ஒரு ஸ்பூன் எண்ணெய் போதும்... 65-க்கு டஃப் கொடுக்கும் காலிஃபிளவர் பொரியல்; ஈஸி டிப்ஸ்!

காலிஃபிளவர் என்றாலே பலருக்கும் முதலில் நினைவுக்கு வருவது 'கோபி 65' அல்லது பிரியாணியில் சேர்க்கப்படும் துண்டுகள்தான். ஆனால், குறைவான எண்ணெயில், விரைவாகச் செய்யக்கூடிய ஒரு அருமையான சைடிஷ் தான் இந்தக் காலிஃபிளவர் பொரியல். பொதுவாக பொரியல் என்றாலே பலர் ஆவி வேக வைத்து செய்வார்கள். ஆனால், இங்கு நாம் பயன்படுத்தும் சில ட்ரிக்ஸ் (குறிப்பாக கடலை மாவு மற்றும் அரிசி மாவு) காலிஃபிளவரை உதிரி உதிரியாகவும், கிரிஸ்பியாகவும் மாற்றும். இதை ஒருமுறை சமைத்து சாப்பிட்டுப் பார்த்தால், ரைஸ் வகைகளுடன் சேர்த்து சாப்பிட, இது 65-க்கு டஃப் கொடுக்கும் பொரியலாக நிச்சயம் மாறும். மிகக் குறைந்த எண்ணெய் மற்றும் எளிமையான முறையில் இதைச் செய்வது எப்படி என்று ட்ரடிஷனலி மாடர்ன்ஃபுட் இன்ஸ்டா பக்கத்தில் செய்து காட்டியிருப்பது பற்றி பார்க்கலாம்.

தேவையான பொருட்கள்:

காலிஃபிளவர்  
மஞ்சள் தூள் 
வெந்நீர்     
கடலை எண்ணெய் 
கடுகு 
கறிவேப்பிலை 
வெங்காயம் 
இஞ்சி பூண்டு விழுது 
காஷ்மீரி மிளகாய் தூள்     
உப்பு 
கடலை மாவு 
அரிசி மாவு 

செய்முறை:

காலிஃபிளவரை சிறிய அல்லது மீடியம் அளவிலான பூக்களாக நறுக்கிக் கொள்ளவும். அதை வடிகட்டியில் மாற்றி, தண்ணீரில் நன்றாக அலசவும். ஒரு பாத்திரத்தில் காலிஃபிளவர், மஞ்சள் தூள் மற்றும் வெந்நீரைச் சேர்த்து, 20 நிமிடங்கள் ஊறவைக்கவும். இது காலிஃபிளவரில் உள்ள கிருமிகளை நீக்க உதவும். பிறகு, தண்ணீரை வடிகட்டி, காலிஃபிளவர் துண்டுகளை மட்டும் எடுத்து வைக்கவும். ஒரு கடாயில் 1 டேபிள்ஸ்பூன் எண்ணெய் சேர்த்து, அடுப்பை மிதமான தீயில் வைக்கவும். எண்ணெய் காய்ந்ததும் கடுகு மற்றும் கறிவேப்பிலை சேர்த்து, பொரிய விடவும்.

View this post on Instagram

A post shared by Vidya Srinivasan (@traditionallymodernfood)

நறுக்கிய வெங்காயம் மற்றும் இஞ்சி-பூண்டு விழுதைச் சேர்த்து, வெங்காயம் கண்ணாடி போல் மாறும் வரை வதக்கவும். இப்போது மிளகாய் தூள் மற்றும் தேவையான அளவு உப்பு சேர்த்து, மசாலா வாடை போகும் வரை 2 நிமிடங்கள் வதக்கவும். வடிகட்டி வைத்துள்ள காலிஃபிளவரைச் சேர்த்து, மசாலாவில் நன்றாகக் கலக்கவும். கடாயை மூடி, ஒன்றரை நிமிடம் (1+1/2 நிமிடம்) வேகவிடவும். பிறகு திறந்து நன்றாகக் கிளறி விடவும். காலிஃபிளவர் மென்மையாகும் வரை, மூடி வைத்து வேகவிடும் செயல்முறையை மீண்டும் செய்யவும்.

காலிஃபிளவர் மென்மையாக வெந்த பிறகு, மூடியைத் திறந்து, ஏதேனும் தண்ணீர் இருந்தால் அது முழுவதுமாக ஆவியாகும் வரை சமைக்கவும்.  இறுதியாக, கடலை மாவு மற்றும் அரிசி மாவை தூவி, நன்றாகக் கிளறவும். இந்த மாவு காலிஃபிளவரில் ஒட்டி, பொரியலை உதிரியாகவும், சுவையாகவும் மாற்றும். 3 நிமிடங்கள் சமைத்து, அடுப்பை அணைத்து, சூடாகப் பரிமாறவும்.