சீசன் வந்தாச்சு... அப்புறம் என்ன இந்த இந்த மாதிரி ஒரு மாங்காய் ஊறுகாய் செஞ்சிட வேண்டியதுதான!

உச்சக்கட்ட பசியில் இருக்கும்போது, உடனடியாக ஒரு சைட் டிஷ் தேவைப்பட்டால், இந்த ரெசிபி உங்களுக்கு கைகொடுக்கும். அதிக நேரம் செலவிடாமல், ஐந்து நிமிடங்களுக்குள் செய்து முடிக்கக்கூடிய இந்த இன்ஸ்டன்ட் மாங்காய் ஊறுகாய், சுடச்சுட சாதத்துடன் ஒரு மோர்க் குழம்பு அல்லது ரசத்துடன் சேர்த்துச் சாப்பிட மிகவும் அருமையாக இருக்கும். நீண்ட நாட்கள் ஊறவைக்க வேண்டியதில்லை, உடனடியாகப் பரிமாறலாம். எளிமையான இந்தப் பாரம்பரிய ரெசிபியை, பிரபல உணவு நிபுணர் அக்ஷதா தேசாய் தனது இன்ஸ்டாகிராம் பக்கத்தில் பகிர்ந்துள்ளார்.

தேவையான பொருட்கள்:

பச்ச மாங்காய்     1
எண்ணெய்    3-4 தேக்கரண்டி
கடுகு 
வெந்தயம் 
உப்பு    தேவைக்கேற்ப
மஞ்சள் தூள் 
மிளகாய் தூள் 
மல்லித்தூள் 

செய்முறை:

ஒரு பச்ச மாங்காயை (இளங்காயாக இருந்தால் இன்னும் சிறப்பு) நன்கு கழுவி எடுக்கவும். துளி கூட ஈரப்பதம் இல்லாமல் ஒரு துணியால் முழுவதுமாகத் துடைத்து உலர வைக்கவும். பின்னர், தோலை நீக்காமல் சிறிய சதுரத் துண்டுகளாக வெட்டி ஒரு பாத்திரத்தில் வைக்கவும். மாங்காய் துண்டுகளுடன், தேவையான அளவு உப்பு, மஞ்சள் தூள், மிளகாய் தூள், மல்லித்தூள் ஆகியவற்றைச் சேர்த்து, மாங்காயில் எல்லாப் பக்கங்களிலும் மசாலா ஒட்டும் படி நன்கு கலக்கவும்.

கனமான அடிப்பகுதி கொண்ட ஒரு பாத்திரத்தை அடுப்பில் வைத்து சூடாக்கவும். அதில் எண்ணெய் ஊற்றி, எண்ணெய் காய்ந்ததும் தீயை மிதமாகக் குறைக்கவும். இதில் கடுகு மற்றும் வெந்தயம் சேர்த்து, அவை நன்கு பொரிந்து வெடித்ததும் அடுப்பை அணைக்கவும். இந்த சூடான தாளிப்பை, ஏற்கனவே மசாலா சேர்த்து வைத்துள்ள மாங்காய் துண்டுகளின் மீது ஊற்றி, உடனடியாக நன்றாகக் கிளறவும். மாங்காயில் தாளிப்பின் சூடு ஏறி, ஊறுகாய்க்கு ஒரு நல்ல நறுமணத்தையும் சுவையையும் கொடுக்கும்.

View this post on Instagram

A post shared by Akshada Desai Lobo (@food.and.frolic)

அவ்வளவுதான், 5 நிமிடங்களில் சுவையான மாங்காய் ஊறுகாய் தயார். சூடான சோறு, மோர்க் குழம்பு/ரசம் மற்றும் இந்த உடனடி மாங்காய் ஊறுகாயுடன் சேர்த்துச் சாப்பிட்டால் அதன் ருசி அலாதியானது. தேவைப்பட்டால், இதனுடன் சிறிது பெருங்காயத்தூள் சேர்க்கலாம்.