சிக்கன், மட்டன் சாப்பிட்டு போர் அடிக்குதா? அதே கறி குழம்பு ருசி; இந்த பருப்பு வச்சு ட்ரை பண்ணுங்க!

வாரம் முழுவதும் அசைவ உணவுகளைச் சாப்பிட்டு சோர்வாகிவிட்டீர்களா? ஆனால், கறி குழம்பின் சுவைக்கு இணையான ஒரு அசைவம் அல்லாத உணவை தேடுகிறீர்களா? அதற்குச் சரியான தீர்வு இந்த முளைகட்டிய பாசிப்பயறு குழம்புதான். இதில் புரதம் மற்றும் நார்ச்சத்து நிறைந்துள்ளது, இது ஆரோக்கியத்திற்கும் மிகவும் நல்லது. சரியான மசாலாப் பொருட்களுடன் சமைக்கும்போது, இது அசைவக் குழம்புக்குரிய அதே அடர்த்தியான, காரமான மற்றும் அலாதியான சுவையைத் தருவது உறுதி. உங்கள் உடலுக்கும் நாக்கிற்கும் ஒரே நேரத்தில் திருப்தி அளிக்கும் இந்த அற்புதமான சைவ ரெசிபியை எப்படி செய்வது என்று உஷா ஃபுட் ஸ்பாட் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

முளைகட்டிய பாசிப்பயறு - 1 கப்
சின்ன வெங்காயம் - 10
தக்காளி - 1 
இஞ்சி-பூண்டு விழுது - 1 தேக்கரண்டி
மஞ்சள் தூள் - 1/4 தேக்கரண்டி
மிளகாய் தூள் - 1 தேக்கரண்டி
தனியா தூள் - 2 தேக்கரண்டி
கரம் மசாலா/கறி மசாலா தூள் - 1 தேக்கரண்டி 
தேங்காய் பால் (அ) அரைத்த தேங்காய் விழுது - 3 தேக்கரண்டி
எண்ணெய், கடுகு, சீரகம், கறிவேப்பிலை, காய்ந்த மிளகாய்
உப்பு  

செய்முறை:

முளைகட்டிய பாசிப்பயறை சிறிதளவு உப்பு மற்றும் மஞ்சள் தூள் சேர்த்து, குக்கரில் 2 விசில் வரும் வரை வேக வைத்து எடுத்துக்கொள்ளவும். பயறு முழுமையாகக் குழைந்து விடாமல், சற்று கடிக்கும் பதத்தில் இருக்க வேண்டும். ஒரு கடாயில் எண்ணெய் ஊற்றி, கடுகு, சீரகம், கறிவேப்பிலை, காய்ந்த மிளகாய் சேர்த்துத் தாளிக்கவும். பின்னர் நறுக்கிய சின்ன வெங்காயத்தைச் சேர்த்து பொன்னிறமாகும் வரை வதக்கவும். வெங்காயம் வதங்கியதும் இஞ்சி-பூண்டு விழுதைச் சேர்த்து, அதன் பச்சை வாசனை போகும் வரை வதக்கவும். பிறகு நறுக்கிய தக்காளியைச் சேர்த்து, அது நன்றாகக் குழையும் வரை வதக்கவும்.

View this post on Instagram

A post shared by Ushafood Spot (@ushafoodspot)

மஞ்சள் தூள், மிளகாய் தூள், தனியா தூள், மற்றும் கரம் மசாலா/கறி மசாலா தூள் ஆகியவற்றைச் சேர்த்து, அடிப்பிடிக்காமல் இருக்க சிறிது தண்ணீர் தெளித்து 2 நிமிடங்கள் வதக்க வேண்டும். இந்த மசாலா கலவை குழம்புக்கு அசைவக் குழம்புக்குரிய அதே நிறத்தையும், வாசனையையும், சுவையையும் தரும். 

இப்போது வேக வைத்த பாசிப்பயறை அதனுடன் இருக்கும் தண்ணீருடன் சேர்த்து, தேவையான அளவு உப்பு சேர்த்து நன்கு கிளறவும். குழம்பு கொதிக்க ஆரம்பித்ததும், தேங்காய் பால் அல்லது அரைத்த தேங்காய் விழுதைச் சேர்த்து, ஒரு கொதி வந்ததும் அடுப்பை அணைத்து விடவும். இறுதியாக, நறுக்கிய கொத்தமல்லி இலைகளைத் தூவி பரிமாறினால், அலாதியான சுவையில் முளைகட்டிய பாசிப்பயறு குழம்பு தயார். இந்தச் சுவையான முளைகட்டிய பாசிப்பயறு குழம்பு, சாதம், இட்லி, தோசை, சப்பாத்தி என அனைத்துடனும் அட்டகாசமாகப் பொருந்தும்.