ரோட்டுக் கடை சட்னி... யாருக்குத்தான் பிடிக்காது; அதே பக்குவத்தில் இப்படி செயுங்க!

ரோட்டுக் கடைகளில் விற்கப்படும் இட்லி, தோசையுடன் பரிமாறப்படும் சட்னியின் சுவைக்கு ஈடு இணையே இல்லை. அதன் தனிப்பட்ட சுவைக்குக் காரணம், அதில் சேர்க்கப்படும் பொருட்கள் மட்டுமன்றி, அதன் மெல்லிய, தண்ணியான பக்குவமும் தான். அதே சுவை மற்றும் பக்குவத்தில் தக்காளி, வெங்காயம், புதினா ஆகியவற்றைச் சேர்த்து ஒரு அசத்தலான சட்னியை உங்கள் வீட்டிலேயே எளிமையாக எப்படி செய்வது என்று செஃப்ஷன்ஜித் இன்ஸ்டா பக்கத்தில் கூறியிருப்பது பற்றி பார்க்கலாம். 

தேவையான பொருட்கள்:

வெங்காயம் (நறுக்கியது) - 1 கப்
தக்காளி (நறுக்கியது) - ½ கப்
வரமிளகாய் - 4 முதல் 6  
பூண்டு - 3 பல்
இஞ்சி 
புதினா இலைகள் 
கொத்தமல்லி இலைகள்
புளி 
பொட்டுக்கடலை - 2 மேசைக்கரண்டி
எண்ணெய் - 2 மேசைக்கரண்டி
உப்பு 

செய்முறை:

முதலில் ஒரு கடாயில் சிறிதளவு எண்ணெய் ஊற்றிச் சூடேற்றவும். எண்ணெய் காய்ந்ததும், வரமிளகாயைச் சேர்த்து லேசாகப் பொரிய விடவும். பின்னர், நறுக்கி வைத்த வெங்காயத்தைச் சேர்த்து, நிறம் மாறாமல் லேசாக வதக்கவும். வெங்காயம் சிறிது வதங்கிய பிறகு, இஞ்சி, பூண்டு, கொத்தமல்லி இலைகள், புதினா, புளி மற்றும் தக்காளியைச் சேர்க்கவும். இவை அனைத்தும் சேர்ந்து மணம் வரும் வரை சுமார் இரண்டு நிமிடங்கள் நன்கு வதக்க வேண்டும். அனைத்துப் பொருட்களும் நன்கு வதங்கிய பிறகு, அடுப்பை அணைத்துவிட்டு, இந்தக் கலவையை ஆற விடவும்.

View this post on Instagram

A post shared by Litwin Shanjit (@chefshanjit)

ஆறிய வதக்கிய கலவையுடன், இரண்டு மேசைக்கரண்டி பொட்டுக்கடலை மற்றும் தேவையான அளவு உப்பு சேர்த்து, சிறிதளவு தண்ணீர் ஊற்றி மையாக அரைத்துக் கொள்ளவும். அரைத்த சட்னியை ஒரு பாத்திரத்தில் மாற்றிய பின், ரோட்டுக் கடை சட்னியின் தனிச் சிறப்பான தண்ணிப் பக்குவத்திற்காக தேவையான அளவு தண்ணீர் ஊற்றி நன்கு கரைத்துக் கொள்ளவும். சட்னியின் பதம் சற்று தண்ணியாக இருந்தால்தான் அதன் சுவை சிறப்பாக இருக்கும். கடைசியாக, உப்பு மற்றும் காரம் சரியாக இருக்கிறதா என்று சரிபார்த்து பரிமாறவும். இந்தத் தக்காளி வெங்காயப் புதினா சட்னி இட்லி, தோசை, ஊத்தப்பம் போன்ற பலகாரங்களுக்கு ஏற்ற அற்புதமான இணை ஆகும்.