திங்கட்கிழமை வந்தாலே லஞ்ச் செய்யுறதுல குழப்பம்... குக்கரில் 2 விசில் போதும்; யோசிக்காம இத ரெடி பண்ணுங்க!

திங்கட்கிழமை காலை என்றால், அலுவலகம் செல்பவர்களுக்கும், பள்ளிக்குச் செல்லும் குழந்தைகளுக்கும் லஞ்ச் பாக்ஸ் தயாரிப்பது என்பது ஒரு பெரிய சவாலாக இருக்கும். வாரத்தின் முதல் நாள் என்பதால், காலையில் சமையலுக்கு அதிக நேரம் செலவிட முடியாது. அதே சமயம், ஆரோக்கியமான மற்றும் சுவையான உணவைத் தயாரிக்க வேண்டும் என்பதே அனைவரின் விருப்பம்.

இந்த அவசர நேரத்தில் உங்களுக்கு கைக்கொடுக்கப் போகும் ஒரு அற்புதமான ரெசிபிதான் குக்கர் வெஜிடபிள் புலாவ். சாதாரணமாகப் பிரியாணி செய்ய ஆகும் நேரத்தை விட மிகக் குறைவான நேரத்தில், இதைச் செய்து முடித்துவிடலாம். குக்கரில் சரியாக இரண்டே விசில் போதும், சுடச்சுட வாசம் நிறைந்த புலாவ் நிமிடங்களில் ரெடி. இது குழந்தைகளுக்கும் மிகவும் பிடிக்கும் என்பதால், யோசிக்காமல் இதை லஞ்ச் பாக்ஸில் நிரப்பலாம். இதனை எப்படி செய்வது என்று சென்னை வெரைட்டி ஃபுட்ஸ் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

பாஸ்மதி அரிசி - 1 கப்  
கேரட், பீன்ஸ், உருளைக்கிழங்கு, பட்டாணி - 1 கப்
வெங்காயம் - 1 
இஞ்சி பூண்டு விழுது - 1 தேக்கரண்டி
பச்சை மிளகாய் - 2-3
புதினா மற்றும் கொத்தமல்லி இலைகள்
பிரியாணி மசாலா / கரம் மசாலா - 1/2 தேக்கரண்டி
நெய் / எண்ணெய் - 2 மேசைக்கரண்டி
உப்பு 
தண்ணீர் - 1.5 கப்
பட்டை, கிராம்பு, ஏலக்காய், பிரியாணி இலை 

செய்முறை:

முதலில், குக்கரை அடுப்பில் வைத்து நெய் அல்லது எண்ணெய் ஊற்றி சூடாக்கவும். அதில் பட்டை, கிராம்பு, ஏலக்காய் மற்றும் பிரியாணி இலை சேர்த்து தாளிக்கவும். நறுக்கிய வெங்காயம் மற்றும் பச்சை மிளகாய் சேர்த்து நன்கு வதக்கவும். வெங்காயம் பொன்னிறமானதும், இஞ்சி பூண்டு விழுது சேர்த்து அதன் பச்சை வாசனை போகும் வரை வதக்கவும். இப்போது, நறுக்கிய காய்கறிகள் மற்றும் புதினா, கொத்தமல்லி இலைகளைச் சேர்த்து சில நிமிடங்கள் வதக்கவும். பின்னர், பிரியாணி மசாலா மற்றும் தேவையான அளவு உப்பு சேர்த்து நன்கு கிளறவும்.

View this post on Instagram

A post shared by Chennai Variety Foods (@chennai_variety_foods)

ஊற வைத்து வடிகட்டிய பாஸ்மதி அரிசியை காய்கறி கலவையுடன் மெதுவாகக் கலக்கவும். சரியாக 1.5 கப் தண்ணீரை ஊற்றி, உப்பு சரிபார்க்கவும். குக்கரை மூடி, அடுப்பை மிதமான தீயில் வைத்து, சரியாக 2 விசில் வரும் வரை சமைக்கவும். விசில் சத்தம் அடங்கியதும், குக்கரைத் திறந்து, புலாவை மெதுவாகக் கிளறி விடவும். சுவையான மற்றும் மணமான வெஜிடபிள் புலாவ் தயார்.