2 முட்டை, 4 பிரெட்... ஈஸி அண்ட் ஹெல்தி காலை உணவு ரெடி

தினமும் காலையில் இட்லி, தோசை சாப்பிட்டு அலுத்துவிட்டதா, இனி கவலையே வேண்டாம். அதற்கு பதிலாக இந்த முட்டை மசாலா டோஸ்ட் ரெசிபி உங்களுக்கு ஒரு  மாற்றாக இருக்கும். இது மிகவும் சீக்கிரமாகவும் சில நிமிடங்களில், குழந்தைகளுக்குப் பிடித்த வகையில், சுவையான மற்றும் சத்தான காலை உணவை அல்லது மாலை நேர சிற்றுண்டியை தயார் செய்ய உதவும். அவசரமாக வேலைக்குச் செல்பவர்கள் கூட மிக எளிதாகச் செய்யக்கூடிய இந்த ரெசிபியில், முட்டையின் புரதச் சத்தும், மசாலாக்களின் சுவையும் பிரெட்டுடன் இணையும்போது, அதன் சுவை நிச்சயம் எல்லோருக்கும் பிடிக்கும். இதனை எப்படி செய்வது என்று ஹோம் குக்கிங் தமிழ் யூடியூப்  பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

முட்டை 2
வெங்காயம் 1 
பச்சை மிளகாய் 1
மஞ்சள் தூள்
மிளகுத்தூள்
சில்லி ஃபிளேக்ஸ்
உப்பு
கொத்தமல்லி
பிரெட் 
வெண்ணெய்

செய்முறை:

ஒரு பாத்திரத்தில் முட்டைகளை உடைத்து ஊற்றி நன்றாக அடித்து கலக்கவும். இப்போது, அதனுடன் பொடியாக நறுக்கிய வெங்காயம், பச்சை மிளகாய், மஞ்சள் தூள், மிளகுத்தூள், உப்பு, சில்லி ஃபிளேக்ஸ், மற்றும் கொத்தமல்லி ஆகியவற்றைச் சேர்த்து கலவை நன்றாக ஒன்று சேரும்படி கலக்கவும். ஒரு பிரெட் துண்டினை எடுத்து, அதன் ஒரு பக்கத்தின் மீது முட்டைக் கலவை முழுவதுமாகப் பரவும்படி ஊற்றி சமமாகப் பரப்பி விடவும்.

தவாவைச் சூடு செய்து, வெண்ணெய் சேர்த்து உருகியதும், முட்டைக் கலவை தடவிய பக்கம் கீழே படுமாறு தவாவில் வைக்கவும். இப்போது, பிரெட்டின் மற்றொரு பக்கத்தின் மீதும் மீதமுள்ள முட்டைக் கலவையை ஊற்றி சமமாகப் பரப்பவும். பிரெட்டை மெதுவாக அழுத்தி விடவும். ஒரு பக்கம் வெந்ததும், மெதுவாகத் திருப்பிப் போட்டு, இரண்டு பக்கமும் நல்ல பொன்னிறமாக வேகவிடவும். சுவையான முட்டை மசாலா டோஸ்ட் தயார். இதைச் சூடாக டொமேட்டோ கெட்சப் அல்லது புதினா சட்னியுடன் சேர்த்துப் பரிமாறி சுவைக்கவும். இதனை காலையில் நேரம் இல்லாதபோது பிள்ளைகளுக்கு செய்து கொடுக்கலாம்.