இனி குழம்பு, சோறுன்னு தனித்தனியா வைக்க வேணாம்... இப்படி லஞ்ச் பேக் பண்ணி அனுப்புங்க!

பள்ளி செல்லும் பிள்ளைகள் முதல் வேலைக்கு செல்பவர்கள் வரை அனைவருக்கும் ஏற்ற ஒரு லஞ்ச் பாக்ஸ் ரெசிபி எப்படி செய்வது என்று நான்ஃபிக்‌ஷன் ஸ்ட்ரீமிங் இன்ஸ்டா பக்கத்தில் செய்து காட்டியிருப்பது பற்றி பார்ப்போம். காலையில் அவசர அவசரமாக குழம்பு, சாதம், பொரியல் என தனித்தனியாக சமைத்து, பேக் செய்து அனுப்புவது பெரிய வேலையாக இருக்கும். இந்தக் கவலையை இனி விடுங்கள், மிருதுவான முட்டையுடன், மொறுமொறுப்பான வெண்டைக்காய் சேர்ந்து செய்யும் இந்த வெண்டைக்காய் முட்டை சாதம் ஒரு அற்புதமான லஞ்ச் பாக்ஸ் ரெசிபியாகும். சமைக்கவும் எளிது, சாப்பிடவும் சுவை என்பதால், இனி நீங்களும் கவலையின்றி லஞ்ச் பேக் செய்து அனுப்பலாம்.

தேவையான பொருட்கள்:

வெண்டைக்காய்  
எண்ணெய் 
கடுகு 
உளுந்து 
சீரகம் 
கறிவேப்பிலை 
வெங்காயம் 
பூண்டு 
உப்பு 
காஷ்மீரி மிளகாய் தூள் 
முட்டை 
சாதம் 
கொத்தமல்லி இலைகள் 

செய்முறை:

அடுப்பில் ஒரு கடாயை வைத்து, 1 டீஸ்பூன் எண்ணெய் ஊற்றி சூடேற்றவும். சிறு துண்டுகளாக நறுக்கிய வெண்டைக்காயை அதில் சேர்த்து, மிதமான தீயில் வைத்து வதக்கவும். வெண்டைக்காயின் பிசுபிசுப்புத் தன்மை முற்றிலும் நீங்கி, அது சற்றே மொறுமொறுப்பாக மாறும் வரை (சுமார் 5-7 நிமிடங்கள்) நன்கு வதக்கி, தனியே எடுத்து வைத்துக் கொள்ளவும்.  பிசுபிசுப்பு நீங்கிய வெண்டைக்காய், சாதத்தை ஒட்டாமல் உதிரியாக இருக்க உதவும். அதே கடாயில், மீதமுள்ள 1 டேபிள்ஸ்பூன் எண்ணெயை ஊற்றி சூடேற்றவும்.

எண்ணெய் சூடானதும், கடுகு, உளுந்து, சீரகம் சேர்த்துப் பொரிய விடவும். பின்னர் கறிவேப்பிலையும் சேர்க்கவும். பொடியாக நறுக்கிய வெங்காயம் சேர்த்து, பொன்னிறமாகும் வரை வதக்கவும். தட்டி வைத்த/நறுக்கிய பூண்டு சேர்த்து, அதன் பச்சை வாசனை போகும் வரை நன்கு வதக்கவும். தேவையான அளவு உப்பு மற்றும் காஷ்மீரி மிளகாய் தூள் சேர்த்து, மசாலா வாடை போகும் வரை சில வினாடிகள் வதக்கவும். மசாலா கலவையின் நடுவில் சிறிது இடம் ஒதுக்கி, முட்டைகளை உடைத்து ஊற்றவும்.

View this post on Instagram

A post shared by Bharti - Working Mom of Dhrishith💫 (@nonfictionstreaming)

உடைத்து ஊற்றிய முட்டையின் மீது லேசாக உப்பு தூவி, முட்டை நன்றாக வேகும் வரை கிளறி, உதிரி உதிரியாக செய்து கொள்ளவும். இப்போது, ஏற்கனவே வதக்கி வைத்திருக்கும் வெண்டைக்காயை முட்டை மசாலா கலவையுடன் சேர்த்து ஒரு நிமிடம் நன்கு கிளறவும். இறுதியாக, வடித்து வைத்திருக்கும் சாதத்தை இந்தக் கலவையில் சேர்த்து, அடிப்பிடிக்காமல் மிதமான தீயில் பொறுமையாக கிளறவும். மசாலா மற்றும் முட்டைக் கலவை சாதத்துடன் நன்கு கலந்திருக்க வேண்டும். சுவை பார்த்து, தேவைப்பட்டால் மேலும் உப்பு சேர்க்கலாம். பொடியாக நறுக்கிய கொத்தமல்லி இலைகளைத் தூவி, ஒருமுறை கிளறி அடுப்பை அணைக்கவும். இந்த சாதத்தை சூடாக லஞ்ச் பாக்ஸில் பேக் செய்து அனுப்பினால், மதிய உணவுக்குச் சுவையாக இருக்கும். இதற்குத் தனியாகத் தொட்டுக்கொள்ள வேறு எதுவும் தேவையில்லை என்றாலும், ஒரு சிறிய வெள்ளரிக்காய் அல்லது கேரட் துண்டுகளைச் சேர்த்து அனுப்பலாம்.