கொஞ்சம் கூட கொழ கொழன்னு இருக்காது... வெண்டை பொரியல் இப்படி செஞ்சு பாருங்க!

கொழ கொழப்புத் தன்மையே இல்லாமல், நல்ல மொறுமொறுப்புடன் இருக்கும் இந்த வெண்டைக்காய் வறுவல், சுடச்சுட சாதத்துடன் சேர்த்து சாப்பிட மிக அருமையாக இருக்கும். இதைத் தனியாகக் குழம்பு தேவையில்லாத ஒரு சைட் டிஷ்ஷாகவும் பயன்படுத்தலாம். இந்த எளிமையான மற்றும் சுவையான வெண்டைக்காய் வறுவலை எப்படி செய்வது என்று லைஃப்ஸ்டைல் ஆஃப் வாணிஅஜய் இன்ஸ்டா பக்கத்தில் செய்து காட்டியிருப்பது பற்றி பார்ப்போம். அடுத்த முறை வெண்டைக்காய் வாங்கினால் கட்டாயம் இந்த முறையில் முயற்சி செய்து பாருங்கள்.

தேவையான பொருட்கள்:

வேர்க்கடலை  
காஷ்மீரி மிளகாய்த்தூள் 
தனியா தூள்  
சீரகத்தூள் 
மஞ்சள் தூள்     
பூண்டு  
உப்பு     
வறுக்க    வெண்டைக்காய்  
எண்ணெய் 

செய்முறை:

முதலில் ஒரு மிக்ஸி ஜாரை எடுத்துக் கொள்ளவும். அதில் வேர்க்கடலை, காஷ்மீரி மிளகாய்த்தூள், தனியா தூள், சீரகத்தூள், மஞ்சள் தூள், உப்பு மற்றும் நான்கு பல் பூண்டு ஆகியவற்றைச் சேர்த்து, தண்ணீர் விடாமல் நல்ல பவுடராக அரைத்து எடுத்து வைத்துக்கொள்ளவும். நடுத்தர அளவிலான வெண்டைக்காய்களை வட்டமாக நறுக்கி, அவற்றில் ஈரப்பதம் துளியும் இல்லாமல் நல்ல துணியால் துடைத்து, ஆற வைத்துக்கொள்ளவும். ஈரப்பதம் இல்லாமல் இருப்பதுதான் வறுவல் மொறுமொறுப்பாக வர முக்கியம்.

ஒரு அகலமான கடாயில் 5 முதல் 6 டேபிள் ஸ்பூன் எண்ணெய் சேர்த்து சூடானதும், நறுக்கிய வெண்டைக்காயைச் சேர்த்து வறுக்கவும். அகலமான கடாயைப் பயன்படுத்துவதால் வெண்டைக்காய் ஒட்டாமல் வறுபடும். வெண்டைக்காய் இந்த அளவுக்கு, அதாவது பாதி வெந்த நிலையில் இருக்கும்போது, அதனை ஒரு தட்டிற்கு மாற்றி எடுத்து வைக்கவும்.

View this post on Instagram

A post shared by Lifestyle of Vaniajay (@lifestyle_of_vaniajay)

அதே கடாயில் மேலும் 2 டேபிள் ஸ்பூன் எண்ணெய் சேர்த்து, நாம் அரைத்து வைத்திருக்கும் வேர்க்கடலைப் பொடியைச் சேர்த்து, எண்ணெயிலேயே ஒருமுறை நன்கு வதக்கவும். நீங்கள் வெண்டைக்காய் எடுத்துள்ள அளவைப் பொறுத்து பொடியின் அளவைக் கூட்டவோ குறைக்கவோ செய்து கொள்ளலாம். வதக்கிய மசாலாவுடன் நாம் ஏற்கனவே பாதி வேகவைத்த வெண்டைக்காயைச் சேர்த்து, மசாலா வெண்டைக்காயில் நன்கு பிடிக்கும்படிப் பிரட்டிவிடவும். அடுப்பை மிதமான தீயில் வைத்து, மசாலா நன்கு சேர்ந்துவரும் வரை சுமார் ஐந்து நிமிடங்கள் வறுத்து எடுத்தால், சூப்பரான மொறுமொறு வெண்டைக்காய் வறுவல் தயார்.