ஒரு மாசத்துக்கு சைடிஷ் வேணாம்... பேச்சுலர்ஸ், ஹாஸ்டலில் இருக்கும் மக்களுக்கு பெஸ்ட்!

பேச்சுலர்ஸ் மற்றும் ஹாஸ்டலில் தங்குபவர்களுக்கு சைட் டிஷ்ஷாக எப்போதுமே ஊறுகாய் அல்லது தொக்கு ஒரு பெஸ்ட் சாய்ஸ்! இதை ஒரு முறை செய்துவிட்டால், சுமார் 3 மாதங்கள் வரை கெட்டுப் போகாமல் வைத்துக்கொள்ளலாம். பூண்டு மற்றும் புளியின் சுவை கொண்ட இந்த அருமையான பூண்டு தொக்கு இட்லி, தோசை, சப்பாத்தி, அல்லது சாதம் என அனைத்திற்கும் அட்டகாசமாகப் பொருந்தும். அதுமட்டின்றி இந்த பூண்டு தொக்கு வாயுத்தொல்லையை போக்க கூடியதாகவும் இருக்கும். இதனை எப்படி செய்வது என்று ஃபூடிஸ்ரூப் இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

பூண்டு    1 கப் 
நல்லெண்ணெய்  4 டேபிள்ஸ்பூன் (நல்லெண்ணெய் உபயோகிப்பது நீண்ட நாட்களுக்கு கெடாமல் இருக்க உதவும்)
புளி  
மிளகாய் தூள் 
வெல்லம் 
உப்பு 

செய்முறை:

பூண்டில் பாதி அளவு (அதாவது 1/2 கப்), 1 பெரிய எலுமிச்சை அளவு புளி, 2.5 டேபிள்ஸ்பூன் மிளகாய் தூள், மற்றும் 1 டீஸ்பூன் வெல்லம் ஆகியவற்றை ஒரு மிக்ஸி ஜாரில் சேர்க்கவும். தேவைப்பட்டால் ஒரு டேபிள்ஸ்பூன் தண்ணீர் சேர்த்து, இதை நைஸ் பேஸ்ட்டாக அரைத்து எடுத்து வைக்கவும்.

ஒரு கடாயில், 4 டேபிள்ஸ்பூன் நல்லெண்ணெயை ஊற்றி சூடாக்கவும். எண்ணெய் சூடானதும், மீதமுள்ள பாதி பூண்டை (1/2 கப்) அதில் சேர்த்து நன்கு பொன்னிறமாகும் வரை வதக்கவும். பூண்டு வதங்கிய பிறகு, நீங்கள் அரைத்து வைத்த பேஸ்ட்டை கடாயில் சேர்க்கவும். அதனுடன் 1.5 டீஸ்பூன் உப்பையும் சேர்த்து நன்கு கலக்கவும்.

இந்த கலவையை அடுப்பை மிதமான தீயில் வைத்து, நன்கு வதக்க வேண்டும். அதில் இருக்கும் பச்சை வாசனை முழுவதும் நீங்கி, தொக்கின் நிறம் முழுமையாக மாறி, எண்ணெய் பிரிந்து மேலே வரும் வரை வதக்கவும். (இதுவே தொக்கு கெட்டுப் போகாமல் இருப்பதற்கான முக்கிய அறிகுறி). சுமார் 10-15 நிமிடங்களுக்குப் பிறகு, தொக்கு கெட்டியாகி, எண்ணெய் நன்கு பிரிந்து வந்தவுடன் அடுப்பை அணைக்கவும். தொக்கு முற்றிலுமாகக் குளிர்ந்த பிறகு, அதை காற்றுப் புகாத டப்பாவில் மாற்றி ஃபிரிட்ஜில் வைத்துப் பயன்படுத்தலாம். சாதம், இட்லி, தோசை என எதனுடன் சேர்த்துச் சாப்பிட்டாலும் இதன் சுவை அலாதியானது.