ஆமா... பெரிய மதுரை பன் பரோட்டா; இனி உங்க வீட்டிலே செஞ்சு மிரட்டலாம்; அதுக்கு இந்த 3 பொருள் அவசியம்!

பரோட்டா என்றாலே நமக்கெல்லாம் முதலில் ஞாபகம் வருவது மதுரை தான். அங்கே ஹோட்டல்களில் கிடைக்கும் பஞ்சு போன்ற மென்மையான 'பன் பரோட்டா'வின் சுவையை நம்மால் மறக்கவே முடியாது. அந்த சுவையை இனி உங்கள் வீட்டிலேயே கொண்டு வர முடியும். முக்கியமாக, ஹோட்டல் சுவை மற்றும் அதன் மென்மைக்குக் காரணம், மாவு பிசையும்போது சேர்க்கப்படும் சில அத்தியாவசிய பொருட்கள் தான். சாஃப்டான மதுரை பன் பரோட்டா எப்படி செய்வது என்று சங்கம் தோப்பு கடை இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

மைதா மாவு  - 1/2 கிலோ
சர்க்கரை- 1 டீஸ்பூன்
உப்பு 
பால் - 2 டேபிள் ஸ்பூன்
முட்டை- 1
எண்ணெய்  - 2 டேபிள் ஸ்பூன்  

செய்முறை:

முதலில் ஒரு அகலமான பாத்திரத்தை எடுத்து, அதில் அரை கிலோ மைதா மாவைச் சேர்க்கவும். இப்போது, மாவுடன் சர்க்கரை, உப்பு மற்றும் பாலைச் சேர்த்து நன்கு கலக்கவும். பின்னர் ஒரு முட்டையை உடைத்து ஊற்றி, அதனுடன் 2 டேபிள் ஸ்பூன் எண்ணெயையும் சேர்த்து மாவுடன் கலக்குங்கள். இப்போது மாவை பிசைய ஆரம்பிக்க வேண்டும். சிறிது சிறிதாக வெதுவெதுப்பான தண்ணீரை ஊற்றி மாவை பிசையவும். சப்பாத்தி மாவை விட சற்று மென்மையாக, மாவு கையில் ஒட்டாமல் மிருதுவாக வரும்வரை சுமார் 10 முதல் 15 நிமிடங்கள் வரை நன்கு பிசைய வேண்டும். மாவு எவ்வளவு நேரம் பிசைகிறோமோ, அவ்வளவு மென்மையாக பரோட்டா வரும்.

View this post on Instagram

A post shared by Sungam Thoppu Kadai🍽 (@sungamthoppukadai)

பிசைந்த மாவைச் சிறுசிறு உருண்டைகளாக உருட்டி, அதன் மேல் லேசாக எண்ணெய் தடவவும். இந்த உருண்டைகளை ஒரு பாத்திரத்தில் வைத்து, ஒரு துணியால் மூடி குறைந்தது ஒரு மணி நேரம் ஊற வைக்க வேண்டும். மாவு நன்கு ஊறிய பின், அதை சப்பாத்தி தேய்ப்பது போல் மெலிதாகத் தேய்த்து, அதன் மேல் எண்ணெய் தடவி, விசிறி போல் மடித்து, மீண்டும் சுருட்டி வட்ட வடிவில் பன் போல் தேய்க்கவும். பின்பு, தோசைக்கல்லில் எண்ணெய் ஊற்றி, இந்த பரோட்டாக்களைப் பொன்னிறமாகச் சுட்டு எடுத்தால், ஹோட்டல் சுவையிலான பன் பரோட்டா தயார்! சூடான குருமாவை ஊற்றிச் சாப்பிட்டால், சுவை அபாரம்.