உடலுக்கு வலு சேர்க்கும் ராகி... இந்த மாதிரி சப்பாத்தி செய்யுங்க!

நமது பாரம்பரிய உணவுப் பொருட்களில் ஒன்று ராகி (கேழ்வரகு). இதில் நிறைந்துள்ள கால்சியம், இரும்புச்சத்து மற்றும் நார்ச்சத்து ஆகியவை உடலுக்குத் தேவையான வலுவை அளித்து, பல ஆரோக்கிய நன்மைகளை வழங்குகின்றன. இந்த சத்தான ராகியை சுவையான சப்பாத்தியாக செய்து, அன்றாட உணவில் சேர்த்துக் கொள்வது ஒரு சிறந்த வழியாகும்.

தேவையான பொருட்கள்:

ராகி மாவு - 1 கப்
தண்ணீர் - 1 கப் (சுமார்)
உப்பு
எண்ணெய்/நெய்

செய்முறை:

ஒரு பாத்திரத்தில் 1 கப் தண்ணீர் மற்றும் தேவையான அளவு உப்பு சேர்த்து அடுப்பில் வைத்து நன்கு கொதிக்க விடவும். தண்ணீர் கொதித்ததும், அடுப்பை மிதமான தீக்கு மாற்றி, அதில் 1 கப் ராகி மாவை மெதுவாக சேர்த்து, கட்டிகள் இல்லாமல் கைவிடாமல் கிளறவும். மாவு நன்கு கெட்டியாகி, பாத்திரத்தில் ஒட்டாமல் வரும்போது அடுப்பை அணைத்து விடவும். இந்த கலவையை மூடி வைத்து 5 முதல் 10 நிமிடங்கள் ஆற விடவும். மாவு வெதுவெதுப்பான சூட்டுக்கு வந்ததும், அதனை ஒரு பாத்திரத்தில் எடுத்து, கையில் சிறிது எண்ணெய் தடவி நன்கு மிருதுவாக பிசையவும். 

மாவு கையில் ஒட்டினால், லேசாக தண்ணீர் தொட்டு பிசையலாம். பிசைந்த மாவை சிறு சிறு உருண்டைகளாக உருட்டி, ராகி மாவில் லேசாக புரட்டி, மெல்லிய சப்பாத்திகளாகத் தேய்க்கவும். ஒரு தோசைக்கல்லை அடுப்பில் வைத்து சூடானதும், தேய்த்து வைத்த சப்பாத்தியை போட்டு, இருபுறமும் லேசாக எண்ணெய் அல்லது நெய் விட்டு சுட்டு எடுத்தால், ஆரோக்கியமான மற்றும் மிருதுவான ராகி சப்பாத்தி தயார். இந்த ராகி சப்பாத்தி, சர்க்கரை நோயாளிகளுக்கும், உடல் எடையைக் குறைக்க நினைப்பவர்களுக்கும், வளரும் குழந்தைகளுக்கும் மிகச் சிறந்த உணவாகும். எளிதாக செரிமானம் ஆவதுடன், நாள் முழுவதும் உடலுக்குத் தேவையான ஆற்றலை அளிக்கும்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.