பிரியாணிக்கு பெஸ்ட் காம்பினேஷன்... மதுரை பேமஸ் மட்டன் எலும்பு தாளிச்சா: செஃப் தீனா ரெசிபி

மதுரையின் திருமண விருந்துகளில் பிரியாணிக்கு ஒரு இணை உணவு (சைட் டிஷ்) என்றால் அது நிச்சயமாக மட்டன் எலும்பு தாளிச்சாதான். இது பிரியாணிக்கு ஏற்ற ஒரு அசைவக் கூட்டு ஆகும். வழக்கமான புளிக்குழம்பிலிருந்து வேறுபட்டு, இதில் மட்டன் நெஞ்செலும்புடன் (Mutton Ribs) துவரம் பருப்பு, கடலைப்பருப்பு, கத்திரிக்காய், சுரைக்காய், மற்றும் மாங்காய் போன்ற பல பொருட்கள் சேர்க்கப்பட்டு தனித்துவமான சுவை மற்றும் நறுமணத்துடன் சமைக்கப்படுகிறது. இதனை எப்படி செய்வது என்று செஃப் தீனா தனது இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்

மட்டன் நெஞ்செலும்பு: 1/2 கிலோ
துவரம் பருப்பு: 1 கிலோ
கடலைப்பருப்பு: 1/4 கிலோ
கத்திரிக்காய்: 2 கிலோ
தக்காளி: 3/4 கிலோ
சுரக்காய்: 1/2 கிலோ
மாங்காய்: 1 கிலோ
இஞ்சி பூண்டு விழுது: தலா 50 கிராம்
மிளகாய்த்தூள் (சக்தி மசாலா): 50 கிராம்
மல்லித்தூள்: 50 கிராம்
மஞ்சள்தூள்: 20 - 25 கிராம்
புளி: 1/4 கிலோ
பச்சை மிளகாய்: 6-7 (அப்படியே)
புதினா, உப்பு

செய்முறை:

ஒரு பெரிய பாத்திரத்தில் தேவையான அளவு தண்ணீர், துவரம் பருப்பு மற்றும் கடலைப்பருப்பு ஆகியவற்றைச் சேர்க்கவும். அதனுடன் நன்கு சுத்தம் செய்த மட்டன் நெஞ்செலும்பை உடனடியாகச் சேர்த்து வேகவைக்கவும். பருப்பும் எலும்பும் 80% வெந்து வரும்வரை காத்திருக்கவும். பருப்பு மற்றும் எலும்பு வெந்தபின், நறுக்கிய கத்திரிக்காய், சுரைக்காய், மற்றும் தக்காளி ஆகியவற்றை ஒவ்வொன்றாகச் சேர்க்கவும்.

View this post on Instagram

A post shared by Deena Dhayalan (@chefdeenadhayalan)

அடுத்து, இஞ்சி பூண்டு விழுது, முழு பச்சை மிளகாய், மஞ்சள் தூள், மல்லித்தூள், மற்றும் மிளகாய்த்தூள் ஆகியவற்றைச் சேர்த்து நன்கு கிளறி, காய்கறிகளை வேகவிடவும். காய்கறிகள் நன்கு வெந்த பிறகு (பக்குவமான நிலையில்), கரைத்து வைத்துள்ள புளித் தண்ணீர் மற்றும் நறுக்கிய மாங்காயைச் சேர்க்கவும். மாங்காய் கடைசியில் சேர்க்கப்படுவதால் அது கரந்து போகாமல் முழுமையாக இருக்கும். 

தேவையான அளவு உப்பு சேர்த்து ஒரு கொதி வர விடவும். இறுதியாக ஒரு கைப்பிடி புதினாவை தூவி, மாங்காய் சுமார் 5-10 நிமிடங்கள் வேகும் வரை கொதிக்கவிட்டு இறக்கினால், மதுரை ஸ்டைல் மட்டன் எலும்பு தாளிச்சா தயார். இதை சூடான பிரியாணியுடன் சேர்த்து பரிமாறவும்.