
கரம் மசாலா - 1 தேக்கரண்டி
இஞ்சி பூண்டு விழுது - 1 தேக்கரண்டி
உப்பு
கறிவேப்பிலை
பச்சை மிளகாய் - 2 
எண்ணெய்

செய்முறை:

உருளைக்கிழங்கைத் தோல் சீவி, மீடியம் சைஸ் துண்டுகளாக நறுக்கிக் கொள்ளவும். இந்த துண்டுகளை ஒரு பாத்திரத்தில் போட்டு, சுமார் ஐந்து நிமிடங்கள் மட்டும் வேக வைக்கவும். உருளைக்கிழங்கு அதிகமாகக் குழையாமல் இருக்க, உடனடியாக தண்ணீரை வடித்துவிடவும். ஒரு பாத்திரத்தில் கடலை மாவு, கான்ஃப்ளவர், அரிசி மாவு, உப்பு, காஷ்மீர் சிவப்பு மிளகாய் தூள், கரம் மசாலா மற்றும் இஞ்சி பூண்டு விழுது ஆகியவற்றைச் சேர்க்கவும்.

இதில் சிறிது சிறிதாகத் தண்ணீர் சேர்த்து, பஜ்ஜி மாவு பதத்திற்கு (அதிகம் நீர்க்காமல்) நன்கு கலந்து விடவும். இப்போது வேக வைத்த உருளைக்கிழங்கு துண்டுகளை இந்தக் கலவையில் சேர்த்து, உருளைக்கிழங்கின் எல்லாப் பக்கங்களிலும் மாவு நன்கு படுமாறு மெதுவாகக் கிளறவும். இந்தக் கலவையை மேரினேட் செய்யக்கூடாது. அப்படியே உடனே சூடான எண்ணெயில் போட்டுப் பொரிக்க ஆரம்பிக்கவும். தாமதித்தால் உருளைக்கிழங்கில் இருந்து நீர் விட்டுவிடும்.

View this post on Instagram

A post shared by Kaathuvaakula_samayal (@kaathuvaakulasamayal)

எண்ணெயில் போட்டவுடன் உடனடியாகத் திருப்பாமல், சுமார் 30 விநாடிகளுக்குப் பிறகு திருப்பிப் போடவும். இதனால் மசாலா உதிராமல் ஒட்டிக் கொள்ளும். கடைசியாக, சுவைக்காக கறிவேப்பிலை மற்றும் பச்சை மிளகாயை எண்ணெயில் சேர்த்து, உருளைக்கிழங்கு பொன்னிறமாகவும், மொறுமொறுப்பாகவும் மாறும் வரை பொரித்து எடுக்கவும். சுவையான மற்றும் மொறுமொறுப்பான பொட்டேட்டோ 65 தயார், இதோடு வாலாக நறுக்கிய பெரிய வெங்காயம் சேர்த்து சூடாகப் பரிமாறவும்.