நான்வெஜ் சுவையை மறக்காத வகையில் ஒரு ரெசிபி; மண்டே மார்னிங் இத செஞ்சு கொடுங்க!

திங்கட்கிழமை காலை உணவுக்கு அல்லது மதிய உணவு டப்பாவிற்கு என்ன சமைப்பது என்று குழப்பமா? அதுவும் நான்வெஜ் பிரியர்களை திருப்திப்படுத்தும் ஒரு சத்தான, விரைவான உணவை தேடுகிறீர்களா? அதற்கு சரியான தீர்வுதான் இந்த சுவையான மற்றும் எளிதான சோயா ரைஸ். வெறும் 20 நிமிடங்களில் தயாராகிவிடும் இந்த ரெசிபி, அசைவ உணவின் அதே சுவையை கொடுப்பதால், உங்கள் வீட்டில் உள்ள அனைவரும் விரும்பி சாப்பிடுவார்கள். அதிக புரதச்சத்து நிறைந்த இந்த உணவு, நாள் முழுவதும் உங்களை உற்சாகமாக வைக்க உதவும். இதனை எப்படி செய்வது என்று ஏ.பி.கிச்சன் யூடியூப் பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

சோயா சங்ஸ் (நடுத்தர அளவு): 1 கப்
பாஸ்மதி அல்லது சாதாரண அரிசி: 1 கப்
வெங்காயம் (நீளமாக நறுக்கியது): 1
தக்காளி (நறுக்கியது): 1
இஞ்சி-பூண்டு விழுது: 1 தேக்கரண்டி
பச்சை மிளகாய்: 2-3
மிளகாய் தூள்: 1 தேக்கரண்டி
மல்லித்தூள்: 1 தேக்கரண்டி
கரம் மசாலா: 1/2 தேக்கரண்டி
சிக்கன் மசாலா/மீட் மசாலா: 1/2 தேக்கரண்டி
புதினா, கொத்தமல்லி இலைகள்
எண்ணெய்/நெய்
உப்பு

செய்முறை:

சோயா சங்ஸ்களை சூடான நீரில் 10 நிமிடங்கள் ஊறவைத்து, பின் தண்ணீரை நன்றாகப் பிழிந்து தனியாக வைக்கவும். குக்கரில் எண்ணெய் அல்லது நெய் ஊற்றி சூடானதும் பட்டை, லவங்கம், ஏலக்காய் போன்ற முழு மசாலா பொருட்களை சேர்த்து தாளிக்கவும். பின்னர் நீளமாக நறுக்கிய வெங்காயம் மற்றும் பச்சை மிளகாயை சேர்த்து, வெங்காயம் பொன்னிறமாகும் வரை வதக்கவும். இஞ்சி-பூண்டு விழுதை சேர்த்து பச்சை வாசனை போகும் வரை வதக்கி, பின் நறுக்கிய தக்காளி மற்றும் புதினா இலைகளைச் சேர்க்கவும். தக்காளி நன்கு குழைந்த பின், மிளகாய் தூள், மல்லித்தூள், கரம் மசாலா மற்றும் நான்வெஜ் சுவைக்காக சிக்கன் மசாலாவைச் சேர்த்து நன்கு கிளறவும்.

தயாராக வைத்துள்ள சோயா சங்ஸ் மற்றும் ஊறவைத்த அரிசியை (தண்ணீரை வடிகட்டி) சேர்த்து, இரண்டு நிமிடங்கள் மெதுவாக கிளறவும். அரிசிக்கு தேவையான அளவு உப்பு மற்றும் தண்ணீர் (1 கப் அரிசிக்கு 1.5 கப் தண்ணீர்) சேர்த்து, குக்கரை மூடி, மிதமான தீயில் 2 விசில் வரும் வரை வேக வைத்து இறக்கவும். விசில் அடங்கிய பின், கொத்தமல்லி இலைகளை தூவி, சுவையான சோயா ரைஸை தயிர் பச்சடி அல்லது சிப்ஸ் உடன் பரிமாறவும்.